2 Musa 32
32
Lembu emmas
(5 Ms. 9:6-29)
1 #
Ul. 7:40
Idah bangsa Israel kessa mo enggo ndekkah oda susur si Musa i delleng idi nai, tapi dak tong dèng ma i sidi, merrohen mo kalak i mendahi si Aron janah idokken mo tabasa, “Oda sibettoh barang kadè masa bai si Musa, kalak sienggo me- ngarak kita mbungkas i Mesir nai; asa teppa mo bai nami dèbata simenguluken kami.”
2Nai nina si Aron mo taba kalak i, “Talkasi kènè mo sobeng emmas sinipakkè sinibages ndènè dekket dukak-dukak ndènè, janah embah kènè mo baku.” 3Nai italkasi kalak i mo sobeng emmasna gennep janah iembah taba si Aron. 4#Ul. 7:41 Ijalo si Aron mo sobeng i karina, nai ilala mo janah i tuang mi bagessen sada tuangen janah ibahan mo sada mèjan lembu.
Nina bangsa i mo, “Alè Israel, èn ngo dèbatanta simenaruhken kita mbungkas i Mesir nai!”
5Nai ipajek si Aron mo sada langgaten i lebbè lembu emmas idi janah itingtingken, “Baremben lot ngo pèsta lako pesangapken Jahowa.” 6#1 Kor. 10:7 Sibarembenkenna siceggen njengkas kalohon, iembah kalak Israel mo tah piga-piga pinakan mahan pèlèen si tutungen, dekket tah piga nai mahan pèlèen perdamèen. Merdogoken mo kalak i mangan dekket mènum, nai tumataki mersennang-sennang.
7Nai idokken Jahowa mo taba si Musa, “Ndor mo kono susur, kerna bangsamu siniulukenmu mbungkas i Mesir nai, enggo mengulaken jahat. 8Enggo menurimpang kalak idi ibas pati-patiinKu nai. Enggo ibahan kalak idi gana-ganaen lembu ipas emmas tuangen nai, ninganna menembahsa dekket memèlèken pèlèen bana. Nina kalak i, imo dèbata na simengarak kalak i mbungkas i Mesir nai. 9Kubettoh ngo mpihir kalohon ukur bangsa i. 10Ulang oji menghalangi Aku. Melaga ngo Aku taba kalak idi janah naing ngo Kuripasken kalak i. Tapi ukum kono dekket pinemparmu naing Kubaing ngo gabè sada bangsa mbellen.”
11 #
4 Ms. 14:13-19
Mengido mo si Musa taba Jahowa Dèbatana, nina mo, “Alè Jahowa, kasa kennah bagi bakinenMu taba kalak i? Otang enggo ipaluah Kono kalak i i Mesir nai merkitè kuasa dekket kegegohen mbellen? 12Mula iripasken Kono kalak i, dokenken kalak Mesir mo, iuluken Kono pè bangsa idi mbungkas i Mesir nai asa lako memunuh kalak i ngo i delleng dekket mengeripasken kalak idi karinana. Ulang mo bagidi, alè Jahowa, sondati mo niatMu janah ulang mo cilaka bangsa i bakin. 13#1 Ms. 22:16-17, 17:8 Engèt mo naposoMu si Abraham, si Isak, dekket si Jakob. Engèt mo enggo pella merpadan Ko merkitè bulaban lako memerèken bai kalak i pinempar bagè buè bintang i langit, janah ma karina tanoh siniperbagahmu idi kennah gabè milik pinempar kalak i soh mi sidekkah-dekkahna.” 14Nai isondati Jahowa mo niatNa i janah oda saut ipesempa asupNa i memaing olpek taba bangsa idi.
15Susur mo si Musa balik i delleng idi nai merembah batu lè si dua i, sienggo mersurat patiin Dèbata ipas sisina kacimbang mbellahna. 16Dèbata sendiri ngo memahan batu idi janah mengokirken pati-patiinNa i mi sidi.
17Sinderrang susur idi, idengkoh si Josua mo kalak Israel mersurak-surak, nai nina mo taba si Musa, “Bagè lot sora gulut mergeraha i perundung-undungen.”
