2 Musa 16
16
Manna dekket lèto
1Nai berkat mo karina bangsa Israel i Elim nai, janah tupung ari sipuluh lima bulan peduaken enggo kessa kalak i menadingken Mesir, sakat mo kalak idi mi gurun pasir sinikellang-kellang Elim dekket delleng Sinai. 2Sinderrang i gurun pasir idi kalak i ngut-nguten mo kalak i karina taba si Musa dekket si Aron. 3Nina kalak idi mo, “Lotin kin mo nemmuken kami matè i bunuh Jahowa i tanoh Mesir. I sidi simadana mo ndorok rebbak kundul, mangan jukut dekket roti soh bessur. Keppèken ibabai ko nola kami mi sèn asa matè rapar kami karina.”
4 #
Joh. 6:31
Nai nina Jahowa mo taba si Musa, “Bagendari naing Kururus mo pangaen i dates nai merotcè-otcè bagè udan bai ndènè karina. Gennep ari mo kènè kennah pepulungken pangaen i bias pangaen sidari. Merkitè dalan bagi mo Aku naing mengoji bangsangKu asa Kubettoh barang tah burju ma kalak idi menguèi perèntahKu barang oda. 5Tupung ari peenemken, kennah pepulungen kalak i mo pangaen idi dua kali lempit buèna.”
6Nai idokken si Musa dekket si Aron mo taba karina kalak Israel, “Bon èn bet- tohen ndènè mo, Jahowa ngo merembah kènè mbungkas i Mesir nai. 7Baremben ceggen idahen ndènè mo cuhaya pekiroh Jahowa. Idengkoh Jahowa ngo melaga-laga kènè tabasa; uè, taba Jahowa, kerna pellin me- ngulaken kadè siniperèntahkenNa ngo kessa kami. 8Berrènken Jahowa mo bai ndènè jukut tikan cibon, dekket roti mula siceggen asa soh bessur kènè, kerna enggo idengkoh Jahowa melaga-laga kènè tabasa. Situhuna, mula melaga-laga kènè taba kami, melaga taba Jahowa ngo kènè i sidi.”
9Nai enggo kessa i nina si Musa nola mo taba si Aron, “Dokken mo kalak i roh karina menghadep Jahowa, kerna enggo idengkoh ngut-ngut kalak i.” 10Tupung mengerana dèng si Aron taba kalak i karina, itengngen kalak i mo mi padang gurun janah mènter sintempu mo taridah cuhaya Jahowa ibas hembun. 11Nina Jahowa mo taba si Musa, 12“Enggo Kudengkoh ngut-ngut kalak Israel. Bagahken mo taba kalak idi, tupung Ciboen ndorok mo kalak i mangan jukut, janah tupung siceggen mangan roti mo kalak i soh bessur. Nai i bettoh kalak i mo Aku ngo Jahowa, Dèbata kalak i.”
13Tikan Ciboen merrohen mo lèto mbuè kalohon merkolan-kolan sanga isangkemmi karina perundung-undungen i, janah tikan siceggen susur ngo hembun isi kuliling perundung-undungen i. 14Tikan merhuap kessa hembun idi, taridah mo ibabo gurun pasir i lot menipis tosè bagè sisik janah metmet bagè hembun batu. 15#1 Kor. 10:3 Idah kalak Israel kessa mo idi, oda ibettoh kalak idi tah kadè i. Nai mersikusoen mo samah kalak i, “Kadè ngo i?”
Nai nina si Musa mo taba kalak i, “Imo pangaen siniberrèken Jahowa bai ndènè. 16Iperèntahken Jahowa ngo asa gennep kalak i pepulungken sadikè keperluenna, imo terdua sellup gennep mi sada kalak.”
