2 Musa 14
14
Meneberangi laut Gelagah
1Nai enggo kessa bagi nina Jahowa nola mo taba si Musa, 2“Dokken mo kalak Israel balik janah merundung-undung i lebbè kuta Pi-Hahirot i kellang-kellang kuta Migdol dekket laut Gelagah, ndessing mi kuta Baal-Zefon. 3Kerna dok atè raja Mesir kadap ngo kalak Israel i mengadangi nagerri èn janah laling i padang gurun. 4Kubaing mo mpihir ukurna asa ijalang nola kènè. Tapi Kupacidah mo kuasangKu taba raja Mesir idi dekket mi soridaduna, janah asa ibettoh kalak i Aku ngo Jahowa.” Nai ibakin kalak Israel mo bagè siniperèntahken Jahowa taba kalak i.
5Idengkoh raja Mesir kessa mo enggo mperrus bangsa Israel peselsel mo ia dekket karina pugabèna janah nina kalak i mo, “Bakunè nola mo sibakin? Kasa sibelli laus kalak Israel i gabè maknè lot hambanta?” 6Nai mènter mo ikebbasi raja i kurèta perang dekket tenterrana. 7Berkat mo ia rasken karina kuretana dekket 600 kurèta simahantuna, sinipakkè pakalima-pakalimana. 8Ai enggo ibaing Jahowa mpihir ukur raja i, nai iletlet mo kalak Israel situpung i perdalanen menadingken nagerri i ibas penjamotien Jahowa. 9Soridadu kalak Mesir dekket karina kuda deket kurèta bak simengkundulisa, roh menjalang kalak Israel, janah mengayak kalak i mi bekkas perundung-undungen kalaki i biding laut ndessing mi kuta Pi-Hahirot.
10Kessa mo idah kalak Israel raja Mesir dekket soridaduna roh, buradan kalohon mo kalak i janah tenggo-tenggo taba Jahowa mengido tolong. 11Nina kalak i mo taba si Musa, “Tah oda lot pendèbaen ngo i Mesir katèmu asa iarak kono kami lako matè i bekkas èn? Idah mo pengenna ulah-ulah men! 12Sinderrangna i pè i tanoh Mesir dèng enggo kudokken kami kennah bagèn ngo jadina! Enggo pè kudessak kami ko asa dak ulang nè lolahenmu kami, tapi asa belli kami tong gabè hamba i Mesir. Dolien mo kami hamba i sidi daripada matè i padang gurun enda!”
13Ialoi si Musa mo, “Ulang kè mbiar! Nono mo kè. Idahen ndènè mo barang kadè sinaing bakinen Jahowa lako paluahken kènè. Kalak Mesir siniidah ndènè bagèndari, oda idahen ndènè nèngè i. 14Jahowa ngo juhap mengkepkep kè, janah oda pella perlu kènè memaing barang kadè.”
15Idokken Jahowa mo taba si Musa, “Kasa kono mersurak mengido tolong? Dokken mo kalak Israel terrus merdalan! 16Pekèkè mo tongketmu mi babo, janah pekustang i babo laut. Nai bellah dua mo laè i janah ndorok mo bangsa Israel meneberangi laut i merdalan arap tanoh sienggo ngkerrah i. 17BakinenKu mo mpihir ukur kalak Mesir i asa dak terrus iletlet kalak Israel, nai Kupacidah mo kuasangKu bai raja Mesir, soridaduna dekket bai kurèta bak simemasangsa pè. 18Asa ibettoh kalak Mesir, Aku ngo Jahowa.”
19Nai lompat mo malaèkat Dèbata i lebbè nuhnuhen kalak Israel nai mi podi. Janah lompat ma mo dekket hembun sijengjeng i gabè 20mi kellang-kellang nuhnuhen kalak Mesir dekket nuhnuhen kalak Israel. Gellap mo ibakin hembun idi, gabè suntuk bernginna i oda ndorok mersijolmiten duana rombongen idi.
21Nai ipekustang si Musa mo tanganna mi babo laut i, janah ibakin Jahowa mo mengembus angin kebincaren ndor kalohon nai sondar mo laè laut idi. Terrus bernginna i mo angin i mengembus, janah mengobah laut i gabè tanoh ngkerrah. 22#1 Kor. 10:1-2; Heb. 11:29 Nai bagi dua mo laè idi, janah tikan meneberangi laut kalak Israel, merdalan i tanoh sienggo ngkerrah i mo kalak idi, janah bagè lingling mo idahen laè i kacimbang lambung. 23Kalak Mesir dekket karina kuda, kurèta dekket simengkunduli terrus menjalang janah mengayaki kalak Israel mi tengah laut. 24Mayak siceggen menatap mo Jahowa ibas tihang api dekket hembun idi nai dempak soridadu Mesir janah isompar-baèrken mo kalak idi. 25Merletceppen mo daling kurèta kalak idi ibakin, gabè mahal kalohon mo iakap kalak i merdalan. Nina kalak Mesir mo, “Jahowa ngo merjuhap dengngan kalak Israel mengalo kita. Ita kènè mo mperrus isèn nai.”
26Nai nina Jahowa mo taba si Musa, “Pekustang mo tanganmu mi babo laut, asa balik laè idi, janah mengeremrem kalak Mesir, kurèta-kurèta dekket simengkundulisa.” 27Nai ipekustang si Musa mo tanganna mi babo laut i janah enggo kessa langat, mulak mo laè i bagè sienggona kin. Iusahaken kalak Mesir idi ngo paluahken dirina, tapi ilennengken Jahowa mo kalak i mi laut i. 28Merbalik mo laè laut i menungkupi kurèta-kurèta, simengkunduli, dekket karina soridadu Mesir simenjalang kalak Israel mi tengah laut i, nai matè mo kalak idi karina. 29Tapi sinderrang menurèpari laut i kalak Israel merdalan mo kalak i tarap terruh landas ibas tanoh sienggo ngkerrah i janah laè i tosè bagè lingling kacimbang lambung kalak i.
30Ibas arinkenna i mo ipaluah Jahowa bangsa Israel ibas penjuhap kalak Mesir nai, janah idah kalak i mo bangkè-bangkè kalak Mesir ibursakken mergamparen i biding laut i. 31Idah kalak Israel kessa mo bakunè Jahowa menaluken kalak Mesir merkitè kuasaNa mahantu i, bengngap kalohon mo kalak i, gabè percaya mo baNa deket bai si Musa, naposona i.
Currently Selected:
2 Musa 14: LAIBTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
