5 Musa 2
2
1 #
4 Ms. 21:4
Dungna balik mo kita mi gurun pasir arap dalan menuju mi Suak Akaba, bagè siniperèntahken Jahowa. Ndekkah ngo kita kadap i ladang uruk Edom.
2Nai idokken Jahowa mo bangku 3magahken enggo toko dekkahna kita kadap i nagerri i. Jadi kennah laus ngo kita mi Utara. 4#1 Ms. 36:8 Nai nola ma idokken Jahowa mo aku memagahken peddah ènda bai ndènè, ‘Oda ndekkah nèngè bengketten ndènè mo nagerri Edom, ladang dengngan sibeltek ndènè, pinempar si Esau. Mbiar ngo kalak i midah kènè, 5tapi oda ndorok juhapen ndènè kalak idi, kumerna ukum i tanoh kalak idi nai situk poda berènkenKu bai ndènè, kumerna ladang Edom enggo Kuberrèken bai pinempar si Esau. 6Ndorok ngo kènè menokor pangaen barang ènumen bai kalak idi nai.’
7Èngèt mo barang bakunè Jahowa Dèbata ndènè enggo memasu-masu kènè ibas karina bahaen ndènè. Ipehèdu-hèdu ngo kènè sidekkah kadap kènè i gurun pasir simbellang èn. Ikellini ngo kènè sidekkah empatpuluh tahun èn janah memerèken karina siperlu bai ndènè.
8Nai terrus mo kita merdalan, menadingken dalan arap kuta Elat dekket Ezion-Geber menuju mi Laut Matè, nai merèluk mi Timur Laut menuju Gurun Moab. 9#1 Ms. 19:37 Nina Jahowa mo taba aku, ‘Oda ndorok susahen ndènè kalak Moab, imo pinempar si Lot. Ulang ma mo juhap kè kalak i. Enggo ngo Kuberrèken nagerri Ar bai kalak i, janah situk poda Kuberrè ibas tanoh kalak i nai bai ndènè.’ ”
10(Arnia kalak Emim ngo mengiani Ar. Kalak nggeddang ngo rua-ruana, dos dekket kalak Enak, bagè bangsa ntuara. 11Bagè kalak Enak, idokken ma ngo kalak i kalak Refaim, tapi ukum kalak Moab mendokken, kalak Emim ngo kalak idi. 12Arnia kalak Hori merian i Edom, tapi iletlet janah itumpatken pinempar si Esau mo, simengiani tanoh kalak i nola daoh-daoh arien; bagi ma ngo bangsa Israel ipodi ari nola mengeletlet musuh-musuhna i tanoh siniberèken Jahowa bai kalak idi nai).
13“Nai siturèpari mo Laè Zered bagè siniperèntahken Jahowa banta. 14#4 Ms. 14:28-35 Masa ngo idi enggo kessa tellupulu ualuh tahun sitadingken Kades Barnea. Karina soridadu i cundut idi nai enggo matè bagè sinidokken Jahowa. 15Pukpuk ngo ialo Jahowa kalak idi, ujungna riput mo kalak i karina.
16Enggo kessa matè kalak i karina, 17nina Jahowa mo taba kita, 18‘Sidari èn mo kènè memellus ladang Moab, mengelausi nagerri Ar. 19#1 Ms. 19:38 Nai sakat mo kènè mi gembar tanoh kalak Amon, pinempar si Lot. Ulang kekadè kènè barang ikubu kènè kalak i, kumerna ipas tanoh sienggo Kuberèken bai kalak i nai, situk poda lot naing Kuberèken idi bai ndènè.’ ”
20(Terberita ma ngo ladang idi mergerar nagerri Refaim, imo gerar bangsa simerian i sidi arnia; tapi igerari kalak Amon ngo kalak idi kalak Zamzumim. 21Mbelgah nggeddang ma ngo tong perdagingna, bagè kalak Enak. Mergegoh kalohon ngo kalak i, janah bilangenna pè nterrem. Tapi iripasken Jahowa mo kalak i, gabè itaban kalak Amon mo tanoh i, janah merian i sidi. 22Bagidi ma ngo tong ibakin Jahowa taba kalak Edom, pinempar si Esau, simengiani ladang kan uruk Edom. Iripasken Jahowa ngo kalak Hori, gabè itaban kalak Edom mo tanoh i janah mengianisa, nai hot mo kalak i i si soh bagèndari. 23Tanoh silot mengèkut arur biding Laut Tengah i iani kalak sini Pulo Kreta nai. Enggo iripasken kalak idi kalak Awi, pengisi asli tanoh idi kin, nai iiani mo ladang i soh mi Selatan soh mi kuta Gaza daohna).
24“Enggo kessa silausi ladang kalak Moab, nina Jahowa mo taba kita, ‘Berkat mo kènè bagèndari menurèpari Laè Arnon. Naing Kuberrèken ngo bai ndènè si Sihon, raja Amori simengerajai i Hesybon, rasken bak nagerrina. Juhap kè mo ia, nai iani kènè mo tanohna i. 25Mulai sidari èn nai Kubakin mo kènè asa gabè ikebiari karina bangsa barang idikè sambing pè ia. Karina kalak buradan janah menggirgir mula idengkoh kessa tersèngèt kènè.’ ”
Italuken kalak Israel Raja Sihon
(4 Ms. 21:21-30)
26“Nai kessa i nola kupasulak mo barang piga-piga utusen i padang gurun Kedemot nai, mendahi raja Sihon i Hesybon nai lako pesakatken pengidoen perdamèen ènda: 27‘Padiat mo kami memellus arap tanoh raja i. Terrus pè kami merdalan janah oda menirpang arap dalan mbellen nai. 28Kugarar kami pè pangaen sikupangan kami dekket laè sikuènum kami. Pellin mentas sambing ngo kessa kami perlu arap nagerri ènda, 29mèma kuseberangi kami Laè Jordan lako mbengket mi nagerri siniberèken Jahowa Dèbata nami bai nami. Pinempar si Esau simerian i Edom dekket kalak Moab simerian i Ar pè enggo mo padiatken kami memellus arap ladang kalak i.’
30Tapi oda ipadiat Raja Sihon kita memellus arap nagerrina idi. Ibaing Jahowa Dèbata ndènè mo ia gabè merukur mpihir janah jukkat asa ndorok sitaluken ia. Siiani deng ngo ladangna soh bagèndari.
31Nai nola nina Jahowa mo taba aku, ‘Kusohken mo Raja Sihon dekket nagerrina bamu; buat mo janah rajai mo nagerri idi.’ 32Nai roh mo si Sihon dekket karina soridaduna lako mengalo kita i gembar kuta Jahas. 33Tapi isohken Jahowa Dèbatanta ngo ia banta, nai sitaluken mo ia dekket dukak-dukakna bak karina soridaduna. 34Tikalana idi ma mo sitaban janah silala gennep kuta, janah sibunuh karina pengisina, daholi, daberru dekket anak-anak. Oda lot nè sipaduè nggelluh. 35Pinakan kalak i pè sibuati janah kutana sitaban. 36Merkitè pengurupi Jahowa Dèbatanta, terbaing kita mo menaban karina kuta i, mulai i Aroër nai, i punca Napa Arnon, dekket kuta sinitengah napa kendet i, soh mi ladang Gilead. Oda lot kuta ntegguhsu siakap parikna. 37Tapi oda ngo sijolmiti ladang kalak Amon barang pè biding Laè Jabok barang pè kuta silot i delleng bak i bekkas sidèban pè sinigerra Jahowa Dèbatanta.”
Currently Selected:
5 Musa 2: LAIBTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
