ROMA 10
10
1Utus-utus! Yaku poloon tuuno sulano daku bangsa nasinalamaton. Tukon yaku tutuu sambeang doi Mian Bisa tuuk doi yanila. 2Yaku barani bantile baikon yanila samangat tuuno mangangga doi Mian Bisa. Bai yaniladoo nasamangat aki nadasarkanggene motoiyan mo luwedoi Mian Bisa. 3Yanila aki natoiyo ko Mian Bisa nacara mokubaiyo kobanggapi napotaamian tukon yana moteali monondok koidan. Tukon sabab yanila yase loingiyo yanila nacara susuungo, maka yanila aki namololoi kocara ko Mian Bisa natinudoikon. 4Aturan agama lapamo Kristus daanokene. Jadi memeeng komian mo mangangga doi Kristus, kona potaamian tukon Mian Bisa tealimo monondok koidan.
Kokasalamatan daano motuuk doi sasaibino komian
5 #
Basam. 18:5
Musa tulise baikon komian mo pomonondokon tukon Mian Bisa luwedoi agama aturano, do mianoo naikon tubo sabab loingiyo do aturan agamadoo. 6#Kua. 30:12-14 Bai manganai cara mian pomondokon tukon Mian Bisa luwe manganggaan doi Mian Bisa, Kitab Moliyous bantile buno naiya, “Mau kai naaki Ikoo mubantile doi noamu lalomo, ‘Indeemo kai naikon komo liba doi surgaa?’ (alatino babayo Kristus obulus), 7kai ‘Indeemo naikon komo loboson doi dunia mian mate?’ (koalatino bingkate Kristus liba doi matean).” 8Kona makisuut buno naiya, “Bilita doi Mian Bisadoo loolani tuuno doikoo; doi babamu tukon noamu lalomo.” Doiyamo kobilita kami mo babilitakene; bilita baikon komian sio namangangga. 9Sabab kalu Utus mangaku tukon suumu baikon “Yesus doiyamo Temeneno”, tukon Utus mangangga doi noamu lalomo baikon ko Mian Bisa lapamo otuboiyo Yesus doi matean, maka Utus naikon salamat. 10Sabab tukon mian noano mo mangangga, tobikon ko Mian Bisa talimayo yana buno mian mo pomondokon tukon Mian Bisa. Tukon mian babano momangaku, tobikon yana sinalamaton. 11#Yes. 28:16 Doi Kitab Moliyous totulis, “Mian mo mangangga aki naikon nainokimaa.” 12Doiya tealimo doi sasaibino komian, sabab akiyo kona posasalaan antara Yahudi miano tukon mian bangsa bailon. Mian Bisa mo meengoo daano Temeneno motuuk sasaibino komian. Yana mebee balakaat mo lobi-lobian doi sasaibino komian mo mangkabi tulung doi Yana. 13#Yl. 2:32 Doi Kitab Moliyous lalomo totulis, “Sasaibino komian mo nggeleamon doi Temeneno, naikon salamat.”
14Bai bulaando kai komian momoola nggeleamon doi Temeneno kalu yanila akiyoon namangangga? Tukon bulaando kai yanila momoola mangangga doi Temeneno kalu yanila akiyoon namolongol tentang Yana? Koidan, bulaando kai yanila momoola molongol tentang Temeneno, kalu akiyo komo babilitakene? 15#Yes. 52:7 Tukon bulaando kai komian momoola babayo do bilitadoo kalu yanila aki nabinintokon? Doi Kitab Moliyous lalomo totulis buno naiya, “Bukan maen kona monondokan komian molubat mo babayo ko Bilita Monondok moluwedoi Mian Bisa!” 16#Yes. 53:1 Bai aki nasasaibino komian mantarima do Bilita Monondokoo. Sabab Yesaya bantile, “Temeneno, indee kai komo anggayo komai bilita?” 17Doiya kosababpo komian moteali mangangga sabab yanila molongol bilita, tukon kobilita linongol sabab daano komian mo babotilanggene tentang Kristus.
18 #
Sad. 19:4
Bai yaku mansadai: Oilakai bisa yanila akiyoon namolongol do bilitadoo? Pasti lapamo! Sabab doi Kitab Moliyous lalomo totulis buno naiya,
“Yanila alalo tololongolo doi posaapon kodunia,
yanila nabantilan-bantilan lapamo polong doi lipu bunduno.”
19 #
Kua. 32:21
Yaku mansadai koidan: Oilakai bangsa Israel akiyoon namotoi? Sodiiyomo do pasadaidoo tumbe-tumbeno Musa natimbiliyo. Musa bantile, “Buno naiya ko Mian Bisa nabantilano,
‘Yaku naikon kubaiyo komuyu masakit konoamuyu doi bangsa mo bolikon umat
tukon yaku naikon kubaiyo komuyu nggimal doi meeng kobangsa mo longas.’ ”
20 #
Yes. 65:1
Yesaya pololokon koidan barani. Yana bantile, “Buno naiya ko Mian Bisa nabantilano,
‘Komian mo aki naumboliiyo Yaku, lapamo pososuunggene Yaku;
tukon Yaku okitakene Kobutonggu doi yanila mo aki namansadaikene tentang Yaku.’ ”
21 #
Yes. 65:2
Bai manganai bangsa Israel Yesaya bantile, “Buno naiya ko Mian Bisa nabantilan, ‘Sasamba kooloyo Yaku ulule kolimanggu doi meeng kobangsa mo matikas konoano tukon aki nataat.’ ”
Currently Selected:
ROMA 10: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
