2 Musa 34
34
Dua batu mersurat sirimbaru
(5 Ms. 10:1-5)
1Nai idokken Jahowa nola mo taba si Musa, “Dakdak mo dua batu tosè bagè sitikanna i. Kusuratken mo i batu i dos katana bagè si lot i batu sienggo i pustakken kono idi. 2Kebbas mo kono baremben siceggen lako mengenangkengi delleng Sinai janah menghadep taba Aku i babo delleng idi. 3Sada kalak poda ndorok dekket rebbak dekket ko barang merian tupung kettan dikè pè ibas delleng idi. Ulang iduè lembu dekket biri-biri menggagat i gembar delleng i.” 4Nai idakdak si Musa mo dua nai nola batu, janah sibarembenkenna njengkas kalohon dèng iembah mo menangkeng mi babo delleng Sinai bagè sienggo idokken Jahowa tabasa.
5Nai susur mo Jahowa ibagessen hembun; cènder mo Ia dekket si Musa i bekkas idi, janah mengeruapken gerarNa simbadia i, imo Jahowa. 6#2 Ms. 20:5-6; 4 Ms. 14:18; 5 Ms. 5:9-10, 7:9-10 Enggo kessa i mentas mo Jahowa tarap lebbè si Musa janah mendokken, “Aku Jahowa, imo Dèbata si dom kelamlamen dekket masèh atè. Mertinèncuk ngo masèh atèngKu, setia ngo Aku janah oda murah melaga. 7Dak tong ngo masèh atèngKu soh meribu-ribu cundut janah mengampuni kesalahen dekket dosa; tapi ukum kalak simersalah oda Kupaluah ibas hukumen nai, janah Kuhukum ma ngo dukak-dukakna dekket kempu-kempuna soh mi cundut petelluken dekket pe-empatken kumerna dosa pertua kalak i.”
8Gejapkenna i ma mènter sujud mo si Musa mersembah. 9Nina mo, “Ialè Jahowa, mula tuhu-tuhu ngo lemmo atèMu baku, pengidoenku, uè mo ko alè Jahowa rebbak dekket kami. Tuhu mpihir ngo perukuren bangsa i, tapi ampuni mo kejahaten dekket dosa nami janah jalo mo kami gabè bangsaMu.”
Iperembaru Perpadanen
(2 Ms. 23:14-19; 5 Ms. 7:1-5, 16:1-17)
10Nina Jahowa mo taba si Musa, “Bagèndari Kubaing mo perpadanen dekket bangsa Israel. Kupehana mo kelengangen-kelengangen i hadeppen mata kalak i siso nung dèng ipehana barang bai bangsa paina pè i dunia ènda. Karinana bangsa mengidah kelengangen-kelengangen siKuhanaken idi, kumerna Aku, Jahowa naing menghanaken sada simasa mahantu taba kènè. 11Iuèi mo pati-patiin sienggo Kuberrèken taba kènè sidari èn. Kupelaus pè bangsa Amori, Kanaan, Het, Feris, Hewi dekket Jebus sinderrang kènè merdalan mi lebbè. 12Ulang kènè merpadan dekket jelma sininagerri dapetten ndènè i, kumerna ndorok ngo i gabè togong-togong taba kènè mengkerohken kematèen bai ndènè. 13#5 Ms. 16:21 Asa, ulang mo bakin bagi, tapi rumpakken mo langgaten-langgaten kalak i, sepperri mo tugu-tugu keramat kalak i janah tabah mo pandak-pandak Asyera, sembahen kalak i.
14Ulang sembah dèbata sisotuhu, kumerna Aku ngo Jahowa, imo Dèbata siso uè ipetosè dekket barang kadè pè. 15Ulang merpadan kènè dekket bangsa sini nagerri i, kerna sinderrang mersembah kalak i dekket memèlèken pèlèen bai dèbata kalak i, iarahken kalak i mo kènè, janah gabè dekket mo kè. 16Mula jejap dukak-dukak ndènè taba daberru bangsa sidèban, iajar-ajari daberru-daberru idi mo kalak i lako menadingken Aku janah menembah dèbata kalak i.
17 #
2 Ms. 20:4; 3 Ms. 19:4; 5 Ms. 5:8, 27:15 Ulang mo gana janah sembah dèbata-dèbata siniteppa ipas logam nai.
18 #
2 Ms. 12:14-20; 3 Ms. 23:6-8; 4 Ms. 28:16-25 Pestaken mo Pesta Roti siso Meragi. Bagè sienggo Kuperèntahken bamu, kennah mangan roti siso meragi ngo kènè sidekkah pitu ari tupung bulan Abib, kerna tupung bulan idi ngo kènè menadingken Mesir.
