1 TIMOTIUS 6
6
1Dou-dou ela Al Masih ma ndad̄i ada, pab̄uaku wi'ikaina b̄a one ruma siad̄oho patu d̄i lia ra horoma, loakud̄u dou wati loana nuntu ka'ihana ngara Ruma Hatalla atao ngoa ra tei ndaita. 2Ada-ada ma rumana dou ela Al Masih, wati loana kamod̄a rumana ede b̄ara siad̄oho sama-sama dou ela Al Masih. Pala siad̄oho pab̄uaku karawi weana ru'u rumana ede kai ncewi taho wali, b̄ara rumara karawi weana kai taho ede eded̄u sama-sama dou ma'imbi ma d̄imeci ra ca'u.
Ngoa ra tei mancara ro ntau ra wara mataho poda
Samenana ake pab̄uapu tei b̄a nggomi ro ngoa ra tei katahopu. 3Cou-cou mangoa ra tei ma kalai ari mai b̄a ede ro wati ca'una kai ngoa ra tei ma ncihi rad̄i Ruma ndaita Isa Al Masih, ro kai ngoa ra tei agama ndaita, 4eded̄u dou ma sombo ro wati b̄adena au-au! Ihana eded̄u naca'u cence ncihi ro ncao mab̄oha istila-istila ndad̄i nakamaiku hiana ade, ncengga ra mbi'a, fitina, wu'u ade ma wati taho, 5ro ngango ra ngora ma wati cumpu-cumpuna. Lampa fiki ra kananu dou-dou ede wa'ura mpula ro watid̄u ncihina. Kacai b̄a siad̄oho loa ndad̄i ntau ra wara rad̄i agama.
6Poda agama nambeiku laba ma na'e, nggara nancihisi adena kai au rantauna. 7B̄ara wati wara au-au rawa'a b̄a ndaita d̄i ade dunia ake, ro wati wara rau au-au d̄i loa wa'a kalosa b̄a ndaita! 8Ndad̄i, warasi ngaha ra nono ro kani ra lombo, ede wa'ura ncihi. 9Pala dou ma ne'e ndad̄i ntau ra wara, nahinaku b̄a goda ro nahinaku b̄a mboto pahu d̄i ne'e ma sampula ro ma ka'ihana. Kane'e-kane'e ede nakandad̄iku dou leli ro iha. 10B̄ara rad̄i ne'e d̄i piti, wontu mboto pahu ma d̄i ihakai. Wara sarunde dou ma fou piti ndad̄ina watid̄u b̄atu walina ngoa ra tei Kristen, edempara siad̄oho b̄oha b̄a mboto susa ra ncoki ma kaleli ade siad̄oho.
Ngoa ra tei-ngoa ra tei cumpukaina
11Pala nggomi eded̄u ntau Ruma Hatalla, ndad̄i nggomi pab̄uapu kad̄o'o lab̄o wekimu samenana ede. Usahapu ndad̄i dou ma ncihi d̄i mada Ruma Hatalla, ma karawi d̄i ru'u Ruma Hatalla, imbi d̄i Al Masih, meci ra ca'u d̄i sasama ndaimu, lembo ade d̄ei susa ra ncoki, ro wa'a weki kai ntika. 12Usaha kapodapu ru'u mori kai dou ela Al Masih loakud̄u nggomi rakamu hadia mori masapodakaina ro ma'ederahid̄i. B̄ara ru'u eded̄u Ruma Hatalla oukaina nggomi aipu wakatu nggomi mangakumu d̄i tando dou mamboto b̄a one nggomi ma'imbi d̄i Al Masih. 13#Yah. 18:37 Ro ake, d̄i tando Ruma Hatalla ma mbei nawa d̄i samenana, ro d̄i tando Ruma Isa Al Masih ma mbei sakasi ma ncihi d̄i Pontius Pilatus, nahu rahoku ake d̄i nggomi: 14To'apu d̄i samenana parenta ede kai raso ro kai wati wara ma'iha sampe d̄i ai naina mai mbali Ruma ndaita Isa Al Masih. 15Maikai-Na d̄i kantantu d̄i wakatu ma ncihi poda b̄a ndai Ruma Hatalla. Sia kese-kesempa mantau kuasa; Sia d̄ese ra ntasa, Sangaji b̄a samenana sangaji, ro Ruma b̄a samenana ruma. 16Sia mpoampa ma wati loa kuasakai b̄a made; Sia mori d̄i ade taroa ma wati loa d̄i d̄eni lab̄o b̄a cou-cou wali. Wati wara kone sab̄ua manusia rau ma parana eda-Na, atao maloana ede Sia. Ru'u Siara horoma ro kuasa ru'u santoi-ntoina! Amin.
17D̄i ru'u b̄a dou-dou mantau ra wara d̄i dunia ake, pab̄uapu nggomi rahomu loakud̄u siad̄oho aina sombo ro aina ne'emu d̄i barang-barang ma wati ederahid̄i – b̄une lampa rawi ntau ra wara. Siad̄oho pab̄uaku pamaona d̄i Ruma Hatalla ma mbei samenana au-au d̄i ndaita kai remba loakud̄u iu b̄a ndaita. 18Rahopu d̄i siad̄oho d̄i tei katadakaina mataho, d̄i karawi kambotokaina lampa rawi-lampa rawi ma taho, ncera ra mbura ade ro naca'u mbei. 19Ade ndedekaina siad̄oho nakab̄oroku ntau ra wara d̄imandad̄i fu'u ma taho d̄i ru'u wakatu ma kento. Ro kai ede siad̄oho d̄imaraka mori ma'ederahid̄i, eded̄u mori ma taho poda.
20Au rawa'u imbikai d̄i nggomi, jaga katahopu ede, Timotius! Kad̄o'opu lab̄o wekimu nuntu ra nggahi ma dawara one lab̄o cence ncihi mab̄oha lampa rawi-lampa rawi kai kaliru d̄ipehekai ”Loa ra tingi”. 21B̄ara wara dou-dou ma nggahi b̄a one siad̄oho nantau loa ra tingi ede, ndad̄ina sapaku rad̄i ngoa ra tei-ngoa ra tei Kristen ra'imbikai b̄a siad̄oho ntoina.
Raho-raho to'impa Ruma mbeina bareka cina ra angi.
Salam do'a nami, Paulus
Currently Selected:
1 TIMOTIUS 6: LAIBHP
Highlight
Copy
Compare
Share
Want to have your highlights saved across all your devices? Sign up or sign in
@LAI 2001
