2 Musa 18
18
Ilabat si Jetro si Musa
1Ukum si Jetro, simatua si Musa, imam i Midian, enggo mendengkoh tersèngèt karina sinibakin Jahowa bai si Musa deket bai bangsa Israel, sinderrang iuluken kalak idi mbungkas i Mesir nai. 2#2 Ms. 2:21-22 Nai laus mo si Jetro mengelabat si Musa menaruhken si Zipora, sinibages si Musa si tading dèng kin i Midian, 3#Ul. 7:29 rebbak dekket si Gersom bak si Eliezer, anakna sidua i. Anakna siperlebbè ibaing gerarna si Gersom kerna idokken si Musa, “Kalak si roh ngo aku mi nagerri ndèba”, 4anak sipeduaken igerari si Eliezer, kerna idokken si Musa, “Dèbata sinisembah empungku enggo mengurupi janah paluahken aku asa mak ibunuh raja Mesir aku.” 5Roh mo si Jetro rebbakken dekket sinibages si Musa dekket anakna sidua i mi Padang gurun, bekkas si Musa merkemmah i gembar delleng simbadia i. 6Ibagahken mo bai si Musa enggo roh kalak i, 7mènter mi ruar mo si Musa mendapetken kalak i. Sujud mo ia i lebbè si Jetro janah iemma. Mersikusoen mo kalak idi tersèngèt simasa bai kalak i gennep, nai masuk mo kalak i mi bagasen kemmah si Musa. 8Isukutken si Musa mo taba simatuana idi karina sienggo ibakin Jahowa taba raja dekket bangsa Mesir lako paluahken kalak Israel. Isukutken ma ngo bana tersèngèt kesusahen-kesusahen sinihadeppen bangsa Israel i tengngah ndalan, dekket bakunè cara Jahowa lako paluahken kalak i. 9Lolo ngo ukur si Jetro, mendengkoh karina simasa i, 10janah nina, “Nipoji mo Jahowa sipeluahken kènè ibas tangan raja dekket bangsa Mesir nai! Nipoji mo Jahowa sipaluahken bangsa Israel i perhambaen nai! 11Bagèndari enggo kubettoh Jahowa ngo simbelgahna ibas karina dèbata nai, kerna karinana idi ipehaNa sidang kalak Mesir jukkat kalohon taba bangsa Israel.” 12Kessa i iembah si Jetro mo barang piga-piga matcam pèlèen situtungen bak sisèaten mahan sipèlèenken bai Dèbata. Roh mo si Aron dekket karina situa-tua kalak Israel janah rebbak mangan dekket si Jetro i hadeppen Dèbata.
Ipebangkit si Musa Perhukum
(5 Ms. 1:9-18)
13Si barembenkenna i irungguken si Musa mo perubaten-perubaten samah-samah kalak Israel i. Ndekkah kalohon ngo ulaen idi mulai siceggen nai soh berngin. 14Tikan idah si Jetro karinana ulaen sikennah bahanen si Musa, ikusoken mo, “Kadè ngo dèba sikennah ulankenmu bai bangsa èn? Kennah pellin kono ngo kessa mengulaken i karina, asa pellin mengido peddahmu sambing, kennah dak jerjer kalak idi isèn mulai siceggen nai soh berngin?”
15Ialoi si Musa mo, “Roh kalak idi mendahi aku asa ibettoh ngo sinikelemoken Dèbata. 16Mula merselisih kalak i, roh ngo kalak i mendahi aku, asa kutimbang perkara kalak i, janah kupesakat taba kalak i perèntah dekket hukum-hukum Dèbata.”
17Idokken si Jetro mo, “Oda selloh bagi. 18Mengelejai dirimu dekket kalak i ngo ko mula bagi ibakin ko mbang jelma nterrem i. Enggo mbuèsu bagi ulaen bai sada kalak. 19Dengkohken mo peddahku, janah asa iurupi Dèbata ko. Situhuna selloh ngo kono sikira gancih bangsa èn i hadeppen Dèbata dekket merembah persoalen kalak idi tabasa. 20Kennah ajarenken ndènè ngo taba kalak idi peddah Dèbata dekket peterangken bakunè cara asa merandal dekket kadè sipatut ulanken kalak i. 21Tapi adumna i kennah pilih kènè ngo barang piga-piga kalak anak laki kalak bijak, janah pebangkitken kalak i gabè menguluken seribu kalak, seratus kalak, limapuluh kalak, dekket sipuluh kalak. Naing mo nemmuken kalak i simerkebiaren dekket kalak simerpenguèi taba Jahowa, kettoken janah siso nggèut menjalo kèpèng sisip. 22Dokken mo kalak i gabè perhukum bai bangsa èn, gennep mi lunggukna. Kenah bahaenken kalak i ngo ulaen i meratur. Nasa perkara-perkara mbellen ndorok mo ipesakat taba kè, tapi ukum perubaten cituk ngo ndorok mo kalak i sambing lako peliasken i. Penahangken ulaen ndènè ngono idi kerna enggo dekket kalak idi mertanggung jabab. 23Mula bagidi ibakin kènè, janah bagidi iperèntahken Dèbata taba kè, sanggup mo kè mahan bahaen ndènè, janah karina mo kalak balik ibagasen sennang penarihen kerna ndorok ndor dung persoalen kalak idi.”
24Iuèi si Musa mo peddah si Jetro idi, 25janah ipilih mo kalak bijak i tengah-tengah bangsa Israel nai. Ipebangkit mo kalak simenguluken seribu kalak, seratus kalak, limapuluh kalak, dekket mi sipuluh kalak. 26Iulaken kalak idi mo ulaenna bagè perhukum taba bangsa Israel. Persoalen-persoalen mberrat ipesakat kalak idi mo taba si Musa, tapi ukum rubat-rubat cituk sambing ngo kalak idi mo peturèken. 27Enggo kessa i ipeberkat si Musa mo si Jetro laus janah balik mo si Jetro mi nagerrina.
Currently Selected:
2 Musa 18: LAIBTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
