2 Musa 31
31
Ipilih Dèbata kalakna lako memahan Undung-undung dekket haliuna
(2 Ms. 35:30–36:1)
1Idokken Jahowa mo taba si Musa, 2“Enggo Kupilih si Bezaleel anak si Uri, kempu si Hur i marga Juda nai, 3janah Kupasu-pasu ia merkitè kuasangKu. Kuberrèken ngo bana pengarusien, kepandèen dekket perbinettohen bak karina matcam bagè kepandèen: 4lako mahan rancangen simemerluken kepandèn bak memahanken ipas emmas, pirak dekket tembaga nai; 5lako memelas batu intan sinaing itiktikken lako mengokir kayu dekket lako mahan karina matcam bagè ketukkangen sidèbanna i. 6Si Oholiab, dukak si Ahisamakh i marga Dan nai, enggo Kupilih ma lako mengurupisa. Kuberrèken ma ngo kepandèn mahantu kalohon taba tukkang-tukkang sipandè, asa ndorok terbahan kalak i barang kadè sambing siKudokken: 7Undung-undungKu; Pèti Perpadanen dekket tutupna, karina haliu Undung-undung, 8imo mèja dekket perlengkapenna, nèhè lampu ipas emmas tulèn nai dekket perlengkapenna, langgaten bekkas menutung dahupa, 9langgaten bekkas pèlèen situtungen dekket karina perlengkapenna, kancah bekkas laè dekket henjellenna, 10pakkèen merkebbas bai si Aron dekket dukak-dukakna, si kennah i pakkè tikan merkebbas kalak i gabè imam, 11minak keperluen kerja pemasu-masuen imam, dekket dahupa sibaungkus mi Bilik Simbadia. Karinana idi kennah ibahan kalak i tosè bagè codien sienggo Kubagahken bamu.”
Sabat, ari Pentadien
12-13Nai iperèntahken Jahowa mo taba si Musa lako meningtingken taba bangsa Israel, “Pèstaken mo ari Sabat ari sienggo Kutetapken gabè ari pentadien. Soh mi sidekkah-dekkahna mo ari idi mahan pernèngèten bai ndènè dekket Aku, asa ibettoh kènè Aku ngo Jahowa, janah enggo Kubakin kènè gabè bangsangKu sendiri. 14-15#2 Ms. 20:8-11, 23:12, 34:21, 35:2; 3 Ms. 23:3; 5 Ms. 5:12-14 Kennah pesangapen ndènè ngo ari pentadien idi gabè ari simbadia. Kuberrèken mo bai ndènè ennem ari lako mahan bahaen, tapi ari pepituken idi imo ari mbellen simerhuntuen baKu. Barang isè oda pesangapken ari i, tapi mahan bahaen nola tupung ari i, kennah ihukum matè. 16Kenah irayaken bangsa Israel ngo ari i turun tumurun mahan tanda perpadanen. 17#2 Ms. 20:11 Sada ari pernèngèten tettap mo ari idi bai bangsa Israel dekket Aku, kumerna Aku, Jahowa enggo menempa langit dekket tanoh ibagessen ennem ari, janah i ari pepituken i oda ngo Aku mahan bahaen janah mentadi.”
18Enggo kessa dung mengerana dekket si Musa i babo delleng Sinai, iberrèken Dèbata mo tabasa dua batu sienggo isurati Dèbata dekket pati-patiinNa.
Currently Selected:
2 Musa 31: LAIBTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
