2 Musa 12
12
Pèsta Paskah
1 #
3 Ms. 23:5; 4 Ms. 9:1-5, 28:16; 5 Ms. 16:1-2 Nai mengerana mo Jahowa taba si Musa dekket si Aron i tanoh Mesir. Nina mo, 2“Bulan èn mo gabè bulan pekesada ibas ari penanggalen ndènè. 3Bagahken mo perèntah èn taba karina bangsa Israel: i ari sipuluh bulan èn, gennep anak laki kennah menèat sada biri-biri mahan pangaen kalak i si sada jabu. 4Mula cituksu bilangen kalak i sada jabu lako mengkeriken sada anak biri-biri, ndorok mo sisada jabu i rebbak dekket gembar sapona kipangan anak biri-biri i. Kennah ibagi ngo jukut biri-biri i rembang mi bilangen si mangan i. 5Ndorok ngo pilihen ndènè biri-biri barang pè kambing tapi kennah tonggal mo, janah oda lot tikasna. 6Kennah piara kènè ngo i soh mi ari sipuluh empat. Tupung ari i, cibonna, karina bangsa Israel kennah menèat anak biri-biri i. 7Dalisken kènè mo cituk darohna i mi duana tihang pèntu dekket mi tekkang pèntu bages bekkas kalak i kipangan biri-biri i. 8Bernginkenna i kennah i panggang ngo jukut i janah ipangan merdengan roroh mpagit dekket roti siso meragi. 9Kennah bolet ipanggang anak biri-biri i, i si dekket takalna, nènèhna dekket bitukana. Pangan kènè mo jukut sienggo ipanggang idi, ulang lot kipangan matah barang ibelgang. 10Ulang lot ahanken kènè gulè i cituk pè soh siceggen; mula lot dèng tading, kennah i tutung ngo i kerri. 11Tikan mangan idi kennah mo enggo merpakèen kènè lako berkat mi perdalanen, solop i nènèh dekket tongket i tangan. Kennah sudu kènè mangan. Imo Pèsta Paskah lako pesangapken Aku, Jahowa.
12Bernginna i agahenKu mo karina tanoh Mesir, janah memunuh karina anak situaen, jelma bang pinakan pè. HukumenKu mo karina dèbata silot i tanoh Mesir, kerna Aku ngo Jahowa. 13Daroh silot i pèntu bages ndènè imo gabè tanda gennep sapo siniianen ndènè. Mula enggo Kuidah daroh idi, lausenKu mono kènè janah oda Kubinasaken sinderrang menghukum kalak Mesir idi Aku. 14#2 Ms. 23:15, 34:18; 3 Ms. 23:6-8; 4 Ms. 28:17-25; 5 Ms. 16:3-8 Asa kennah pestanken ndènè ngo ari idi gabè ari pèsta pernèngèten bai Jahowa. Kennah pèstaken kènè ari i gennep tahun.”
Pèsta Roti siso Meragi
15Nina Jahowa mo, “Pitu ari dekkahna oda ndorok kènè kipangan roti meragi. Ibas ari perlebbè karina ragi kennah agoi kènè i bages ndènè nai, kerna ibas sidekkah pitu ari i barang isè kalak kipangan roti meragi, oda ètongen nèngè ia bilangen bangsangKu. 16I ari perlebbè, dekket i ari pepituken, kennah ngo kènè pulung lako mersembah. Oda ndorok kènè mahan bahaan kadè pè ibas sidari i, laènken mertasak pangaan sambing. 17Tupung ari i mo Kuarak karina bangsamu i tanoh Mesir nai. Kumerna i mi podinkenna èn, gennep tahun, kennah mo pèstanken ndènè i mahan pernèngèten. 18-20I bulan perlebbè, mulai ari sipuluh empat berngin, soh mi ari duapuluh sada berngin, oda ndorok kènè mangan roti meragi. Sidekkah sipitu ari i, karina ragi kennah iagoi i sapo ndènè nai. Kalak Israel barang kalak sidèban sikipangan roti meragi sidekkah pèsta i, oda nè ètongen bilangen bangsangKu.”
Paskah Perlebbè
21Idiloi si Musa mo karina pengulu kalak Israel janah idokken taba kalak i, “Berkat mo kènè janah gennep jabu mo kènè memuat sada anak biri-biri mahan haliu mi Pèsta Paskah. 22Buat mo sada rakuten hysop, sornepken mo mi bagasen sambung simerisi daroh biri-biri i, nai dalisken mo mi duana tihang pèntu dekket tekkang pèntu bages ndènè. Soh mi siceggen ulang lot sada kalak pè ibas kènè nai menadingken sapo. 23#Heb. 11:28 Sinderrang iagahi Jahowa nagerri èn lako memunuh kalak Mesir, idah Jahowa mo daroh ipas sidua tihang pèntu dekket i tekkang pèntu bages ndènè; nai ilausi sambing mo i, janah oda padiatenNa malaèkat Maut memengketti bages ndènè lako memunuh kènè. 24Kènè dekket karina dukak-dukak ndènè, kennah menguèi perèntah idi soh mi sidekkah-dekkahna. 25Mula enggo ibengketti kènè nagerri sienggo iperbagah Jahowa bai ndènè kennah ngo bakinen ndènè pèsta pernèngèten ènda. 26Mula ikusoken dukak-dukak ndènè, ‘Kadè ngo lapaten pèsta èn?’ 27Kennah mo aloi kènè, ‘En mo pèlèen Paskah lako pesangapken Jahowa, kerna ilausi ngo gennep sapo kalak Israel i Mesir, tikan ibunuh gennep anak situaen kalak Mesir, janah kita ibelli ngo nggelluh!’ ”
Nai sujud mo kalak Israel, janah mersembah. 28Nai laus mo kalak i mengulaken bagè siniperèntahken Jahowa taba si Musa dekket si Aron.
