2 Musa 17
17
Laè ibas batu mbellen nai
(4 Ms. 20:1-13)
1 #
4 Ms. 20:2-13
Nai enggo kessa i itadingken karina kalak Israel mo padang gurun Sin janah lompat lompat mo kalak i i sada bekkas nai mi bekkas sidèban rembang bagè siniperèntahken Jahowa. Ipas sada tikki merundung-undung mo kalak i i sada bekkas mergerar Rafidim, tapi oda lot laè enumen i bekkas idi. 2Nai ngut-nguten mo kalak i taba si Musa janah nina kalak idi mo, “Berrè bai nami laè mahan ènumen.” Ialoi si Musa mo, “Kasa ngut-nguten kènè janah mengunjuni Jahowa?”
3Tapi kerna muasen kalohon kalak idi, janah dak ngo kalak i ngut-nguten taba si Musa. Nina kalak idi mo, “Kasa kin iarahken kono kami mbungkas i Mesir nai? Otang asa matè muasen ngo keppèken kami, dukak-dukak nami dekket pinakan nami?”
4Nai tenggo-tenggo mo si Musa taba Jahowa, nina mo, “Bakunè mo kubaing taba kalak èn? Tengngen mo, naing ibentiri kalak i ngo aku dekket batu.”
5Idokken Jahowa mo mbang si Musa, “Dilo mo barang piga-piga kalak èkuten, janah rebbak merdalan mo kènè i lebbè bangsa i. Embah ma mo tongket sinipakkèmu lako menampet laè Nil. 6Cènder pè Aku i lebbèmu i babo sada batu mbellen i delleng Sinai. Sampet mo batu i, asa roh laè i batu i nai, asa ndorok kalak idi mènum.” Ibakin si Musa mo bagi ipetengen-tengen èkuten kalak Israel.
7Igerari kalak i mo bekkas idi Masa, kerna i bekkas idi mo kalak Israel mengoji Jahowa sinderrang ikusoken kalak i, “Idengngani Jahowa ngo ndia kita barang oda?” Igerari kalak idi ma ngo bekkas i Meriba, kerna i bekkas idi ngut-nguten kalak Israel.
Perang mengalo kalak Amalek
8Enggo kessa i roh mo kalak Amalek janah menjuhap kalak Israel i Rafidim. 9Nina si Musa mo taba si Josua, “Pilih mo barang piga-piga kalak lako mengalo kalak Amalek. Baremben cènder pè aku i dates sada uruk mencèkèp tongket sinidokken Jahowa mahan embahen.” 10Ibakin si Josua mo bagè siniperèntahken si Musa tabasa. Laus mo ia mengalo kalak Amalek, ninganna si Musa, si Aron dekket si Hur menangkeng mi babo sada uruk. 11Sidekkah ipekèkè si Musa tanganna mi dates mennang mo kalak Israel. Tapi ipelènduk si Musa kessa tanganna, kalak Amalek i mo mennang. 12Kessa sengngal iakap si Musa, ibuat si Aron dekket si Hur mo sada batu asa ndorok kundul si Musa. Cènder mo si Aron dekket si Hur i kambirang dekket kamuhun si Musa lako menongkel tanganna asa dak tong mi dates soh sundut mataniari. 13Dungna talu mo kalak Amalek ibakin si Josua.
14 #
5 Ms. 25:17-19; 1 Sam. 15:2-9 Nina Jahowa mo taba si Musa, “Suratken mo tersèngèt kemenangen ènda asa dak tong ièngèt. Bagahken taba si Josua naing Kuripasken ngo kalak Amalek.” 15Nai ipajek si Musa mo sada langgaten janah igerari “Jahowa ngo tunggulku.” 16Nina si Musa mo, “Cèkèp mo ndates pertanda Jahowa! Jahowa ngo mergeraha mengalo kalak Amalek soh mi sidekkah dekahna.”
Currently Selected:
2 Musa 17: LAIBTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
