1 TIMOTIUS 5
5
D̄ipab̄ua karawi d̄i ru'u b̄a dou-dou ma sama-sama imbi
1Aina ipi mbanikai b̄a nggomi dou ma umu ese mai b̄a nggomi malaisi recepu sia kade'e nggahi ra eli nggomi b̄une-b̄uneta santika sia amamu. Wi'ikaipu dou-dou mambuipu to'i umuna b̄une cinamu, 2ro dou-dou siwe tua b̄une inamu. Dou-dou siwe sampela pab̄uapu nggomi wi'ikaimu b̄une arimu, kai ruku ra rawi ma raso.
3Lia ra horomapu dou-dou siwe mbaru mboha ma poda-poda mori ndai kesena. 4Pala nggara sab̄ua dou siwe mbaru mboha mantau ana ro wa'id̄ohona, siad̄oho edeku ma saramba-ramba pab̄ua d̄i ngoa kab̄ae b̄a one sia pab̄uaku tio ro kab̄uana iwa ra weki siad̄oho, ro cola wea ade dou matua ro ina wa'i siad̄oho. B̄ara lampa rawi edeku makasana wea ade Ruma Hatalla. 5Dou siwe mbaru mboha ma poda-poda kese wekina, ro wati ntauna cou-cou d̄imaloa tio ra kab̄uana, cuma wi'i weki d̄i Ruma Hatalla mpoampa. Aimarai aimangad̄i sia do'a ncau d̄i Ruma Hatalla d̄i rahokaina bantu-Na. 6Pala dou siwe mbaru mboha ma ca'u mori sana weki, wa'ura made konena sia mbuipu morina. 7Karonggapu ngoa ra tei ake d̄i siad̄oho, loakud̄u siad̄oho mori kai wati wara ihana. 8Pala nggara warasi dou ma wati tio ro kab̄ua iwa ra wekina, au walipu iwa ra weki ndaina, dou ede nakabataku imbikaina; sia nancewi iha ntewi kaisi dou ma wati imbi.
9Cuma dou-dou siwe mbaru mboha ma ncihi ncao lab̄o sarat-sarat ake maloa d̄i kalu'u ade dafta dou-dou siwe mambaru mboha: umuna wati loana kura inimpuru mba'a, ntoina cuma sakalimpa nikana, 10nambou kai dou siwe ma karawi lampa rawi-lampa rawi ma taho, b̄une misakai: wa'ura kana'ena anad̄ohona kai taho, nasana tarima dou-dou marongga d̄i umana, nakarawi kab̄uaku dou-dou ma'imbi, nabantuku dou-dou ma susa, ro nakarawi kapodaku ade samenana karawi ma taho.
11Aina kalu'umu d̄ei dafta ede dou-dou siwe mbaru mboha ma mbuipu to'i umuna. B̄ara nggara namaisi adena mawancu tenggo, siad̄oho nane'e nika wali, ro nawi'i pakiku Al Masih. 12Ndad̄i siad̄oho nancara b̄ara rungkana sake rambei d̄i Sia. 13Ndede wali siad̄oho napaki-pakiku wakatu kai losa lu'una uma dou. Ro ma ipi iha wali, eded̄u b̄a one siad̄oho natana'o fitina ngara dou makalai ro kalu'u weki d̄i urusana dou ro nanuntuku lampa rawi-lampa rawi ma wati patu d̄i nuntu. 14B̄ara ndedena ne'e b̄a nahu dou-dou siwe mbaru mboha mambuipu to'i umu nika wali, raka ana ro uru uma ra salajana, loakud̄u musu-musu ndaita wati rakana ncai d̄i ka'iha-ihakaina ngara ndaita. 15B̄ara wara dou-dou siwe mbaru mboha ma wa'ura santuda b̄atu Ibilis. 16Pala nggara sab̄ua dou siwe ela Al Masih nantau anggota iwa ra weki ma wa'ura mbaru mboha, sia pab̄uaku bantuna dou-dou siwe mbaru mboha ede; aina co'omu ela Ruma ma tangguna siad̄oho. Ade ndedekaina ela Ruma naloa bantu dou-dou mbaru mboha ma wati ntau poda iwa ra wekina.
17Dou mana'ekai ela Ruma ma kalampa taki ra putana kai taho, patu d̄i kaco'i d̄ua kali lipa, mapenti poda siad̄oho ma caha hotoba ro ngoa ra tei. 18#Ul. 25:4, Mat. 10:10, Luk. 10:7 B̄ara ade Alkitab ratunti, ”Capi ma wunga tonda-tonda gando d̄i kahorokai isi gando rad̄i wurina, aina rantemu asana”, ro, ”Dou ma karawi, nantau hak d̄imatarima ufana”. 19#Ul. 17:6, 19:15 Aina tarima aomu lo'o ra b̄ab̄u d̄i sab̄ua dou mana'ekai ela Ruma, selasi katenggo b̄a d̄ua dou sakasi atao ncewi. 20Dou ma karawi dosa, pab̄uapu d̄i rojo d̄i tando samenana ela Ruma, loakud̄u dahu ma kalaina.
21D̄i tando Ruma Hatalla, Ruma Isa Al Masih, ro mala'eka-mala'eka rakad̄ale, raho poda b̄a nahu loakud̄u nggomi b̄atumu ngoa ra tei-ngoa ra tei ake kai dawara kacaimu d̄i cou-cou, ro wati horumu cou-cou. 22Aina ipi roci toho rimamu d̄i sab̄ua-b̄ua dou d̄i kasaha kai rahanta ndad̄i dou makarawi ru'u Ruma. Nggara dou makalai madosa, aina b̄atumu karawi ade dosa ede. Sandakapu wekimu loakud̄u ngge'empa rasona.
23Ai walina nono oi mpoa; nono raupu anggo sato'i d̄imabantu makalelo ngaha ra nono d̄ei lokomu, b̄ara nggomi ntuwu supumu.
24Dosa sarunde dou, sawatipu b̄a paresa ncihi ra carana, nawa'ura tada poda. Pala dosa dou makalai ampo d̄i b̄ade sawa'u b̄a paresa ncihi ra ncarana. 25Ndede rau karawi mataho d̄i eda lalo. Ro kone ma wati mod̄a d̄i eda, wati loana cili weki ncau.
Currently Selected:
1 TIMOTIUS 5: LAIBHP
Highlight
Copy
Compare
Share
Want to have your highlights saved across all your devices? Sign up or sign in
@LAI 2001
