5 Musa 4
4
Si Musa mendasdas Israel asa dak merpenguèi
1Nai nina si Musa mo taba bangsa i, “Uèi kènè mo karina pati-patiin sikuajarken bai ndènè, asa ndorok kènè nggelluh sakat mengiani tanoh sinaing iberèken Jahowa Dèbata empung ndènè, bai ndènè. 2#Alm. 22:18-19 Barang kadè sikuperèntahken, cituk pè ulang itambahi barang ikurangi. Uèi kènè mo karina perèntah Jahowa Dèbata ndènè sikuberèken bai ndè. 3#4 Ms. 25:1-9 Idah kènè sendiri ngo barang bakunè ibakin Jahowa Dèbata ndènè i Delleng Peor. Barang isè menembah Baal i bekkas idi iripasken ngo, 4tapi ukum kènè si dak tong setia bai Jahowa Dèbata ndènè tong dèng ngo nggelluh soh bagèndari.
5Karina patiin idi kuajarken bai ndènè bagè siniperèntahken Jahowa Dèbatangku. Uèi kènè mo karina idi i nagerri sinaing bengketten dekket ianen ndènè idi. 6Ulaken kènè mo idi ibagasen setia. Mula bagidi ngo ibakin kènè, gabè ntarar mo kepantasen ndènè idah bangsa-bangsa sidèban. Mula idengkoh kalak i tersèngèt pati-patiin, dokenken kalak idi mo, ‘Sondel ngo pantas bak cerdikna bangsa mbellen idi.’
7Bangsa mbellen pai ma mo lot dèbata bagidi njolmitna mula iperluken bagè Jahowa Dèbatanta njolmit banta? Ialoi ngo kita barang cidahari sambing kita dilo-dilo mengido pengurupien tabaSa. 8Janah bangsa mbellen pai ma mo lot pati-patiinna bagidi adilna bagè pati-patiin sikuajarken bai ndènè sidari èn? 9Perdatèken janah èngèt mo mendè, asa ulang lupa kènè sidekkah nggelluh tersèngèt kadè sienggo isaksiken kènè sendiri. Sukutken mo i bai pinempar ndènè, 10tersèngèt ari idi, sinderrangna cènder kènè i hadeppen Jahowa Dèbata ndènè i Delleng Sinai. Tikanna idi nina ngo taba aku, ‘Pepulung mo bangsa idi. Naing ngo dok atèngKu idengkoh kalak i kadè sinaing Kudokken, asa terajar kalak i menguèi baKu sidekkah nggelluhna, janah asa iajari kalak i ma dukak-dukakna asa merpenguèi baKu.’
11 #
2 Ms. 19:16-18; Heb. 12:18-19 Sukutken mo bai dukak-dukak ndènè barang bakunè cara ndènè soh janah jengjeng i pispis delleng sinisangkemmi cember gellap bagè hembun ngkapal janah apina mergollahgollah soh mi langit. 12Nai mongkam mo Jahowa i api idi nai janah idengkoh kènè ngo soraNa, tapi oda idah kènè rupaNa barang bakunè. 13#2 Ms. 31:18 I sidi mo ibagahken bai ndènè kadè sikennah ulaenken ndènè lako pesautken padan sinibaingNa dekket kènè. Sipuluh pati-patiin sienggo isuratken ipas dua batu lei i kennah ulaenken ndènè. 14#2 Ms. 21:1 Idokken Jahowa ngo aku lako mengajarken bai ndènè karina pati-patiin sikennah uèen ndè i nagerri sinaing bengketten dekket ianen ndènè idi i podien èn.”
