2 Musa 26
26
Undung-undung Jahowa
(2 Ms. 36:8-38)
1“Bahan mo undung-undung baKu ipas sipuluh rambar kaèn linen halus nai, itennun dekket wol meratah, kelabu dekket mbara. Sulam mo kaèn idi dekket gombaren Kerub. 2Gennep rambar kennah dos sibarenna, henjurna sipuluh dua mèter janah bekkangna dua mèter. 3Lima rambar kaèn idi kennah ipedemmu gabè sada layar, janah silima rambar nai pè bagi ma mo tong ibakin. 4Bahan mo sangketten ipas kaèn meratah nai i biding layar sidua i, 5terlimapuluh sangketten gennep kirè-kirè. 6Baing ma mo limapuluh kait emmas lako pedemuken sidua layar i asa ndorok ipersada.
7Mahan saong undung-undung idi bahan mo sipuluh sada rambar kaèn ipas buk kambing nai. 8Gennep rambar kennah dos sibarenna, gedangna sipuluh tellu mèter janah bekkangna dua mèter. 9Lima rambar kennah ipedemmu gabè sada layar, janah si ennem rambar nai pè bagi ma mo tong ibakin. Perdemuen si pe-ennemken kennah mo ilempit dua lako menutupi kettan lebbè Undung-undung i. 10Bakin mo limapuluh sangketten ipas biding layar siperlebbè janah limapuluh sangketten i layar peduaken. 11Bahan mo limapuluh kait-kait ipas tembaga nai janah kaitken mi sangketten idi asa ndorok ipersada sidua kirè-kirè idi mahan saong Undung-undung i. 12Sitengah rambar kaèn silebbihna imo mahan tutup kettan podi Undung-undung i. 13Kaèn silebbihna limapuluh sèntimèter nai bellangna mengèkutken geddang Undung-undung i kennah i belli menutupi sisi Undung-undung i.
14Bahan mo dua penutup kettan ruar undung-undung i, sada ipas bebak biri-biri tonggal nai siniubar janah sada nai ipas bebak menipis nai.
15Bahan mo rangka-rangka undung- undung i pènter mi dates ipas kayu sempènur nai. 16Gennep rangka empat mèter datesna janah bekkangna 66 sèntimèter. 17I gennep rangka lot mo dua pasi si mpasang-simpasang, asa ndorok rangka-rangka idi ipedemmu dekket sidèbanna. 18Kettan selatan Undung-undung i, bahan mo duapuluh rangka, 19dekket empatpuluh alasna ipas pirak nai, dua i terruh gennep rangka mi sidua pasina. 20Kettan utara Undung-undung i, bahan mo duapuluh rangka 21dekket empatpuluh alasna ipas pirak nai, dua i terruh gennep rangka. 22I podi Undung-undung i kan kesunduten, bahan mo ennem rangka 23janah dua rangka i gennep sokina. 24Rangka-rangka soki i kennah ipedemmu kan pandakna nai soh mi dates. Rangka si dua sigabè sokina kenah bagi ngo ibakin carana. 25Jadi lot mo ualuh rangka karina dekket sipuluh ennem alas pirak, kerna dua i terruh gennep rangka.
26Bahan mo sipuluh lima sumban ipas kayu sempènur nai, lima i gennep rangka-rangka sada sisi Undung-undung 27lima kan sisi sidèban, janah lima nai kan sisi Undung-undung kettan podi kan kesunduten. 28Pengabin sinitengah Undung-undung i baing datesna sitengah rangka i biding nai mi biding Undung-undung i. 29Rangka dekket sumban Undung-undung idi kennah ilampis dekket emmas. Gellang-gellang lako mengerakut kayu idi pè kennah ipas emmas nai ngo ibakin. 30Pajek mo Undung-undung idi tosè bagè rencana siKupacidah bamu i babo delleng ènda.
31Bahan mo sada kaèn pèntu ipas linen halus nai sinitennun ipas wol meratah, kelabu dekket mbara nai. Okir mo kaèn idi dekket gombaren Kerub. 32Gantung mo kaèn pèntu i mi siempat tihang kayu sempènur si merlampis emmas dekket kait-kait emmas janah ibakin i babo empat alas pirak. 33#Heb. 6:19, 9:3-5 Sangketken mo kaèn idi mi barisen kait-kait silot i saong Undung-undung idi. I podi kaèn idi mo igamparken Pèti Perpadanen sin batu sidua i. Kaèn idi mo gabè kellang-kellang Bilik Simbadia bak Bilik Simbadia kalohon. 34Gamparken mo tutup Pèti Perpadanen i babo pèti i. 35Mèja pemèlèen kennah ibakin i ruar Bilik Simbadia kalohon kan utara, janah nènèh lampu kettan selatan i bagessen Undung-undung idi.
36Bahan mo kirè-kirè mahan pèntu Undung-undung i ipas kaèn linen halus nai sinitennun ipas wol meratah, merham dekket mbara, iokir dekket sulamen. 37Bekkas kirè-kirè idi kennah ibahan mo lima tihang ipas kayu sempènur nai sinilampis dekket emmas, janah ipedemmu dekket silima kait-kait emmas i. Bahan mo lima ngkabuah henjellen ibas tembaga nai bekkas tihang-tihang idi.”
Currently Selected:
2 Musa 26: LAIBTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