18Nina si Musa mo, “Dengkohen oda ngo bagè surak kemenangen barang derko ketaluen; sora kalak merendè ngo i.”
19Enggo kessa njolmit si Musa mi perundung-undungen i, idah mo lembu emmas i dekket kalak sinterrem sidang tumataki, nai melaga mo ia. Ipispis delleng i dèng ngo, mènter itembemken si Musa mo batu siniembahna idi, sanga mereppuk. 20Nai ibuat mo gana-gana lembu sinituang kalak Israel idi, ilala mo, itutu melèmet bagè cirabun, nai isakkor mo dekket laè. Nai idokken mo kalak Israel mengènum. 21Idokken mo taba si Aron, “Bakunè pana ibaing kalak idi bamu asa ibelli kono kalak idi merdosa mbelgah?”
22Ialoi si Aron mo, “Ulang melaga ko taba aku; ibettoh kono sendiri ngo barang bakunè mbohona jelma nterrem en mengulaken jahat. 23Idokken kalak i ngo taba aku, ‘Oda sibettoh barang kadè masa bai si Musa, kalak sienggo menguluken kita mbungkas i Mesir nai; kerna i bahan mo bai nami dèbata sindorok menguluken kami.’ 24Nai kudokken mo tuhu taba kalak i asa iberrèken perhiasen emmas, nai iberrèken kalak i mo baku. Kupemasuk mo karina emmas idi mi bagasen api, nai jadi mo lembu èn!”
25Satdar mo si Musa enggo ibelli si Aron bangsa Israel bagè kuda maluah i kandangna nai, gabè sitertabaen musuhna mo kalak i. 26Nai cènder mo ia i lebbè pèntu pengkeruhen perundung-undungen i janah mersurak, “Barang isè menguèi bai Jahowa kennah roh mo mi sèn!” Nai merrohen mo marga Lewi mengkulilingi si Musa, 27janah idokken mo taba kalak i, “Jahowa Dèbata Israel memerèntahken bai ndènè gennep lako menintak peddang ndènè janah merdalan tarap perundung-undungen èn, i pèntu ènda nai soh mi pèntu sidèban ninganna memunuh senina-senina ndènè, supan-supan ndènè dekket sincelket ndènè.” 28Iulaken marga Lewi mo perèntah idi janah ibas sidarinkenna i matè mo kira-kira tellu ribu kalak i bunuh. 29Nina si Musa mo taba marga Lewi, “Sidari èn enggo ibakin kènè diri ndènè gabè imam pellin mengkebasi Jahowa merkitè memunuh dukak-dukak dekket sinina-senina ndènè, nai iberrèken Jahowa mo pasu-pasuNa bai ndènè.”
30Sibarembenkenna idokken si Musa mo taba bangsa i, “Enggo iulaken kènè dosa mbellen. Tapi bagèndari balik nola mo aku menangkeng mi delleng lako menghadep Jahowa; katerra pè ndorok mo aku ijalo mengidoken kesasaen dosa ndènè i.” 31Nai laus mo si Musa menghadep Jahowa lako magahken, “Enggo mengulaken dosa mbellen bangsa i. Ibahan kalak i ngo dèbata- na i emmas nai. 32#Ps. 69:28; Alm. 3:5 Pemalap mo ukurmu mengampuni dosa kalak i; mula mada, sasa mo gerarku ibas bukku bekas kalak singgelluh nai.”
33Nai ialoi Jahowa mo, “Pellin kalak sienggo merdosa taba Aku ngo kessa Kusasa gerarna ibas bukku idi nai. 34Laus mo ko bagèndari, janah uluken mo kalak i mi bekkas sienggo Kudokken bamu. Iarak-arak malaèkatKu pè ko, tapi roh mo katikana Kuhukum mo kalak i kumerna dosa-dosa kalak i.”
35Nai ipemasa Jahowa mo hukum taba kalak i, kerna ipaksa kalak i si Aron lako menggana lembu emmas idi.
Currently Selected:
2 Musa 32: LAIBTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