Sipesèngèt asa ulang menembah dèbata sidèban
15“Èngèt kènè mo seppè! Tikanna mengerana Jahowa bai ndènè ibagasen api i nai i Delleng Sinai, oda ngo lot idah kènè barang kadè. 16#2 Ms. 20:4; 3 Ms. 26:1; 5 Ms. 5:8, 27:15 Jadi jaga mo asa ulang sanga gabè merdosa kènè kumerna ibahan kènè bai ndènè gana-ganaen mahan sembahen, barang bakunè pè rumangna, tah daholi barang pè daberru, 17-18#Rm. 1:23 manuk-manuk barang ikan, binatang menjoror barang pè binatang sidèbankenna i. 19Ulang kènè merdosa kumerna mersembah bak merpenguèi taba barang kadè siniidah ndènè i langit: mataniari, bulan bang bintang. Ibelli Jahowa Dèbata ndènè ngo bangsa sidèban i menembah sibagidi. 20#2 Ms. 19:5; 5 Ms. 7:6, 14:2, 26:18; Tit. 2:14; 1 Ptr. 2:9 Tapi ukum kènè bangsa sinipaluahNa ngo i Mesir nai, bekkas ndènè ndersa kalohon ipacik. Iarak ngo kènè mbungkas i nagerri idi nai, asa gabè bangsaNa sendiri bagè siniakapken ndènè bagèndari.
21 #
4 Ms. 20:12
Tapi gabè melaga ngo Jahowa Dèbata ndènè taba aku kumernaken kènè, janah isumpahken ngo magahken oda ndorok kuseberangi Laè Jordan lako mbengket mi tanoh nggabur sinaing berènkenNa bai ndènè. 22Oda ndekkah nèngè naing turèpar mo kènè janah mengiani tanoh nggabur i, tapi ukum aku oda ngo dekket, kerna matè nè mo aku i sèn. 23Engèt kènè mo seppè. Ulang kè lupa meradepken padan sienggo ibaing Jahowa Dèbata ndènè dekket kènè. Uèi kènè mo perèntahNa; ulang cuba-cuba kènè mahan gana-gana bai ndènè barang bakunè pè rumangna lako man sem- bahen, 24#Heb. 12:29 kumerna bagè api mengelekkup ngo Jahowa Dèbata ndènè i. Oda uè Ia ipecodi mi barang kadè pè.
25Bagidi ma mula enggo ndekkah kènè merian i nagerri idi janah enggo meppar, ulang kè merdosa kumerna memahan gana-gana bai ndènè sendiri merumangken kadè pè i. Ulah-ulah jahat ngo sibagidi ipenengennen Jahowa Dèbata ndènè janah memaingken melaga Ia. 26Katerra pè gabè saksi mo sidari èn langit dekket tanoh magahken mula oda merpenguèi kènè taba aku, sintempu mo kènè ripput ibas tanoh sini- ianen ndènè nai i kèpar Laè Jordan idi, ndor ngo kènè mpur-pur i tanoh sini-ianen ndènè i kèparen Laè Jordan i. Oda sanga ndekkah kènè merian i sidi, gabè iripasken ngo kènè. 27#5 Ms. 28:36 Mambur mèrap mo kènè ibaing Jahowa i tengah-tengah bangsa sidèban janah pellin cituk nai ngo kènè kessa tong nggelluh. 28I sidi mo kènè gabè mersembah taba dèbata-dèbata sinitukkangen tangan jelma, dèbata-dèbata ipas kayu nai, dekket batu siso merpendidah barang pè mendengkoh, oda ndorok mangan barang pè menganggoh. 29#Jer. 29:13 Nai itulusi kènè nola mo Jahowa Dèbata ndènè, janah mula itulusi kènè ngo Ia ibas nasa ukur ndènè nai, jumpa kènè mono Ia. 30Mula sempa kessa bai ndènè karina jèkat idi janah ibagasen tersessak kènè, nai balik nola mo kènè taba Jahowa Dèbata ndènè janah menguèi baNa. 31Dèbata permasèh atè kalohon ngo ukum Jahowa Dèbata ndènè i. Oda ngo itadingken barang ripasenkenNa kènè, barang pè kilupaken perpadanen sinibahanNa sendiri dekket empung ndènè.