Ibunuh karina anak situaen
29 #
2 Ms. 4:22-31
Tengah bernginna i ibunuh Jahowa mo karina anak situaen bangsa Mesir, mulai anak raja i nai, soh anak kalak sikurungen ibas kurungen. Karina pinakan siperlebbè tubuh pè ibunuh ngo. 30Asa bernginkenna i, merndungoen mo raja, dekket pugabè bak karina kalak Mesir. Terdengkoh mo sora derru-derru nggang kalohon i suberri nagerri Mesir sada bages pè oda lot siso kepatèen anak. 31Ibas bernginkenna i ma, idilo raja i mo si Musa dekket si Aron janah idokken, “Laus mo kènè karina i sèn nai! Tadingken kènè mo nagerringku èn! Laus mo kènè menembah Dèbata ndènè bagè sinipidoken ndènè i. 32Embah kènè mo karina, lembu, biri-biri dekket kambing ndènè, janah berkat mo kènè. Pidoken ma mo pasu-pasu lako bangku!”
33Idessak kalak Mesir mo kalak Israel asa ndor lako menadingken nagerri i. Nina kalak i mo, “Matè mo kami karina mula oda kènè laus!” 34Nai ibuati kalak Israel mo panci-panci kalak i simerisi topong roti sienggo igaru siso meragi, itukkus mo dekket gedda, janah iembah. 35#2 Ms. 3:21-22 Ninganna enggo kin ma ngo ibakin kalak i bagè sienggo idokken si Musa, imo mengido emmas dekket pirak dekket pakkèen bai kalak Mesir nai. 36Ibakin Jahowa mo gabè meluh atè kalak Mesir taba kalak Israel, gabè ipemberrèken kalak i mo karina sinipengido kalak Israel. Bagi mo carana kalak Israel merembah kinibèak kalak Mesir mbungkas i nagerri idi nai.
Kalak Israel menadingken tanoh Mesir
37Nai berkat mo kalak Israel janah merdalan nènèh i kuta Raamses nai mi kuta Sukot. Buè kalak idi 600.000 kalak, oda engket ibilang daberru dekket anak-anak. 38Iembah kalak i ngo mbuè, lembu, biri-biri dekket kambing. Nterrem ma ngo bilangen kalak sidèban dekket. 39Itutung kalak i mo roti siso meragi ibas topong sienggo icampur kin siniembah kalak idi i Mesir nai. Sintempu ngo kalak i ipellaus i tanoh Mesir nai, gabè oda sanga mèmaken bekkel.
40 #
1 Ms. 15:13; Gal. 3:17 Enggo mo 430 tahun dekkahna bangsa Israel merian i tanoh Mesir. 41Iari perpodi tahun pe 430 ken i, karina rombongen bangsa Jahowa menadingken tanoh Mesir. 42Bernginna idi Jahowa ngo dak menjamoti kalak i, lako menaruhken kalak i mbungkas i Mesir nai. Janah i ma mo berngin soh mi podi ari ipèlèken bai Jahowa mahan berngin pernèngèten. Ipas berngin idi kennah ngo bangsa Israel dak tong ndungo merjaga-jaga.
Hatoren tersèngèt Pèsta Paskah
43Nai nina Jahowa nola mo taba si Musa dekket si Aron, “En mo hatoren tersèngèt Pesta Paskah. Kalak sidèban oda ndorok kipangan jukut biri-biri sinipèlèken tupung ari Paskah. 44Tapi hamba sinitokor ndènè ndorok ngo dekket kipangan mula enggo ia isittak. 45Kalak siroh barang kalak gajien oda ndorok kipangan i. 46#4 Ms. 9:12; Joh. 19:36 Karina jukut biri-biri i kennah ibagasen sapo ngo ipangan, janah oda ndorok iembah mi ruar. Ulang ipenggel sada pè ibas tulanna nai. 47Karina bangsa Israel kennah memèstaken kerja i. 48Kalak siso itakkil oda ndorok kipangan pangaen pèsta i. Mula lot kalak sidèban sienggo menettap dekket kènè naing dok atèna memèstaken Paskah i lako pesangapken Aku, Jahowa, karina anak laki simpangansa kennah lebbèken itakkil. Enggo kessa bagi ètongen mo kalak i dos bagè kalak Israel asli, janah ndorok engket mer-Pèsta Paskah. 49Dos mo hatoren i merlakku taba kalak Israel asli dekket taba kalak sidèban sienggo menettap itengah-tengah ndènè.” 50Karina ngo kalak Israel menguèi janah mengu- laken karina siniperèntahken Jahowa taba si Musa dekket si Aron. 51Tupung arinkenna i iembah Jahowa mo karina bangsa Israel mbungkas i tanoh Mesir nai.
Currently Selected:
2 Musa 12: LAIBTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
