2 KORINTUS 11
11
Paulus ro rasu-rasu palasu
1Kau to'ipu nahu ruku ra rawi sampula sato'i. Loa kandede kan? 2Nahu lingi adeku d̄i nggomid̄oho, b̄une ndai Ruma Hatalla malingi ade rau d̄i nggomid̄oho. Nggomid̄oho b̄une dou siwe sampela ma mbuipu raso rawa'u sake b̄a nahu d̄ikanika lab̄o sab̄ua rahi, eded̄u Al Masih. 3#Kej. 3:1-5, 13 Pala nahu dahu adeku fiki ra kananumu b̄oha b̄a goda d̄imawati to'a wali d̄i Al Masih, sama b̄une la Hawa ntoina hina b̄a goda rau b̄ara tipu b̄a sawa. 4B̄ara nggomid̄oho sanampa ade tarimamu dou ma mai d̄i nggomid̄oho ro matei mab̄oha Isa ma kalai – laina Ruma Isa rakapata b̄a nami d̄i nggomid̄oho. Ro nggomid̄oho rau mane'e tarima ao roh ro Haba Mataho ”ma wati sama lab̄o Roh Allah ro Haba Mataho rawa'u tarima b̄a nggomid̄oho rad̄i nami.
5Nahu wati iu podaku ncewi awa rad̄i ”rasu-rasu” ma wancu heba ede! 6Kombisi nahu wati ipi loaku nuntu ra nggahi, pala mab̄oha loa ra tingi, nahu laina dou masampula. Ede wa'ura bukuti b̄a nami d̄i nggomid̄oho ade samenana lampa rawi.
7D̄i wakatu ngoa ra kahaba b̄a nahu Haba Mataho rad̄i Ruma Hatalla d̄i nggomid̄oho, nahu wati rahoku d̄i nggomid̄oho d̄i macola wea nahu kone sato'i rau, ro ade ndedekaina nahu kab̄awaku weki. Karawikai b̄a nahu ede d̄i kad̄esekaiku nggomid̄oho. Sab̄ua ede ncara nahu d̄i nggomid̄oho? 8D̄i wakatu karawi wea b̄a nahu nggomid̄oho, nahu cola wea b̄a ela-ela Ruma makalai. Loa d̄i nggahi nahu makarugina ela-ela Ruma ede loakud̄u bantuku nggomid̄oho. 9#Flp. 4:15-18 Nggara d̄i wakatu ede nahu wara madancihiku, nahu watipu parana kasusa kone sab̄ua dou rau rad̄i nggomid̄oho. Sara'a d̄i paralu b̄a nahu sadia wea b̄a cina ra angi ma mai rad̄i Makedonia. Nahu masandaka kataho-taho loakud̄u nahu wati kasusaku nggomid̄oho ade samenana lampa rawi, ro nahu sandaka ncauku loakud̄u ede ngge'empa ndendena. 10Banggakai nahu ake wati loa d̄i fura tab̄e-b̄e rau d̄i sara'a dana ra rasa Akhaya, b̄ara rangoa ra tei b̄a Al Masih ma ncihi wara d̄i nahu. 11B̄ab̄au nggahi ndedekai nahu? Sab̄ua b̄ara nahu wati meci ra ca'uku nggomid̄oho? Ruma Hatalla nab̄ade nahu mameci ra ca'u nggomid̄oho!
12Au rakarawi b̄a nahu ake d̄i karawi ncau b̄a nahu loakud̄u ”rasu-rasu” ma kalai ede wati ntau alasana d̄i kana'e-na'ekai weki ro nggahi b̄a one siad̄oho karawi b̄une nami. 13Dou-dou b̄une ede eded̄u rasu-rasu palasu. Siad̄oho eded̄u dou-dou makarawi tipu dou mawa'a pahu kai rasu-rasu Al Masih. 14Wati mborakai aka siad̄oho karawi kandedena, b̄ara ndai Ibilis wa'ana pahu kai mala'eka taroa! 15Ndad̄i wati d̄i mborakai aka rau nggara dou-dou makarawi wea Ibilis wa'ana pahu kai dou-dou ma karawi wea kane'e b̄a Ruma Hatalla. Cumpukaina siad̄oho rau d̄imatarima cepekaina ma ncihi ncao lab̄o samenana karawi siad̄oho.
