2 KORINTUS 6
6
1B̄ara nami karawi sama-sama lab̄o Ruma Hatalla, ndad̄i nami maraho poda, aina kasia-sia b̄a nggomid̄oho tahona ade Ruma Hatalla ede. 2#Yes. 49:8 Ade Alkitab, nggahi Ruma Hatalla,
”D̄i wakatu rakane'ekai, Nahu wa'ura ringaku nggomi,
ro d̄i ainaina salamakai, Nahu wa'ura bantuku nggomi.”
Kawara katahopu, wakatu akeku rakane'ekai ede. Wakatu akeku ainaina d̄i salamakai!
3Nami wati ne'emu rakarawi b̄a nami d̄i kancara wea. B̄ara ndedena nami ma'usaha wati mbei alasa kone d̄i sab̄ua dou rau d̄imakarawi lampa rawi ede. 4Pala ndake, ade sara'a lampa rawi, nami matei katadaku b̄a one nami eded̄u ada-ada Ruma Hatalla. B̄ara, samenana pahu manggonggi wa'ura iu b̄a nami kai saba: 5#Kis. 16:23 nami rakancoki, rabui, ro rakalembi b̄a dou; nami karawi kapodamu, ntuwu wati maru ro ntuwu rau dantaumu d̄i ade ngaha ra nono. 6Kai karawimu marela, maloa timba ra lemba, saba ro taho ade nami matei katadana b̄a one nami eded̄u ada Ruma Hatalla. Ro kai wi'i weki d̄i bantu b̄a Roh Allah, ro kai meci ra ca'u ma nira ade, 7ro kai ngoa ra kahaba haba ma ramai ta Ruma Hatalla ro kai kuasa Ruma Hatalla, nami matei katadaku b̄a one nami ake eded̄u ada-ada Ruma Hatalla. Nami manentiku d̄irakane'e Ruma Hatalla kai d̄aha nami d̄i deikai atao d̄i sandakakai weki. 8Nami d̄i horoma, pala d̄i katuna ra kab̄awa rau, d̄i roi, ro d̄i fitina rau. Kone rombo nami, nami wi'ikai b̄a dou cowa. 9Nami wi'ikai b̄a dou wati mbouna, pala nami pata sara'a b̄a dou. Kacaina nami made, pala nami mbuipu mori. Kone nami rakancoki, nami wati mademu. 10Konena ade nami d̄i kasusa wea, pala nami ngge'empa d̄ihi ade ncau. Nami tada ncoki mori, pala nami wa'ura ndawimu mboto dou ndad̄i ntau ra wara. D̄i'edamu nami wati ntaumu au-au, pala sapodakaina nami mantau sara'a mena.
11Cina ra angi rameci ra ca'u b̄a nahu d̄i Korintus! Nami wa'ura nggahi ntirimu d̄i nggomid̄oho. Sara'a isi ade nami wa'ura ngoa b̄a nami. 12Nami wati b̄ontomu ade d̄iru'u nggomid̄oho, nggomid̄ohompa ma b̄onto ade d̄iru'u b̄a nami. 13Ake, co'opu nahu manuntu ra nggahi b̄une santika d̄i ana-ana ndai nahu. Hengga raupu ademu d̄iru'u nami.
Ngoa ra tei kataho loakud̄u aina hina b̄a pangaru b̄a dou-dou ma wati imbi
14Aina ne'emu rewo lab̄o dou-dou ma wati imbi d̄i Ruma Isa; ede wati ncihi ncaona. B̄uneku loana mataho campo lab̄o ma'iha! Wati lu'u b̄a aka taroa campo lab̄o marindi. 15Wati lu'u b̄a aka Al Masih ako angi lab̄o Ibilis. Auku samana dou ela Al Masih lab̄o dou malaina ela Al Masih. 16#Im. 26:12, Yeh. 37:27, 1Kor. 3:16, 6:19 Auku campona Bait Allah lab̄o uma berhala? Ndai ake Bait Allah, eded̄u Ruma Hatalla ma mori. Ndai Ruma Hatalla manggahi,
”Nahu d̄imangge'e d̄i woha siad̄oho,
ro mori sama lab̄o siad̄oho.
Nahu d̄imandad̄i Ruma Hatalla siad̄oho,
ro siad̄oho d̄imandad̄i ela-Ku.
17 #
Yes. 52:11
B̄ara ndedena,
tu'u wi'ipu dou-dou ma wati pata Ruma Hatalla ede,
ro kalaipu wekimu rad̄i siad̄oho.
Ai to'ina campomu lab̄o ma najis,
ndad̄i Nahu d̄i matarima nggomi.
18 #
2Sam. 7:14, 1Taw. 17:13, Yes. 43:6, Yer. 31:9 Nahu d̄imandad̄i Amamu,
ro nggomi d̄imandad̄i ana-ana Nahu,
ndedeku nggahi Ruma Ma Wancu na'e Kuasa.”
Currently Selected:
2 KORINTUS 6: LAIBHP
Highlight
Copy
Compare
Share
Want to have your highlights saved across all your devices? Sign up or sign in
@LAI 2001
