2 Musa 29
29
Hatoren tersèngèt pebangkitken si Aron dekket dukak-dukakna gabè imam
(3 Ms. 8:1-36)
1“Bagèen mo carana pebangkitken si Aron dekket dukak-dukakna asa ndorok kalak i gabè imam mengkebasi Aku. Buat mo sada lembu bajar tonggal dekket dua biri-biri tonggal siso mertikas. 2Bahan mo nditak siso meragi ipas topong roti simendèna kalohon nai. Ibakin mo dèba ibas nditak idi nai mahan roti merdengngan minak zaitun, dèba nai oda pella merminak, janah sitadingna i ibahan mo kuè idalisi dekket minak. 3Baing mo idi ibagessen baka janah pèlèken mo baKu rebbak dekket pèlèen lembu tonggal dekket biri-biri tonggal sidua i.
4Dokken mo si Aron dekket dukak-dukakna roh mi pèntu Undung-undungKu janah menguras. 5Pakkèken mo pakkèen imam bai si Aron: Kamèja, efod, jubah menutupi efod, tutup tenten dekket tali abak. 6Bakin mo sorban i babontakalna janah selletken mo ipas sorban idi hiasen emmas simerokirken ‘Pellin bai Jahowa.’ 7Nai buat mo minak kerja, arirken mi babontakalna janah minaki mo ia.
8Enggo kessa bagi, dokken mo dukak-dukakna roh janah pakkèken mo kamèja, 9dekket tali abak bai kalak i, nai baing mo sorban i takal kalak i. Bagi mo carana lako pebangkitken si Aron dekket dukak-dukakna. Kalak i dekket pinemparna mo mengkebasi Aku gabè imam soh mi amman sumendah.
10Nai nola ma kennah embahenmu ngo lembu tonggal idi mi lebbè Undung-undungKu. Kennah mo iampèken si Aron dekket dukak-dukakna tanganna mi babontakal pinakan idi. 11Sèat mo lembu tonggal idi i lebbèngKu, i pèntu Undung-undung i. 12Buat mo dèba daroh lembu idi janah dalisken dekket jari-jarimu mi tanduk-tanduk langgaten idi. 13Enggo kessa bagi, buat mo karina pessoh-pessoh simemaluti bitukana, atèna simendèna kalohon dekket piahnaduana bak pessohna janah baing mo i karina mi babo langgaten janah tutung mo mahan pèlèen baKu. 14Suka, koling dekket bituka raja lembu tonggal idi kennah itutung i ruar perundung-undungen. Idi mo pèlèen mahan kesesaen dosa imam.
15Kessa bagi buat mo sada ibas biri-biri tonggal idi nai. Kennah iampèken si Aron dekket dukak-dukakna mo tanganna mi babo takal pinakan i. 16Nai sèat mo pinakan i, buat mo darohna janah pispisken mi empatna soki langgaten idi. 17Kennah itektek ngo biri-biri tonggal i. Bitukana dekket pahana kennah iborih janah ibakin i babo takalna bak ibabo tektek sidèbanna i. 18#Ep. 5:2; Pil. 4:18 Pèlèken mo karina biri-biri tonggal i i babo langgaten mahan pèlèen situtungen. Pesennangken atèngKu ngo bau pèlèen idi.
19Buat mo biri-biri tonggal si sada nai, imo biri-biri tonggal keperluen ulaen pemasu-masuen imam. Dokken mo si Aron dekket dukak-dukakna mengampèken tangan kalak i mi babo takal pinakan i. 20Nai sèat mo biri-biri tonggal i, buat mo situk darohna, janah dalisken mi coping kamuhun si Aron dekket dukak-dukakna, mi kekambal tangan kamuhun dekket mi kekambal nèhè kamuhun kalak i. Daroh sitadingna dèng kennah pispisken mi empatna soki langgaten i. 21Buat mo cituk daroh si lot i babo langgaten i dekket situk minak kerja, nai pispisi mo si Aron dekket dukak-dukakna bagi dekket pakkèen kalak i. Merkitè bagidi enggo mo ikellini si Aron dekket dukak-dukakna bak pakkènna lako bangKu.
22Buat mo pessoh biri-biri tonggal i, uitna simerpessoh, pessoh bitukana, atèna simendèna kalohon, piahna duana dekket pessohna dekket paha kamuhunna. 23Ibas kirang roti sienggo ipèlèken baKu nai, buat mo sada roti ipas gennep matcamna nai; sada sinibahan merdengngan minak zaitun, sada siso pella merminak dekket sada kuè. 24Ampèken mo karina pangaen idi ibas tangan si Aron dekket dukak-dukakna janah dokken mo kalak i memèlèken baKu sikira pèlèen hujuen. 25Nai buat mo roti i bai kalak i nai janah tutung mo i babo langgaten, i babo pèlèen situtungen i. Bau pèlèen i mo pesennangken atèngKu.
