2 Musa 33
33
Ipasulak Jahowa bangsa Israel menadingken Delleng Sinai
1 #
1 Ms. 12:7, 26:3, 28:13 Nai idokken Jahowa mo taba si Musa, “Tadingken mo bekkas ènda janah berkat mo kono rebbak dekket bangsa siniembahmu i Mesir i nai mi nagerri siKuperbagah bai si Abraham, si Isak, dekket si Jakob bak pinempar kalak i. 2Kupasulak pè sada kalak malaèkat lako mengarak-ngarak kènè. Kupuari pè bangsa Kanaan, Amori, Het, Feris, Hewi dekket Jebus. 3Menuju mi tanoh kaya janah nggabur ngo kènè. Tapi ukum Aku oda pella dekket rebbak kènè, asa ulang Kuripasken kènè i tengah ndalan, kerna bangsa simpihir ukur ngo kènè.”
4-6Enggo kessa i isuruh Jahowa nola mo si Musa mendokken taba bangsa Israel, “Kènè alè bangsa simpihir ukur. Mula dekket Aku rebbakken dekket kènè, sinempas sambing pè, pasti Kuripasken ngo kènè karina. Talkasi kènè mo karina perhiasen ndènè, asa Kubettoh barang kadè naing bakinenKu taba kènè.” Kessa idengkoh kalak idi pemincang Jahowa idi, bonek kalohon mo kalak i tosè bagè kalak si mersindanggel. Nai italkasi kalak i mo perhiasen kalak i. Asa, enggo kessa menadingken delleng Sinai, oda nè memakè perhiasen ukum bangsa Israel.
Undung-undung Jahowa
7Gennep naing merundung-undung bangsa Israel, ibuat si Musa mo Undung-undung i janah ipejengjeng mo narih ndaoh i lungguken perundung-undungen kalak i nai. Igerari mo Undung-undung idi Undung-undung Jahowa, janah barang isè naing mengido peddah Jahowa, laus mo mi sidi. 8Mula laus si Musa mi undung-undung idi mercènderren mo kalak Israel i lebbè pèntu undung-undung kalak i janah mendatèken si Musa soh mbengket. 9Enggo kessa mbengket si Musa, susur mo tihang hembun janah kom i pèntu Undung-undung i. Mongkam mo Jahowa ibas hembun idi nai taba si Musa. 10Sinderrang idah kalak Israel tihang hembun sinipèntu Undung-undung Jahowa i, kèkè mo kalak idi karina janah sujud i pèntu undung-undungna gennep. 11Mengerana mo Jahowa bak si Musa pehadep abè, bagè kalak simengeranai dekket dengnganna. Kessa bagi balik mo si Musa mi perundung-undungen. Tapi ukum si Josua anak si Nun, sada kalak anak perana pengurupi si Musa, tong ngo tading i bagessen Undung-undung i.
Jahowa merjanji dak tong mendengani bangsaNa
12Tikan sidari idokken si Musa mo taba Jahowa, “Alè Jahowa idokken Kono ngo aku mengarahken bangsa en mi nagerri siniperbagahMu. Tapi oda lot idokken Kono barang isè pasulakkenMu lako mengurupi aku. Alè Jahowa, idokken Ko ngo itandai Kono ngo nimu aku, janah ikellemoken Kono aku. 13Mula bagidi, uè mo ko magahken barang kadè sura-suraMu, alè Jahowa, asa ndorok aku mengkebasi Kono janah dak tong pesennangken ukurMu. Engèt ma mo tong, ukum bangsa ènda enggo ipilih Kono gabè milikMu.”
14Nina Jahowa mo, “Kudengani pè kènè asa ndorok gabè milik ndènè tanoh sienggo Kuperbagah i.”
15Ialoi si Musa mo, “Mula oda ngo dekket ko alè Jahowa rebbak deket kami, ulang nè mo pasulak kami lako menadingken bekkas ènda. 16Bakunè mo kalak memettoh lemmo atèmu baku dekket taba bangsa ènda mula oda iurupi Kono kami? Merkitè uè ko alè Jahowa merian i tengah-tengah nami i ngo petandaken lot laènna kami bai bangsa sidèban nai i tanoh èn.”
17Nai nina Jahowa mo taba si Musa, “Kuuèi pè sinipido mi, kerna Kutandai ko janah lemmo ngo atèngKu midah ko.”
18Nai mengèlèk mo si Musa, “Alè Jahowa pecidah mo baku cuhaya pekirohMu.”
19 #
Rm. 9:15
Ialoi Jahowa mo, “Mentas pè Aku ibagasen kehejinKu i hadeppenmu, ninganna mengeruapken gerarKu simbadia i. Aku ngo Jahowa, janah Kuberrèken ngo lamlam dekket masèh atè bai kalak sienggo Kupilih. 20Ukum abengKu oda Kupacidah bamu, kumerna oda ndorok idah jelma Aku, janah tong dèng ia ngelluh. 21I lebbèngKu adoi lot ngo sada uruk batu; ndorok mo ko cènder i sidi. 22Tikan memellus cuhaya pekirohKu; Kuselletken mo ko mi kellang-kellang batu sini uruk i janah Kukemkemmi dekket tanganKu soh mi Kulausi ko. 23Nai kusintak mo tanganKu, asa ndorok idah ko Aku i podi nai, tapi ukum abèngKu oda idahenmu.”
Currently Selected:
2 Musa 33: LAIBTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
