2 KORINTUS 7
7
1Cina ra angi meciku! Sara'a rasake ede d̄iru'u ndaita. B̄ara ndedena pab̄uaku ndai karaso weki rad̄i samenana ma kasampu nawa rasarumbu ndaita. Pab̄uaku ndai dahuta d̄i Ruma Hatalla, loakud̄u ndai morimpa d̄iru'u Sia kai sampuruna.
Neo ade la Paulus
2Weha aopu nami d̄ei ademu. Nami wati ncaramu kone d̄i sab̄ua dou rau, ro watipu parana warana dou rakarugi b̄a nami. Nami watipu parana weha laba rad̄i cou-cou rau. 3Nggahi ndedekai nahu, laina d̄i kancarakaiku nggomid̄oho. B̄ara, b̄une rawa'u nggahi b̄a nahu ntoina, nami wancuku meci ra ca'u nggomid̄oho, ro ndaita eded̄u lenga sama mori sama made. 4Nahu ka'imbi poda d̄i nggomid̄oho. Malahan nahu wancuku bangga podaku d̄i nggomid̄oho! Konena mboto susa ra ncoki iu b̄a nami, ade nahu wancuku sanana b̄ara nggomid̄oho. Nahu wancuku neo adeku!
5 #
2Kor. 2:13
Aipu nami rongga d̄i Makedonia rau, nami wati kone loamu sanawa. D̄isara'a kalompo, nami rakamu ncoki: rad̄i kalompo makalai cence ncihi, d̄ei ade ndai ta'iuku dahu. 6Pala syukura, Ruma Hatalla nakana'e ncauku ade dou ma kompo kananu, Sia mbeina samanga mab̄ou d̄i nami kai mai la Titus. 7Sanakai ade nami lai mpoana b̄ara wa'ura mai la Titus, pala b̄ara sia rau ngoana b̄uneku neo ade sia b̄ara nggomid̄oho. Sia ngoana d̄i nami b̄a one nggomid̄oho wancuku ne'e poda ademu eda angi lab̄o nahu; b̄ara nggomid̄oho sinci ade d̄i ruku ra rawimu ntoina ro ake relamu horu nahu. Lampa rawi ede maka'ipi neo ade nahu wali.
8Konena sura nahu makancoki wea ademu, nahu wati sinci adeku tunti sura ede. Poda wakatu eda b̄a nahu b̄a one sura nahu ede makandad̄ina ncoki ade nggomid̄oho – konena samporo ncoki ademu ede – nahu wara rauja sinci adeku. 9Pala nahu neo adeku ake – laina b̄ara ncoki ade nggomid̄oho, malaisi b̄ara ncoki ademu ede marungkana ruku ra rawimu. Poda ncoki ademu ede sab̄ua lampana lab̄o kane'e Ruma Hatalla. Ndad̄i nami wati karugimu nggomid̄oho. 10B̄ara ncoki ade b̄une ede nambeiku rungka ade ma kamaikaina salama. Ro dou wati d̄imasinci ade kai lampa rawi ede. Pala ndakeku, ncoki ade sab̄uampa ncaina lab̄o kane'e manusia nambeiku made. 11Tio kab̄aepu b̄a nggomid̄oho auku hasina d̄i nggomid̄oho b̄a ncoki ade ma sab̄uampa ncaina lab̄o kane'e Ruma Hatalla! Hasina eded̄u nggomid̄oho poda-poda usahamu d̄iru'u kanoakai makob̄u! Nggomid̄oho ndad̄i daca'u d̄i dosa, nggomid̄oho dahu, nggomid̄oho lingi ade, nggomid̄oho ndad̄i samanga, nggomid̄oho rela hukumna ma ncara! Ade samenana masa'ala ake nggomid̄oho wa'ura katadamu b̄a one nggomid̄oho wati ncaramu.
12Ndad̄i, kone wa'ura tunti b̄a nahu sura ede, nahu tuntiku laina b̄ara dou ma ncara ede. Lai rauna b̄ara dou ma susa ra ncoki b̄ara ncara ra kancaru ede. Nahu tuntiku sura ede loakud̄u d̄i tando Ruma Hatalla, nggomid̄oho iu weki b̄a ndai kesemu na'ipiku na'ena ra'edamu d̄iru'u b̄a nami. 13B̄ara ndedena neo ade nami. Ari mai b̄a neo ade, nami ncewi wali neo ademu b̄ara edamu neo ade la Titus; neo adena b̄a nggomid̄oho sara'ana. 14Poda nahu wa'ura kabangga-banggaku nggomid̄oho d̄i sia. Syukura, nggomid̄oho wati kamajamu nahu. Samenana rawa'u nggahi b̄a nami d̄i nggomid̄oho napodaku. Ndede wali au rakabangga-bangga b̄a nami mab̄oha nggomid̄oho d̄i la Titus nancihi rau. 15Ake sia nanaha meci ra ca'una nggomid̄oho, b̄ara sia kawarana b̄uneku nggomid̄oho b̄atumu ngoa ra tei b̄a sia ro b̄uneku nggomid̄oho tarimamu sia kai horoma ro to'a. 16Nahu wancuku neo adeku, b̄ara nggomid̄oho loa d̄i imbikai ade samenana lampa rawi.
Currently Selected:
2 KORINTUS 7: LAIBHP
Highlight
Copy
Compare
Share
Want to have your highlights saved across all your devices? Sign up or sign in
@LAI 2001