32Datèken kènè mo tikki sienggo laus, simasa sinderrang mak dèng kènè tubuh, mulai i ari tikan itempa Dèbata jelma i tanoh ènda. Tulusi mo i suberri tanoh èn. Nung ngo masa bagi mehejina ilebbènkena i? Nung ma ngo lot idengkoh dèba tersèngèt simasa bagidi? 33Nung ma ngo lot tong dèng nggelluh sada bangsa enggo kessa idengkoh mengerana dèbata taba kalak i ibas api nai, bagè siniakapen ndènè? 34Nung ngo lot idah kè dèbata sidèban pang mengerampasi sada bangsa ibas bangsa-bangsa silotna i nai ibaing nola kalak i gabè bangsana sendiri, bagè sinibaing Jahowa Dèbata ndènè bai ndè i Mesir? Idah kènè sendiri ngo tangkas barang bakunè cara Dèbata merkitè kegegohenna simeheji i, perohken wabba dekket geraha, menghanaken kelengangen-kelengangen dekket mahanken simahantu. 35#Mrk. 12:32 Karinana idi ipetarar Jahowa bai ndènè lako mengindangken magahken pellin Jahowa idi ngo kessa Dèbata, oda lot nèngè sidèban. 36I langit nai ipedengkohken soraNa bai ndènè lako memernoi kènè; i dunia èn enggo ipacidah apiNa simahantu i bai ndènè, janah ibas api idi nai mengerana Ia taba kènè. 37Kumerna ikekelengi ngo empung ndènè, asa enggo ipilih kènè; merkitè kuasaNa simbelgah idi enggo iarak kènè mbungkas i Mesir nai. 38Bangsa-bangsa terbelgahen janah mergegohen bai ndènè nai ipelaus i haeppen ndènè nai, lako menaruhken kènè mi nagerri kalak idi siniberèkenNa bai ndènè, nagerri sienggo gabè milik ndènè bagèndari. 39Kumernana i satdar mo kènè sidari èn janah ulang lupa: Pellin Jahowa ngo kessa Dèbata i langit dekket i tanoh èn; oda lot nè sidèban. 40Uèi kènè mo karina patiin sikuberèken bai ndènè sidari èn, asa sennang kènè dekket pinempar ndènè janah asa tong nggelluh i nagerri siniberèken Jahowa Dèbata ndènè gabè milik ndènè soh sidekkah-dekkahna.”
Kuta-kuta percilenggemmen kan kebincaren Laè Jordan
41 #
Jos. 20:8-9
Nai ituduhken si Musa mo tellu kuta kan kebincaren Laè Jordan 42gabè kuta percilenggemmen, bekkas jelma ndorok paluahken dirina mula kumerna oda inakkati enggo memunuh jelma siso musuhna. Ndorok mo ia mperrus mi barang apaina kuta i asa ulang ibunuh ia. 43Bai marga Ruben ipèmaken mo kuta Bezer kettan uruk ndèas gurun pasir, bai marga Gad imo kuta Ramot i ladang Gilead, janah bai kalak Manasye imo kuta Golan i ladang Basan.
Iberèken Patiin Dèbata bai bangsa Israel
44Nai ibereken si Musa mo pati-patiin dekket hatoren-hatoren Dèbata bai bangsa Israel. 45-46Ibahanken ngo idi enggo kessa mbungkas kalak i i Mesir nai janah merian i lembeng kettan kebincaren Laè Jordan, pedempak dekket kuta Bet-Peor. Ukum aur i imo jajahen Raja Sihon kin, raja kalak Amori, simengerajai i kuta Hesybon arnia: Italuken si Musa dekket bangsa Israel mo ia tikan mbungkas i kalak i i Mesir nai. 47Itaban kalak i mo tanoh Raja Sihon i, bagi ma tanoh Raja Og i Basan nai, imo sada kalak raja Amori sidèban simerian kettan kebincaren Laè Jordan. 48Amak ngo tanoh i i kuta Aroër i biding Laè Arnon nai, terrus mi utara sakat mi Delleng Siryon, imo Delleng Hermon, 49dekket karina ladang sikan kebincaren Laè Jordan mi selatan sakat mi laut matè i pispis Delleng Pisga.
Currently Selected:
5 Musa 4: LAIBTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
