2 Musa 25
25
Pèlèen mi Undung-undung Jahowa
(2 Ms. 35:4-9)
1Idokken Jahowa mo taba si Musa, 2“Dokken mo kalak Israel merembah pèlèen taba Aku. Barang isè lot tergerrek ibas ukurna, kennah iembah pèlèen 3merumang: emmas, pirak dekket suasah; 4kaèn linen halus, kaèn wol meratah, kelabu dekket mbara, kaèn ipas buk kambing nai, 5bebak biri-biri tonggal iubar mbara, bebak menipis, kayu sempènur, 6minak lampu, rempah-rempah mahan minak kerja dekket mahan dahupa baungkus, 7merbagè-bagè batu permata lako itiktikken mi efod deket mahan tutup tenten Imam Huntuen. 8Dokken mo bangsa i memahan sada undung-undung baKu, asa lot bekkasKu merian i tengah-tengah kalak i. 9Kennah bagè rencana sinaing Kubagahken bai ndènè ngo bahanen ndènè undung-undung bak haliuna.”
Pèti Perpadanen
(2 Ms. 37:1-9)
10“Bahan mo sada pèti ibas kayu sempènur nai geddangna 110 cm, bekkang dekket datesna pè ter 66 cm. 11Lampisi mo ibages bak i darat nai dekket emmas tulèn janah baing mo bingkèna ipas emmas nai. 12Bekkas kayu osong-osongna, bahan mo empat gellang emmas janah kaitken mi nèhèna siempat idi, terdua gellang kacimbang lambung. 13Bahan ma mo osong-osongna ipas kayu sempènur nai janah lapisi ma dekket emmas, 14nai pemasuk mo kayu pengosong idi mi bagasen gellangna mi kacimbang lambung biding pèti i. 15Kennah dak tong ngo ibas gellang idi kayu osong-osong idi, janah oda ndorok iagoi. 16Nai bakin mo mi bagasen pèti idi batu pati-patiin si dua i sinaing berrènkenKu taba kènè.
17 #
Rm. 3:25
Bahan mo tutup pèti idi ipas emmas matah nai, geddangna 110 cm janah bekkangna 66 cm. 18Bahan mo dua Kerub ibas emmas sadduren nai, 19sada i gennep punca tutup pèti i. Kennah lekket ngo sidua kerub idi mi tutupna idi, 20janah ibakin pehadep dekket kabengna ngkèrbang i babo pèti i. 21Bakin mo batu sidua i mi bagasen pèti i janah baing mo tutupna i babona. 22I bekkas idi mo Aku pejumpa dekket kono, janah i babo tutupna i nai, i kellang-kellang kerub sidua i, Kuberrèken taba ko pati-patiinKu lako bai bangsa Israel.”
Meja mahan bekkas roti hantaren
(2 Ms. 37:10-16)
23“Bahan mo sada mèja ipas kayu sempènur nai, 88 sèntimèter henjurna, 44 sènti mèter bekkangna dekket datesna 66 sènti mèter. 24Lampis mo idi dekket emmas tulèn janah baing mo bingkèna emmas kuliling. 25Bakin mo biding mèja i 7,5 sèntimèter bellangna, janah baing emmas kuliling bidingna i. 26Bahan mo empat gellang ipas emmas nai, janah bakin mo idi mi siempat soki nènèh mèja i. 27Gellang i mo lako penahan kayu pengosongna asa ndorok iosong mèja idi. 28Kayu pengosong idi pè kennah ipas kayu sempènur nai ngo ibahan janah ilampis dekket emmas. 29Bahan mo pinggan-pinggan, perènumen-perènumen, goci-goci dekket mangkuk-mangkuk mahan bekkas menembahken laè anggur. Karina perkekkas mèja idi kennah i emmas tulèn nai ngo ibakin. 30#3 Ms. 24:5-8 Kennah mo ibakin mèja idi i lebbè Pèti Perpadanen idi, janah i babo mèja idi kennah ngo dak lot hantar roti.”
Nèhè lampu
(2 Ms. 37:17-24)
31“Bahan mo nèhè lampu ipas emmas tulèn nai. Alas dekket cèkèpenna kennah ibahan ipas emmas sadduren nai; bunga-bunga hiasenna, bagi motik dekket bulung bungana, kennah mersada dekket alas bak cèkèpenna i. 32Ipas cèkèpenna i kennah ibakin ennem dangkahna, tellu dangkahna i kacimbang lambung. 33I gennep dangkah kennah ibakin hiasen bagè rumang tellu bunga badem merdengan motik bak bulung bungana. 34I gennep cèkèpenna kennah ibakin hiasen merumangken empat bunga badem merdengan motik bak bulung bungana. 35I terruh gennep pasang dangkahna i kennah ibakin sada motik. 36Karina lampu i dekket motik-motik bak dangkah-dangkahna kennah idakdak ipas sada emmas tulèn nai. 37Bahan mo pitu pelita ipas nèhè lampu i, janah mendè mo bakin asa mi lebbè cangkan cuhayana. 38Bahan mo perkekkas lako pebersihken cumbu lampu i janah talamna pè tong ma ipas emmas tulèn nai. 39Pakè mo tellupuluh lima kilo emmas tulèn mahan nènèh lampu i dekket karina perlengkapenna. 40#Ul. 7:44; Heb. 8:5 Jaga mo asa nènèh lampu idi ibaing tosè bagè siKutuduhken bamu i babo delleng èn.”
Currently Selected:
2 Musa 25: LAIBTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
