2 Musa 27
27
Langgaten
(2 Ms. 38:1-7)
1“Bahan mo sada langgaten ipas kayu akasia nai, empat soki, geddang dekket bekkangna ter 2,2 mèter janah datesna 1,3 mèter. 2I gennep soki kettan dates kennah ibaing mertanduk-tanduk janah mersada mi langgaten i. Karina kennah ilampis dekket tembaga. 3Bahan mo saruam-saruam, senduk, mangkuk-mangkuk, garpu-garpu dekket bekkas api. Karina haliu idi kennah ibahan ipas tembaga nai. 4Bayu mo kawat ipas tembaga nai, janah lekketken mo empat gellang bekkas kayu osong-osong ipas siempat soki kettan terruh. 5Dates kawat sinibayu i kennah sitengah dates langgaten i ngo. Kennah ililitken mo kawat sinibayu idi mi langgaten i kettan terruh. 6Bahan mo dua kayu osong-osong ipas kayu sempènur nai merlampis tembaga, 7janah surukken mi bagasen gellang-gellang i kacimbang lambung langgaten idi tikan mengosong langaten i. 8Bahan mo langgaten i ipas papan nai janah merlubang i bagessen, mengèkutken rencana siKupacidah bamu i babo delleng èn.”
Kasèan Undung-undung Jahowa
(2 Ms. 38:9-20)
9“Baing mo kasèan kuliling Undung-undungKu ikirèi dekket kaèn linen halus nai. Kettan selatan, geddang kirè-kirè i 44 mèter, 10itongkel duapuluh tihang tembaga, karina i merhenjelen tembaga, janah kait-kait bak sangkettenna ipas pirak nai. 11Bakin mo bagi ma kettan utara. 12Kettan kesunduten, geddang kirè-kirè i 22 mèter, sipuluh tihang bak henjellenna. 13Kettan kebincaren, simerpèntu i, geddang kirè-kirè i tong ma 22 mèter. 14-15I kacimbang lambung pèntu i, kennah ibakin ngo kirè-kirè, ter 6,6 mèter geddangna janah tellu tihangna ipas tellu henjellen. 16Mahan pèntuna kennah ibaing kirè-kirè geddangna 9 mèter ipas linen halus nai sinitennun dekket wol meratah, kelabu dekket mbara, janah ihias dekket sulamen. Mahan sangketten kaèn pèntu i kennah ibahan empat tihang dekket empat henjellen. 17Karina tihang i kuliling kasèan idi kennah ipedemmu dekket sangketten pirak idi; kait-kaitna kennah ipas pirak nai janah henjellenna ipas tembaga nai. 18Kirè-kirè i kuliling kasèan idi geddangna 44 mèter, bekkangna 22 mèter janah datesna 2,2 mèter. Kirè-kirè i kennah ibahan ipas kaèn linen halus nai janah henjellenna ipas tembaga nai. 19Karina haliu sinipakè ibas Undung-undung idi, karina patok mahan Undung-undung dekket kirè-kirèna kennah ibakin ipas tembaga nai.”
Cara mengurus lampu
(3 Ms. 24:1-4)
20“Suruh mo kalak Israel merembah minak zaitun tulèn janah simendèna kalohon mahan lampu i bagasen Undung-undungKu asa ndorok ilakati janah lakat terrus. 21Kennah si Aron dekket dukak-dukakna ngo menjamotken lampu idi ciboen nai soh mi siceggen i bekkasKu, i ruar kaèn sikirè i lebbè Pèti Perpadanen. Kennah iulaken kalak Israel dekket pinemparna ngo perèntah idi soh sidekkah-dekkahna.”
Currently Selected:
2 Musa 27: LAIBTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
