2 Musa 13
13
Pèlèen anak situaen
1Idokken Jahowa nola mo taba si Musa, 2#4 Ms. 3:12-13; Luk. 2:23 “Pèlèken mo karina anak situaen bangKu. Gennep anak situaen Israel, dekket gennep pinakan tonggal siperjolo tubuh, Aku ngo sidasa i.”
Pèsta Roti siso Meragi
3Nina si Musa mo taba bangsa Israel, “I ari sidari èn ipaluah Jahowa mo kènè, merkitè kuasa mahantu, gabè ndorok mo kènè mbungkas i tanoh Mesir nai, bekkas ndènè iperhamba idi. Kumerna i bakin kènè mo pernèngèten ari èn. Ulang mo pangan kènè roti meragi. 4Ibas ari sidari èn ari sada bulan Abib barang bulan sada, tadingenken ndènè mo nagerri Mesir. 5Merkitè bulaban ijandiken Jahowa ngo taba empung ndènè lako memerèken bai ndènè nagerri bangsa Kanaan, Het, Amon, Hewi dekket Jebusi. Enggo kessa iembah Jahowa kènè mi nagerri bèak janah nggabur idi, gennep tahun i bulan Abib, kennah mo pèstanken ndènè ari pernèngèten èn. 6Pitu ari mo dekkahna kènè kennah kipangan roti siso meragi, janah ibas ari pepituken kennah mo petupaen ndènè pèsta lako pesangapken Jahowa. 7Ibagasen sipitu ari i, oda ndorok kènè kipangan roti meragi janah karina nagerri ndènè oda ndorok lot ragi bagi ma barang kadè sambing simerragi.
8Ibas pertebenaen pèsta idi kennah mo kènè menukutken taba gennep dukak ndènè daholi magahken iulaken kènè pè karina idi imo kumerna karina sienggo ibaing Jahowa taba kènè sinderrang itadingken kènè tanoh Mesir. 9Pèsta ènda mo lako pesèngètken taba kènè sikira tanda sinièketken i tangan barang i perdempaken ndènè. Pèsta ènda ma mo pesèngètken taba kènè asa dak tong mengeruapken dekket mengguruken Pati-patiin Jahowa, kerna enggo ipaluah Jahowa kènè i tanoh Mesir nai merkitè kuasaNa simbelgah i. 10Pèstaken mo pèsta ènda gennep tahun ibas ari sienggo itentuken.”
Dukak situaen
11Nai idokken si Musa mo taba bangsa Israel, “Itaruhken Jahowa ngo kènè mi nagerri Kanaan sinijanjikenNa i merkitè bulaban bai ndènè dekket empung ndènè. Enggo kessa gabè milik ndènè tanoh idi, 12#Luk. 2:23 kennah ngo sembahenken ndènè gennep anak daholi buka baju deket karina pinakan tonggal siperlebbè tubuh. Karina i Jahowa ngo sidasa, 13tapi ukum nasa kalodè tonggal siperlebbè tubuh kennah itebbus bai Jahowa nai merkitè memèlèken sada anak biri-biri mahan gancihna. Mula oda kènè nggèut menebbus kalodè idi, kennah ibohokken mo kerahongna. Gennep dukak ndènè daholi siperlebbè tubuh kennah ngo itebbus. 14Mula roh dukak-dukak ndènè mengkusoken i podi ari kadè ngo lapatenna i karina, kennah bagèen ngo jabab ndènè, ‘Merkitè kuasa mbellen iembah Jahowa ngo kita mbungkas i tanoh Mesir nai, bekkasta kin iperhamba. 15Sinderrang ipepihir raja Mesir ukurna janah oda padiatken kita laus, ibunuh Jahowa mo gennep anak situaen i Mesir, anak jelma bang anak pinakan pè. Kumerna i ngo kita asa memèlèken bai Jahowa gennep pinakan tonggal siperlebbè tubuh, tapi tebbusenta mo gennep anakta situaen.’ 16Kecemmalen idi mo gabè sèngèt-sèngèt banta sikira tanda sinirakutken ibas tangan dekket perdempakenta. Merkitè bagi mo kita dak tong ipesèngètken magahken enggo ipaluah Jahowa kita i tanoh Mesir nai merkitè kuasana simbelgah i.”
Hembun dekket api
17Enggo kessa ipadiat raja Mesir bangsa Israel laus oda ngo tarap dalan mengelausi nagerri Palistin kalak idi iembah Dèbata, tukasi pè tarap i ngo dalan sinjolmitna. Dok atè Dèbata, “Ulang-ulang gabè peselsel nola kalak i mula idah kennah merperang kalak i, nai mènter balik nola mi tanoh Mesir.” 18Kumarna i iembah Jahowa mo kalak i merèluk tarap padang gurun menuju laut Gelagah. Tikan menadingken nagerri Mesir, mersenjata ngo kalak Israel tosè bagè lako mergeraha.
19 #
1 Ms. 50:25; Jos. 24:32 Iembah si Musa ngo tulan-tulan si Josep, kerna sinderrang i nggelluhna dèng idokken si Josep ngo kalak Israel merbulaban asa ibakin bagi. Bagèen ngo tennah si Josep, “Tikan ipaluah Jahowa kènè, kennah embahen ndènè ngo bangkèngku i bekkas ènda nai.”
20Nai itadingken kalak Israel mo kuta Sukot janah laus nola mo kalak i merundung-undung mi kuta Etam, i biding padang gurun. 21Tikan mahar merdalan ngo Jahowa i lebbè kalak i ibagasen tihang hembun janah mula tikan berngin ia mo i lebbè kalak idi ibagasen tihang api lako petuduhken dalan. Merkitè bagi ndorok mo kalak i merdalan mahar dekket berngin. 22Suntuk ari dak i lebbè bangsa i ngo hembun i janah suntuk berngin tihang api mendengani kalak idi.
Currently Selected:
2 Musa 13: LAIBTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
