2 Musa 24
24
Icapken Perpadanen
1Nai idokken Jahowa nola mo taba si Musa, “Menangkeng mo ko lako menghadep Aku, kono bak si Aron, si Nadap dekket si Abihu, dekket pitupuluh pengulu bangsa i janah sujud mo kènè menembah Aku i sindaoh nai. 2Pelin kono ngo kessa ndorok roh menjolmiti Aku. Sidèbankenna i oda ndorok roh njolmit-njolmit, janah jelma nterrem i tuana oda ndorok mengenangkengi delleng ènda.”
3Nai laus mo si Musa meningtingken taba bangsa i karina perèntah dekket hatoren Jahowa. Nai karina mo kalak i rebbakken mengaloi, “Nggèut ngo kami mengulaken karina sinidokken Jahowa.” 4Enggo kessa i isuratken si Musa mo karina perèntah Jahowa. Sibarembenkenna siceggen, ipajek mo sada langgaten dekket sipuluh dua batu pernèngèten i pispis delleng i; gennep sada batu petandaken sada marga ibas marga Israel nai. 5Nai ipasulak si Musa mo barang piga-piga kalak anak perana, janah ipèlèken kalak i mo pèlèen situtungen bai Jahowa ninganna menèat barang piga-piga lembu mahan pèlèen perdamèen. 6Dèba ibas daroh lembu idi nai ibuat si Musa, janah ibakin mi sambung-sambung. Dèba nai iorèken mo idi mi babo langgaten idi. 7Nai enggo kessa bagi ibuat mo bukku perpadanen sienggo mersurat pati-patiin Jahowa, janah ijakaken mo nggang taba bangsa idi. Nina kalak i mo, “Nggèut ngo kami menguèi Jahowa dekket mengulaken karina siniperèntahkenNa.”
8 #
Mat. 26:28; Mrk. 14:24; Luk. 22:20; 1 Kor. 11:25; Heb. 9:19-20, 10:29 Nai ibuat si Musa mo daroh silot ibas sambung-sambung idi janah ipempis-pisken mo mi babo jelma nterrem. Nina mo, “Daroh èn mo petegguhken perpadanen sinirakut Jahowa dekket kènè merkitèken pati-patiinNa.”
9Kessa i menangkeng mo si Musa, si Aron, si Nadab dekket si Abihu dekket sipitupuluh kalak pengulu mi delleng i, 10janah idah kalak i mo Dèbata Israel cènder i babo sada bekkas bagè sada hatap sinibahan ibas batu nilam nai, janah meratah bagè langit ncihur. 11Idah pengulu Israel i ngo enggo Dèbata, tapi tukasi pè bagidi oda ngo iripasken kalak idi. Enggo kessa i mangan mènum mo kalak idi.
Si Musa i delleng Sinai
12Kessa i idokken Jahowa mo taba si Musa, “Roh mo kono mendahi Aku mi babo ndelleng. I sidi mo Kuberrèken bamu dua batu sikusurat dekket karina pati-patinKu. Karina pati-patiin idi Kuberrèken mahan peddah bai bangsa i.” 13Nai kebbas mo si Musa dekket si Josua pengurupina idi, nai menangkeng mo si Musa mi delleng kebekkasen Jahowa i. 14Enggo kin ngo mertenah si Musa taba pengulu-pengulu Israel, “Pèma kènè mo i perundung-undungen ènda mèma balik kami. Isèn ngo tading si Aron deket si Hur rebbak dekket kènè. Barang isè lot persoalenna, ndorok mo kènè menghadep taba kalak i asa ipeselloh.”
15Inangkengi si Musa mo delleng Sinai, nai mènter isangkemmi simpulguk hembun mo ia. 16-17Sampur mo cuhaya magahken enggo roh Jahowa i babo delleng i, janah kalak Israel mengidah tosè bagè api lakat i babo delleng idi. Ennem ari dekkahna hembun idi dak tong menangkemmi delleng i, janah i ari pepituken, itenggoi Jahowa mo si Musa ibas hembun idi nai. 18#5 Ms. 9:9 Nai inangkengi si Musa mo delleng i janah mbengket ia mi bagessen hembun idi. Empatpuluh ari empatpuluh berngin mo dekkahna si Musa merian i sidi.
Currently Selected:
2 Musa 24: LAIBTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
