5 Musa 5
5
Pati-patiin Dèbata Sisipuluh i
(2 Ms. 20:1-17)
1Ipetumpu si Musa mo karina bangsa Israel, nai nina mo taba kalak i, “Kènè alè karina kaka-anggi, dengkohken kènè mo pati-patiin sikuberèken bai ndènè ari èn. Guruken kènè mo pati-patiin idi, janah setia mo kènè mengulaken i. 2Ibakin Jahowa Dèbatanta ngo sada perpadanen i delleng Sinai, 3oda manihan bai empungta sambing tapi dekket kita karina sinisèn ngo. 4Ibas api i babo delleng idi nai mengerana ngo Jahowa simbabah dekket kènè. 5Tapi kerna buradan kènè midah api janah oda pang menangkih delleng, nai cènder mo aku tikala i, i kellang-kellang ndènè bak Jahowa lako pesakatken rana Jahowa bai ndènè.
6Itingtingken Jahowa mo, ‘Aku ngo Jahowa Dèbata ndènè simengarak kènè mbungkas i Mesir nai, bekkas ndènè iperhamba.
7Ulang sembah dèbata-dèbata sidèban. Pellin Aku sambing mo kessa sembah.
8 #
3 Ms. 26:1; 5 Ms. 4:15-18, 27:15 Ulang gana bamu gana-gana simencodi barang kadè sambing pè silot i langit, i tanoh èn barang pè sinibagasen laè siniterruh tanoh. 9#2 Ms. 34:6-7; 4 Ms. 14:18; 5 Ms. 7:9-10 Ulang sembah gana-gana sibagidi kumerna Aku ngo Jahowa Dèbatamu janah oda uè Aku ipecodi mi barang kadè sambing pè. Kalak simernggogo atè taba Aku Kuhukum ngo soh mi pinemparna cundut petelluken dekket peempatken. 10Tapi masèh ngo atèngKu midah merribu-ribu pemparen kalak simerkelleng atè midah Aku janah simenguèi pati-patiinKu.
11 #
3 Ms. 19:12
Mak ndorok dokenken gerarKu mula mak mendè dalanna, kumerna Aku, Jahowa Dèbatamu, menghukum barang isè sambing maing melancang gerarKu.
12 #
2 Ms. 16:23-30, 31:12-14 Pèstaken mo ari Sabat janah hormati kènè mo i gabè ari Simbadia, kumerna Aku ngo Jahowa Dèbatamu simendokken idi taba kènè. 13#2 Ms. 23:12, 31:14-15, 34:21, 35:2; 3 Ms. 23:3 Kuberèken ngo bai ndènè ennem ari lako mahan bahaen, 14tapi ukum ari pepituken idi ari pentadien simerkedekoen baKu, Jahowa Dèbatamu ngo i. Ukum sidarinkenna i sada kalak poda ndorok mahan bahaen, barang kènè, dukak-dukak ndènè, naposo-naposo ndènè, pinakanmu barang kalak sideban simerian i kutamu. Karina naposomu kennah mentadi ngo bagè kènè sendiri. 15Engèt mo iperhamba kin ngo kè- nè pè arnia i Mesir, nai ipeluah Jahowa Dèbata ndènè merkitè kegegohenna simehe- ji i. Kumerna i mo asa Kudokken kènè lako memèstaken ari Sabat.
16 #
5 Ms. 27:16; Mat. 15:4, 19:9; Mrk. 7:10, 10:19; Luk. 18:20; Ep. 6:2-3 Pesangap janah pehèdu-hèdu kènè mo bapa dekket inang ndènè; idi ngo perèntahKu, Jahowa Dèbata ndènè, asa sayur ntua kènè janah ndekkah nggelluh i tanoh sinaing berènkenKu bai ndènè.