19 #
2 Ms. 13:2
Karina dukak daholi situaen dekket pinakan tonggal siperlebbè tubuh gabè milikKu, 20#2 Ms. 13:13 tapi kennah tebbusen ndènè ngo anak kalodè siperlebbè tubuh merkitè memèlèken sada anak biri-biri mahan gancihna. Mula oda kènè nggèut menebbus, kennah irèmpeng kènè kerahong kalodè i. Karina anak ndènè situaen kennah ngo tebbusen ndènè.
Isè poda ndorok roh mendahi Aku mula oda merembah pèlèen.
21 #
2 Ms. 20:9-10, 23:12, 31:14-15, 35:2; 3 Ms. 23:2; 5 Ms. 5:13-14 Lot ngo ennem ari bekkas mahan bahaen; ulang ke mahan bahaen i ari pepituken, agia nola pè idi nasin memangkur barang nasin merani.
22 #
3 Ms. 23:15-21, 23:39-43; 4 Ms. 28:26-31 Pèstaken mo Pèsta Peranien tikan tubenna kènè mengametti pagè. Pèstaken ma mo Pèsta Sapo-sapo Bulung i punca tahun, tikan memuat hasil buah-buahen kènè.
23Tellu kali mo ibas sitahun karina anak laki kennah roh mersembah tabaKu, Jahowa Dèbata Israel. 24Enggo kessa Kupelaus bangsa-bangsa i hadeppen ndènè nai janah Kupebellang tanoh ndènè, sada kalak poda pang lako mengerampas nagerri ndènè sinderrang laus kènè lako memèstaken Pèsta Roti siso Meragi, Pèsta Peranien dekket Pèsta Sapo-sapo Bulung.
25 #
2 Ms. 12:10
Tikan memèlèken pèlèen sisèaten kènè, ulang pèlèken barang kadè sambing sinibahan merdengngan ragi. Pinakan sinisèat mahan pèlèen Pèsta Paskah kennah kerinken mo i bernginkenna i ma; oda ndorok lot iba soh mi sibarembenkenna.
26 #
5 Ms. 14:21, 26:2 Gennep tahun kennah embahen ndènè mi bages Jahowa Dèbata ndènè hasil perlebbè i tanoh ndènè nai.
Jukut anak biri-biri barang anak kambing oda ndorok iroroh rasken laè susu indungna.”
27Nina Jahowa mo taba si Musa, “Suratken mo karina kata i kumerna merdangaen mi kata idi ngo Aku memakin padan dekket kono bang dekket bangsa Israel.” 28Empatpuluh ari empatpuluh berngin ngo si Musa merian i sidi rebbak dekket Jahowa, janah sidekkahna i ma mo, ia oda mangan oda mènum. Karina kata perpadanen i, imo sipuluh Pati-patiin Dèbata, isuratken ipas sidua ngkabuah batu i.
Susur si Musa i Delleng Sinai nai
29 #
2 Kor. 3:7-16
Tikala susur si Musa i Delleng Sinai nai merembah Pati-patiin sisipuluh i, mercuhaya ngo abèna tengngennen kumerna enggo mengerana ia deket Jahowa, tapi ukum si Musa, oda i bettoh mercuhaya abèna idi. 30Idah si Aron dekket karina jelma nterrem i ngo mercuhaya abè si Musa idi, gabè mbiar mo kalak i menjolmitisa. 31Tapi itenggoi si Musa mo kalak i nai ijolmiti si Aron dekket karina pengulu kalak i mo ia, janah mengerana mo si Musa taba kalak i. 32Enggo kessa bagi, merpulung mo karina bangsa Israel mencingkoisa, janah ibagahken si Musa mo taba kalak i karina pati-patiin siniberrèken Jahowa tabasa i babo Delleng Sinai. 33Enggo kessa mengerana dekket kalak i, ikemkemmi si Musa mo abèna dekket kaèn. 34Gennep mbengket si Musa mi bagessen Undung-undung Jahowa lako mengeranai dekket Jahowa, ibuka mo kaèn i sampè karuar ia. Enggo kessa i ipesakat mo taba bangsa Israel karina tennah Jahowa, 35janah idah kalak i ngo mercuhaya abè si Musa. Nai isangkemmi nola mo abèna soh mi tikki mula mengeranai nola ia dekket Jahowa.
Currently Selected:
2 Musa 34: LAIBTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
