5 Musa 3
3
Italuken Israel Raja Og
(4 Ms. 21:31-35)
1“Nai sisessak mo mi Utara menuju ladang Basan. Roh mo si Og, raja Basan rasken karina soridaduna lako menjuhap kita, ndessing mi kuta Edrei. 2Tapi nina Jahowa mo taba aku, ‘Ulang kono mbiar tabasa, alè Musa. Kusohken mo ia bamu bang soridaduna, dekket karina ladangna. Bakin mo tabasa bagè sienggo ibaing ko taba si Sihon, raja Amori simengerajai i Hesybon.’
3Nai isohken Jahowa Dèbatanta mo Raja Og dekket ginemgemna banta, janah sipepatu ngo kalak i karina. 4Tikanna idi sitaban mo karina kutana, sada poda lot nèngè tading. Lot ngo ennempuluh kuta karina sitaban i suberri ladang Argob, siniperèntah raja Og i Basan nai. 5Karina kuta idi ntegguh ngo ibakin merpagar ndates, merpèntu pengkeruhen dekket mergerruk-gerruk lako mengkonci pèntu pengkeruhen i. Laènkenna i mèduk dèng ngo kuta siso merpagar. 6Sibukar ngo karina kuta idi, janah karina daholi, daberru dekket dukak-dukak kalak idi sibunuh, bagè pemaingta taba karina kuta Raja Sihon i Hesybon. 7Sirampasi ngo pinakan kalak idi janah sipupusi karina kuta kalak i.
8Tikanna i mo sitaban bai sidua raja Amori idi nai aur kan kebincaren Laè Jordan dekket Laè Arnon soh mi Delleng Hermon. 9(Delleng Hermon igerari kalak Sidon ngo Siryon, janah Senir ngo igerari kalak Amori). 10Sitaban mo karina aur Raja Og sini Basan: karina kutana sini uruk aur Gilead dekket Basan, terrus mi kebincaren daohna soh mi kuta Salka dekket Edrei.”
(11Raja Og imo kalak Refaim perpodi. Palongenna pè ibahan ipas batu nai, empat mèter geddangna janah bekkangna naing-naing dua mèter mengèkutken sibaren sienggo itetapken. Soh bagèndari ndorok dèng ngo itengen i Raba, kuta kalak Amon.)
Marga-marga simengiani ladang kan kebincaren Laè Jordan
(4 Ms. 32:1-42)
12“Enggo kessa gabè milikta tanoh idi, kuberrèken mo bai marga Ruben dekket Gad ladang sikan Utara kuta Aroër i gembar Laè Arnon, janah dèba i ladang kan uruk Gilead, rasken dekket kutana. 13Sitadingna dèng tanoh Gilead i kuberèken mo bai sitengah i marga Manasye nai, bagi ma ladang Basan sinigemgemen si Og kin, imo karina ladang Argob.”
(Terberita ngo Basan i nagerri kalak Refaim. 14Si Jair i marga Manasye nai memuat karina ladang Argob, imo i Basan nai soh mi perbalengen Gesur dekket Maakha. Igerari mo kuta aur idi mengèkut gerarna sendiri, janah soh bagèndari tergerar dèng ngo i tong aur si Jair.)
15“Ladang kalak Gilead kuberèken mo idi bai horong si Makhir i marga Manasye nai. 16Janah bai marga Ruben dekket Gad kuberèken ladang sinikellang-kellang Gilead dekket Laè Arnon. Pertengahen laè i mo sikira perbalengen kalak i kan selatan, ukum kan utara merbalengken Laè Jabok mo kalak i, ai dèba idi i mo perbalengen nagerri kalak Amon. 17Kan kesunduten, amak ngo ladang kalak i soh mi Laè Jordan, mulai i tao Galilea nai i utara soh mi Laut Matè kan selatan, terrus soh mi pispis delleng Pisga kan kebincaren.
18 #
Jos. 1:12-15
Sinderrangna idi kuperèntahken mo bagèen bai kalak i: Iberèken Jahowa Dèbata ndènè ngo ladang kan kebincaren Laè Jordan bai ndènè mahan bekkas ndènè. Tapi ukum soridadu-soridadu ndènè kennah merbeddil ngo janah menurèpari Laè Jordan mengelebbèi marga-marga Israel sidèban. 19Pellin dukak-dukak bak sinibages dekket pinakan ndènè simbuè i ngo kessa ndorok tading i kuta sienggo kuberèken bai ndènè. 20Urupi kènè mo dengan ndènè sada bangsa soh gabè ikunduli kalak i tanoh sinaing berènken Jahowa Dèbata ndènè bai kalak i, imo kan kesunduten Laè Jordan, dekket sakat ipaduè Jahowa kalak i nggelluh ibagasen damè i sidi, bagè sienggo ibaing bai ndènè i sènda. Kessa pul pèi asa ndorok kènè balik mi tanoh ndènè sienggo kuberèken bai ndènè.
21Nai ningku mo taba si Josua: Enggo idah kono karina sinibakin Jahowa Dèbatamu meradepken si Sihon dekket si Og, raja sidua i. Bagidi ma ngo tong bakinenNa taba gennep raja sienggo itaban ko tanohna. 22Ulang ko mbiar midah kalak i, kumerna Jahowa Dèbata ngo juhap lako bai ndènè.”
Oda ipadiat si Musa mbengket mi Kanaan
23 #
4 Ms. 27:12-14; 5 Ms. 32:48-52 “Tikanna i kupengido ngo bai Jahowa: 24Ialè Jahowa Sintèmbul kalohon i, kubettoh ngo ukum sinituduhkenMu bangku èn pellin pertebenaen pemahanMu simeheji janah kelengangen i dèng ngo i. Oda lot dèbata sidèban i langit barang i tanoh èn codi bagè Kono ndorok menghanaken mahantu. 25Alè Jahowa duè mo giamken aku menurèpari Laè Jordan, lako mengidah nagerri nggabur i kèpar adoi, ladang uruk merandal dekket uruk Libanon.
26Tapi kumernaken kènè enggo melaga Jahowa taba aku gabè oda iuèi nèngè pe- ngidoenku. Baliksa nina Jahowa ngo, ‘Nggo moi, Musa, ulang nè gegoli tersèngèt mi si! 27Laus mo kono mi pucuk Delleng Pisga janah tatap mo dempak Utara dekket dempak Selatan, mi Kenincaren dekket Kesunduten. Perdatèken mo mendè kadè siniidahmu i, kumerna ukum kono oda ngo suberrangenmu Laè Jordan. 28Berèken mo penettoi bai si Josua. Pememmes mo ukurna, kumerna ia ngo sinaing menguluken bangsa i mi kèpar lako mengiani nagerri siniidahmu idi.’
29Nai merian i lembeng kan kèpar kuta Bet-Peor mo kita.”
Currently Selected:
5 Musa 3: LAIBTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