17 #
1 Ms. 9:6; 3 Ms. 24:17; Mat. 5:21, 19:18; Mrk. 10:19; Luk. 18:20; Rm. 13:9; Jak. 2:11 Ulang memunuh.
18 #
3 Ms. 20:10; Mat. 5:27, 19:18; Mrk. 10:19; Luk. 18:20; Rm. 13:9; Jak. 2:11 Ulang merlangkah julu meddem.
19 #
3 Ms. 19:11; Mat. 19:18; Mrk. 10:19; Luk. 18:20; Rm. 13:9 Ulang menangko.
20 #
2 Ms. 23:1; Mat. 19:18; Mrk. 10:19; Luk. 18:20 Ulang kènè mengindangken kata siso tuhu terèngèt kalak sidèban.
21 #
Rm. 7:7, 13:9 Ulang kènè uè menakiken alah ni dèba: Sapona, tanohna, sinibagesna, hamba-hambana, pinakanna, kalodèna bak barang kadè sambing silot bana.’
22 #
Heb. 12:18-19
Idi mo pati-patiin siniberèken Jahowa bai ndènè sinderrangna merpulung kènè i delleng. Tikanna mengerana Ia merkitè sora merdiung ibas api dekket hembun ngkapal nai, iberèken mo pati-patiin idi, janah oda ngo sidèban memerèken. Nai isuratken mo ipas dua batu tettal janah iberèken taba aku.”
Buradan kalak Israel
(2 Ms. 20:18-21)
23“Sinderrangna mergollah karina delleng i janah idengkoh kènè sora ibas sigellap idi nai, roh mo karina pengulu-pengulu marga ndènè dekket pungkuh-pungkuh jelma nterrem mendahi aku. 24Nina kalak i mo, ‘Enggo ipetarar Jahowa Dèbatanta kehejien dekket kemuliaenNa sinderrang kudengkoh kami Ia mengerana ibas api nai. Sidari èn enggo mo kusaksiken kami magahken ndorok ngo keppèken nggelluh tong jelma i, kasi pè enggo mengerana Dèbata dekketsa. 25Tapi kasa dèng kennah kupejuhap kami kessah nami? Ripasenken api simahantu i mo kami èn! Dok atè nami matè nai ngo kami mula kudengkoh kami dèng mengerana Dèbata Jahowa. 26Nung ma ngo idah kènè lot jelma tong dèng nggelluh ia mula enggo kessa idengkoh Dèbata singgelluh i mengerana ibas api nai? 27Kumerna i, lako mo alè Musa, dengkohken mo karina sinidokken Jahowa Dèbatanta, nai bagahken mo taba kami kadè sinidokkenNa bamu. Kudengkoh janah kuuèi kami pè.’
28Mendengkohken idi, nina Jahowa mo taba aku, ‘Enggo Kubeggè kadè sinidokken bangsa i, janah tuhu ngo rana kalak idi i. 29Cuba mo ukum dak bagidi kin nemmuken perukuren kalak i! Ukum dak ipesangap kalak i kin nemmu Aku janah menguèi karina patinKu, asa gabè mersennang-sennang kalak i bak pinemparna soh mi amman sumendah! 30Lako mo janah dokken mo bagèndari bangsa i balik mi undung-undungna gennep. 31Tapi ukum ko, Musa, balik nola mo ko janah merian isèn mo ko rebbak dekket Aku; naing Kuberèken ngo bamu karina hukum dekket patiinKu. Ajarken mo bai kalak i, asa iuèi janah iulaken kalak i i nagerri sinaing Kuberèken bai kalak i.’
32Kènè alè kaka-anggingku, uèi kènè mo selloh karina sinitennahken Jahowa Dèbata ndènè taba kènè. Ulang lausken kene agia sada pe ibas perèntah-perèntah idi nai. 33Ulaken mo karina siniperèntahken Jahowa Dèbatamu bai ndènè asa ncayur tua kènè janah tong merian i nagerri sinaing ianen ndènè i.”
Currently Selected:
5 Musa 5: LAIBTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
