2 Musa 28
28
Pakkèen Imam
(2 Ms. 39:1-7)
1“Diloi mo si Aron kakamu i rasken dekket dukak-dukakna, si Nadab; si Abihu, si Eleazar dekket si Itamar, janah pejaè mo kalak i asa ndorok mengkebasi Aku gabè imam. 2Bahan mo pakkèen imam bai si Aron, asa mersangap ia tengenen. 3Tenggoi mo karina tukkang jait sienggo Kuberrèken kepandèen. Dokken mo kalak i memahan pakkèen si Aron, asa ndorok ia lako mengkebasi Aku gabè imam. 4Suruh ma mo kalak i memahan tutup tenten, efod, jubah, kemèja mersulam, sorban dekket tali abak. Pakkèen imam idi kennah ibahan kalak idi bai si Aron kakami dekket dukak-dukakna asa ndorok gabè imam kalak i mengkebasi Aku. 5-6Kennah ipas wol meratah nai ngo ibahan kalak i pakkèen i, bak kelabu dekket mbara, bennang emmas dekket linen halus nai. Laènkenna i, efod kennah itiktik deket sulamen. 7Dua tinali bara pengèkèt efod kennah ijaitken i sisina. 8Sada tali abak tennunen halus ipas bennang emmas dekket linen halus nai ijaitken ipas efod i asa gabè mersada. 9-12Buat mo dua batu intan. Tulusi mo sada kalak tukkang emmas sipandè lako mengokir i batu intan i gerar-gerar dukak si Jakob si sipuluh dua i situaen nai soh mi sikèdèken, ennem gerar mo ibas gennep batu intan i. Nai duana batu intan i kennah ibakin ibas bingkè emmas janah ibakin mi tali bara efod sikira tanda pernèngèten taba sisipuluh dua marga Israel. Merkitè bagi mo si Aron merembah gerar kalak i i barana, asa Aku, Jahowa, dak tong mernèngèt kalak i. 13-14Laènken sidua bingkè emmas i, kennah ibahan ma mo dua rantè emmas tulèn, itali bagè tinali, lako ileketken mi bingkè emmas idi.”
Tutup tenten
(2 Ms. 39:8-21)
15“Bahan mo bai Imam Huntuen sada tutup tenten mahan pakkèenna tikan naing ikuso hendak Dèbata. Sibakinen dekket sisulamen mahan tutup tenten idi kennah dos deket sibakinen dekket sisulamen mahan efod. 16Bentukna empat soki janah lempit dua, geddang dekket bekkangna ter 22 sèntimèter. 17Leketken mo empat mbaris batu intan ipas tutup tenten idi. I baris perlebbè batu delima, topas dekket permata. 18I baris peduaken batu jamrud, permata nilam dekket intan. 19I baris petelluken permata meratah, batu akik dekket batu kecubung. 20I baris pe-empatken batu pirus, yakut dekket ratna cempaka. Itustusi mo sisipuluh dua permata idi dekket emmas. 21Ipas gennep mata intan i kennah iokir ngo sada gerar ibas sisipuluh dua anak si Jakob sikira tanda pernèngèten bai marga-marga Israel. 22Bahan mo mi tutup tenten idi dua rantè emmas tulèn sinitali bagè tinali. 23Bahan ma mo dua gellang emmas janah lekketken mo mi sidua punca kan dates tutup tenten idi 24nai pemasuk mo sidua rantè emmas idi mi bagessen gellang-gellang ndai. 25Punca rantè sidua nai idi kennah i èkètken mi sidua bingkè, asa ndorok ipedemmu tutup tenten idi dekket tinali bara efod si kettan lebbè. 26Bahan mo dua nai gellang emmas ninganna lekketken ipas tutup tenten i ipunca kan terruh kettan bagessen si kenna efod. 27Enggo kessa bagi, bakin mo dua nai gellang emmas janah lekketken mo kettan jolo ipas sidua èkèt bara efod i gembar perdemuen penjarumenna narih mi terruh, kettan babo tali abak ipas tennunen halus i nai. 28Gellang tutup tenten kennah ipedemmu deket tinali meratah sinigellang efod i asa dak tong i babo tali abak i tutup tenten i janah oda nggèut ntalkas.
29Sinderrang masuk si Aron mi bekkas simbadia, kennah iembah ngo gerar-gerar marga Israel siterokir ipas tutup tentenna, asa Aku, Jahowa, dak tong terèngèt taba bangsangKu. 30#4 Ms. 27:21; Esr. 2:63; Neh. 7:65 Baing mo Urim dekket Tumim ipas tutup tenten i lako pakkèen si Aron mula roh ia menghadep Aku. Tupung sinderrang bagidi kennah tong ngo ia memakè tutup tenten, asa ndorok ibettoh gerrek atèngKu taba bangsa Israel.”
Pakkèen sidèban bai Imam
(2 Ms. 39:22-31)
31“Jubah sinipakkè i babo efod i kennah karina ibahan ipas wol meratah nai. 32Lubang kerahongna ikilim dekket pita sinitennun nai asa ulang murah meribak. 33-34Kuliling biding tan terruh kennah ibakin hiasen buah ndalima ipas wol meratah nai, kelabu dekket mbara, i kellang-kellangi dekket giring-giring emmas. 35Kennah ipakkè si Aron ngo jubah i mula merkebbas ia bagè Imam. Tikan roh ia mi hadeppenKu i bilik simbadia barang tikan menadingken bekkas i, terdengkoh mo sora giring-giring i asa ulang matè ia.
36Bahan mo sada hiasen ipas emas tulèn nai janah okir mo dekket kata ‘Pellin bai Jahowa.’ 37Tapelken mo idi mi sorban dekket tinali meratah. 38Kennah ibakin si Aron ngo hiasen emmas idi ipas perdempakenna asa uè Aku, Jahowa, menjalo karina pèlèen siniembah kalak Israel taba Aku, tukasi pè tikan merembah pèlèen i enggo mengulaken kesalahen kalak i.
39Kamèja si Aron kennah itennun ipas linen halus nai. Bahan ma mo sada sorban ipas linen halus nai dekket tali abak sinisulam.
40Bahan mo kamèja, tali abak, dekket sorban bai dukak-dukak si Aron asa metunggung kalak i idahen. 41Pakkèken mo pakkèen idi bai si Aron kakamu i dekket bai dukak-dukakna. Minaki mo kalak i dekket minak zaitun; merkitè bagidi mo kalak i ipebangkit janah ipepellin mengkebasi Aku gabè imam. 42Nai bahan mo bai kalak i sulabal joppok ipas kaèn linen nai, geddangna i abak nai soh mi paha lako menutupi daging siso patut teridah. 43Kennah dak ipakkè kalak i ngo sulabal idi tikan mbengket mi bagessen Undung-undungKu barang tikan menjolmiti langgaten lako menguluken ulaen imam i Bilik Simbadia, asa ulang matè kalak i, kerna teridah badan kalak idi siso patut teridah. Hot ngo hatoren idi merdalan bai si Aron dekket pinemparna.”
Currently Selected:
2 Musa 28: LAIBTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
