KIDUNG TUUNO 3
3
1Popook-popook doi kukoy moloan,
doi kuolumon lalomo yaku umboliiyo daku bibian;
kuumboliiyo yana, bai percuma.
2Yaku yase bangun tukon boilingiyo kota,
ampakoniomo saibino kololoon tukon liasan.
Yaku yase umboliiyo konoanggu pupulosono;
kuumboliiyo yana, bai percuma.
3Yaku pinosunggon kopadagai kota tukon yaku sadayo,
“Kai komuyu kitayo konoanggu pupulosono?”
4Sosoodoan daku tinggalano yanila,
kuposunggene konoanggu pupulosono.
Kutaanio yana, tukon aki kusodiiyo
sampe kubabayo doi tinanggu nabonua,
doi mian nakombiang mo suunge yaku.
5Poperjanjimokai, eh koboine-boine doi Yerusalem,
demi donga-donga tukon kijang-kijang doi padang,
baikon komuyu aki pogangguwo komian nabibian,
sampe yana nambambul.
Nyanyian Kotoluno
Boine
6Kai domo lubatoo luwedoi padang gurun,
pokakana kotibolung bubut?
Nababangian buno mur tukon kamangian,
tukon pupur-pupur mobabangi luwedoi pedagang.
7Kitayo, doya Salomo natanda
binoilingi noom kolono komian mobarani,
Israel mian-mianno mobarani,
8mopangalamano doi polobosian lalomo.
Yanila sasaibino makanggi sabel doi oako
siap mosasalaane kopolobosian doi tempo popook.
9Salomo mokubaikene kobutongo meeng kotampat osulangan motinanggung,
luwedoi kayung mo monggol tuuno.
10Koposokolo kinubai luwedoi salaka,
tukon kososinggalangano luwedoi mosoni.
Tampat naosulangan berwarna ungu,
sinuji tukon noa sanaang
doi boi-boine Yerusalem.
11Sumbutokia, eh koboine-boine doi Sion,
kitayo Tomundo Salomo
tukon songgo tinano mopasange,
doi oloyo nabanikaan,
doi oloyo yana natedesan.
Currently Selected:
KIDUNG TUUNO 3: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