Susa ra ncoki Paulus kai rasu kaina
16Nahu manggahi mboda sakali wali: Aina sampe wara ma wi'ikai nahu sampula. Pala nggara nggomid̄oho wi'ikaimu nahu ndede, kau to'ipu nahu ma sampula ake kabangga rau weki sato'i. 17Ta awa ake nahu d̄imapehena d̄i banggakai nahu, pala laina Ruma ma kau nahu nggahi ede. Ade lampa rawi ake nahu poda-poda nuntuku b̄une dou masampula. 18Mboto romo dou ma kabangga-bangga lampa rawi-lampa rawi dunia, ndad̄i nahu kane'e kabangga-bangga weki rau. 19Nggomid̄oho kai sana ade saba d̄i dou ma sampula, b̄ara nggomid̄oho iumu weki ipi loa! 20Nggomid̄oho maco'ompa nggara dou maka'adana nggomid̄oho, atao makaro kampoi ro maweha laba d̄i nggomid̄oho, atao ma'iu weki ncewi ese rad̄i nggomid̄oho ro nadisa topa nggomid̄oho. 21Nahu maja mangaku b̄a one nami wancuku mapu d̄imakarawi b̄une ede.
Pala au ma dou makalai disana banggakai, nahu disa rau! (Nahu kanuntu b̄une dou masampula.) 22Sab̄ua dou Ibrani siad̄oho? Nahu rau dou Ibrani. Nadou Israel siad̄oho? Nahu rau dou Israel. Londo ra mai la Ibrahim siad̄oho? Nahu rau ndede! 23#Kis. 16:23 Dou-dou makarawi wea Al Masihsi siad̄oho? D̄iringasi b̄une nahu wa'ura mbora aka, pala nahu ake dou makarawi wea ma ncewi taho ntewi kaisi lab̄o siad̄oho sara'ana! Nahu karawi ncewi kapoda ade, nahu ncewi ntuwu rakalu'u ade uma bui, nahu ncewi mboto rakancoki ro ntuwu ne'era made. 24#Ul. 25:3 Wa'ura lima kali nahu kancoki b̄a dou Yahudi rab̄oe kai cambo tolumpuru ciwi kali. 25#Kis. 14:19, 16:22 Tolu kali nahu racambo b̄a dou-dou Roma; parana nahu rau ratob̄a kai wadu. Tolu kali nahu iuku mimi kapa d̄i moti, ro sakali nahu karenteku d̄i moti salama d̄ua mpuru upa jam ntoina. 26#Kis. 9:23, 14:5 Ntuwu poda nahu ade lampa ra laoku hina b̄a bahaya: bahaya mbere, bahaya parampo, bahaya rad̄i dou Yahudi ro rad̄i dou laina Yahudi, bahaya ade kota, bahaya ari mai b̄a kota, bahaya d̄i moti ro bahaya-bahaya rad̄i dou-dou ma katada wekina kai cina ra angi ela Al Masih, sapodakaina laina. 27Nahu kambohoku howi kampokaku peke ro karawi satenga made; ntuwu wati maruku, wati ngaha, wati nono, ntuwu darereku ade ka'ada'ana hid̄o, kai iu b̄usi b̄ara kura kani ra lombo ro wati ntauku hid̄i ngge'ekai. 28Ari mai b̄a sara'ana ede, sanikina ainaina nahu darura ade rauku d̄i ka'ada'ana sara'a ela Ruma. 29Nawarasi ma rome nahu rauku b̄atu iu rome. Nawarasi ma mabu d̄i ade dosa, nalelo ade nahu.
30Nggara nahu pab̄ua banggakai au-au, ndad̄i nahu bangga d̄i lampa rawi ade lampa rawi ma katadana mapu ra rome nahu. 31Ruma Hatalla, Ama b̄a Ruma Isa nab̄ade b̄a one nahu wati cowaku. D̄ese ra ntasa ngara-Na santoi-ntoina. 32#Kis. 9:23-25 Wakatu nahu waraku d̄i Damsyik, gubernu ma kuasa d̄i hid̄i ede raparenta b̄a Sangaji Aretas, kauna tentara jaga ncai lawa kota ede d̄imawa'u nahu. 33Pala kai sab̄ua garanji nahu ra'oro ca'awa tasab̄ua karombo d̄i d̄indi kota. Ndedeku nahu horikaiku weki rad̄i rima gubernu ede.
Currently Selected:
2 KORINTUS 11: LAIBHP
Highlight
Copy
Compare
Share
Want to have your highlights saved across all your devices? Sign up or sign in
@LAI 2001