26Buat mo dada biri-biri tonggal i janah pèlèken mo mahan pèlèen simerkedekoen baKu. Janah imo sulangmu.
27Ibas ulaen pemasu-masuen imam, dada dekket paha biri-biri tonggal sinipakè i kerja i kennah ipèlèken sikira pèlèen simerkedekoen baKu janah ipejaè bai imam. 28En mo keputusenKu siso ndorok obahen. Sinderrang roh bangsangKu memèlèken pèlèen per- damèen, dada dekket paha pinakan idi mo sulang imam. Imo pèlèen bangsangKu bangKu.
29Pakkèen si Aron merkebbas kennah iberrèken taba dukak-dukakna asa ndorok ipakkè kalak i sinderrang pemasu-masuen petettahken. 30Anak si Aron sigabè imam menggancihi bapana dekket memengketti Undung-undungKu lako merkebbas i bilik simbadia, kennah ipakkè ngo pakkèen idi pitu ari dekkahna.
31Buat mo jukut biri-biri tonggal sinipakè ibas kerja pamasu-masuen petettahken si Aron dekket dukak-dukakna i gabè imam janah masak mo jukut i ibas sada bekkas mpanting. 32Kennah ngo ipangan kalak i jukut idi i pèntu Undung-undungKu dekket iba roti silot i kembal idi. 33Kennah ipangan kalak i ngo pangaen sinipèlèken tupung kerja pengampunen dosa tikan i pemasu-masuen petettahken imam. Pellin imam ngo kessa ndorok kipangan pangaen sienggo ihujuken bangKu i. 34Mula lot deng gulè dekket roti i iba mi sibarembenkenna, kennah itutung ngo sitadingna i kerri, janah oda ndorok ipangan, kerna enggo merkedekoen idi.
35Kerja pemasu-masuen petettahken si Aron dekket dukak-dukakna gabè imam kennah ibaing pitu ari dekkahna, bagè sienggo Kuperèntahken bamu. 36Gennep ari kennah ipèlèken sada lembu tonggal mahan pengampunen dosa. Merkitè pèlèen i mo langgaten i ipepanting dekket minak zaitun. Nai kennah minaki mo langgaten i dekket minak zaitun asa merkedekoen i baKu. 37Bakin mo bagidi gennep ari sidekkah pitu ari. Nai mbadia mo suberri langgaten i, barang kadè sambing dais mi langgaten idi kennah isohken taba Jahowa, janah barang isè sambing mendeggessa, kennah cilaka kumerna kegegohen kebadiaenna.”
Pèlèen gennep ari
(4 Ms. 28:1-8)
38“Soh mi amman sumendah gennep ari kennah ipèlèken ngo i babo langgaten idi dua biri-biri merumur sada tahun. 39Sada mo i mahan pèlènken siceggen, janah sidèbanna i mahan pèlèn ciboen. 40Dengngan anak biri-biri sipèlènken siceggen idi, kennah ipèlèken sada kilo nditak simerandalna kalohon, icampur dekket sada sellup minak zaitun tulèn. Laènkenna i ma sada litèr laè anggur. 41Anak biri-biri sipèlènken ciboen, kennah tosè ngo bagidi ma pemèlèken, merdengan nditak, minak zaitun dekket laè anggur. Bau pèlèen situtungen i ngo pesennangken ukurKu. 42Nai terrus ngo bagi i karina tikki kennah ipèlèken ngo pèlèen i ihadeppenKu i pèntu Undung-undungKu. I sidi mo Aku pejumpa dekket bangsangKu janah mengerana taba kono. 43I si mo Aku pejumpa dekket bangsa Israel, janah cuhaya pekirohKu memaingken mbadia bekkas i. 44Aku ngo memaing Undung-undung deket langgaten idi mbadia. Kupepulik mo si Aron dekket dukak-dukakna bai sidèbankenna i nai asa kalak i gabè imam mengkebasi Aku. 45Merian mo Aku i tengah-tengah bangsa Israel, janah Aku gabè Dèbatana. 46Gabè ibettoh kalak i mo Aku ngo Jahowa Dèbata kalak i simengarak kalak i mbungkas i Mesir nai, asa ndorok Aku merian i tengah-tengah kalak i, Aku ngo Jahowa Dèbatana.”
Currently Selected:
2 Musa 29: LAIBTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