17Nai ibakin kalak Israel mo bagi; tapi lot ma ngo pepulungken lebbih dua sellup bagian sada kalak janah lot ma ngo oda dom nasai. 18#2 Kor. 8:15 Sinderrang isukat kalak i, teridah nola mo kalak sipepulungken mbuè, oda meriba-iba, janah sipepulungken cituk, oda kurangen. Gennep mo pepulungken sadikè siniperlukenna. 19Nina si Musa mo taba kalak i, “Isè poda ndorok memoniken cituk pè ibas pangaen idi nai mahan pangaen baremben.” 20Tapi lot mo barang piga-piga kalak bai kalak idi nai siso menuihken rana si Musa i. Ipennep kalak i mo dèba ibas pangaen idi nai. Keppèken sibarembenkenna i enggo olongen janah mbau pangaen idi; nai melaga mo si Musa taba kalak i. 21Gennep ceggen mo kalak i pepulungken pangaen idi bias mi keperluen kalak i, janah enggo kessa tebenna nggara ari, melala mo pangaen sitadingna deng i tanoh idi.
22Iari pe-enemken, ipepulung kalak i mo pangaen idi dua kali lempit buèna, imo empat sellup mi sada kalak. Karina sime- nguluken kalak i roh lako memagahken tersèngèt misi taba si Musa. 23#2 Ms. 20:8-11 Nina si Musa mo taba kalak i, “Bagèen ngo perèntah Jahowa: Baremben imo ari pentadien, ari Sabat, ari sinipèlèken taba Jahowa. Asa kadè kin sinaing panggangen ndènè ari èn, panggang mo, janah kadè kin sinaing belgangen ndènè, belgang mo. Silebbihna mi keperluen sidari èn, pejaè janah pennep kènè mo i lako mi baremben.” 24Nai ipennep kalak i mo pa- ngaen silebbihna i lako mi sibarembenkenna bagè siniperèntahken si Musa; oda nggèut mbari dekket olongen pangaen idi.
25Nina si Musa, “En mo pangaen ndènè sidari èn, kerna ari ari Sabat ngo ari èn, ari pentadien lako pesangapken Jahowa, janah cituk poda lot jupa kènè pangaen ukum i ruar perundung-undungen. 26Ennem ari mo dekkahna kènè kennah pepulungken pangaen, tapi ukum ari pepituken imo ari pentadien, janah oda lot pangaen susur i babo nai ukum sidari i.”
27Tupung ari pepituken idi, lot mo barang piga-piga kalak Israel naing pepulungken pangaen, tapi kadè poda lot jupa kalak idi. 28Nai nina Jahowa mo taba si Musa, “Soh ndigan kènè oda nggèut menguèi perèntahKu? 29Engèt mo Kuberrèken ngo bai ndènè sidari mahan ari pentadien. Kumerna i ngo asa i ari peenemken Kuberrèken taba kènè pangaen bias mi dua ari. Tupung ari pepituken i karina mo kennah kom i rumah, janah oda ndorok mi ruar.” 30Kumerna idi ngo ari pepituken oda mahan bahaen kalak i.
31 #
4 Ms. 11:7-8
Nai igerari kalak Israel mo pangaen idi manna. Rupana bagè buah lada mbentar kètèk-kètèk janah rasana bagè kue sinitenggolien. 32Nina si Musa mo, “Idokken Jahowa ngo kita memuat kurang lebbih dua sellup manna mahan penneppen bai pemparenta, asa idah kalak i pangaen siniberrèken Jahowa banta i padang gurun sinderrang iarahken kita mbungkas i tanoh Mesir nai.” 33#Heb. 9:4 Nai nina si Musa mo taba si Aron, “Buat mo sada serruam pemasuk mo mi sidi lebbih kurang dua sellup manna janah gamparken mo mi hadeppen Jahowa lako ipennep bai pemparenta.” 34Nai igamparken si Aron mo serruam idi i lebbè Pèti Perpadanen lako penneppen rembang bagè siniperèntahken Jahowa mbang si Musa. 35#Jos. 5:12 Manna idi mo pangaen kalak Israel sidekkah empatpuluh tahun, mema soh kalak idi mi tanoh Kanaan, bekkas kalak i menettap. 36(Sukaten si ncemmal ipakkè kalak idi tikanna i imo sukaten siat-siat duapuluh sellup).
Currently Selected:
2 Musa 16: LAIBTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
