ROMA 6
6
Mate doi lalim tukon tubo pomeenggon tukon Kristus
1Kalu buno doiya, oilakai komo moola kita bantile? Siokai kita momeenggon kubaiyo kolalim sulano napololokon Mian Bisa seseange kita? 2Tantu aki! Lalim akimo nabalakuasa doi kita, jadi, bulaando namoola kita tubo banggadudul momeenggon kubaiyo kolalim? 3Utus-utus kai toiyo baikon doi tempo nda sinauwan, kita pomeenggon tukon Kristus Yesus? Naiya koalatino kita pinomeenggon tukon namatean. 4#Kol. 2:12 Tukon do sinauwanoo, kita kinibul tukon Kristus tukon malaing mate posinggat yana, sulano buno Kristus nai notuboiyan doi matean luwe Tama nakuasa mo moliyous, bunomo lakon kita moola ompokoniiyo kotuboan mo boolu.
5Kalu kita lapamo teali pomeenggon tukon Kristus sabab kita malaing mate posinggat Yana, kita naikon teali meeng tukon Yana koidan sabab kita polaing inotuboi koidan buno Yana. 6Kita toiyo baikon konda sipat loolukon buno banggapi molapamo inakate posinggat-singgat Kristus doi kayung sempang sulano kokuasa nda sipat mo baladosadoo naminanas; tukon buno doiya kita akimo koidan nda teali ata doi lalimoo. 7Sabab kalu memeeng komian momate do mianoo inosodiimo doi lalimoo nakuasa. 8Kalu kita lapamo mate posinggat Kristus, kita anggayo baikon kita koidan naikon tubo posinggat Yana. 9Sabab kita toiyo baikon Kristus lapamo inotuboi doi matean tukon Yana naikon akimo namate koidan; komatean akimo nakuasaiyo kobutongo. 10Komatean Kristus mo toupiyo doiyamo do mateanoo doi dosa. Doiya teali idan luunggon tolong tuuk sidutu-posidutukon. Tukon tuboan nalinoloi diabudodoo nia doiyamo tuboan motuuk doi Mian Bisa. 11Komuyu sio koidan poaanggene kobutomuyu matemo doi lalim, bai tubo doi potaamian mo moonggol tukon Mian Bisa lolo doi Kristus Yesus.
12Inaimo mosodiikene kolalim nakuasaiyo komu tuboan sulano Utus inai muloingiyo komu mongiasan mo lokis. 13Inaikai koidan Utus mosalakanggene kobutomu naanggota doi lalim nakuasa sulano napinake doi makisuut-makisuut mo lokis. Bai salakanggene kobutomu doi Mian Bisa buno mian mo lapamo biniyol luwe matean doi tuboan. Salakanggene kobutomu sasaibino doi Mian Bisa sulano napinake tuuk molakukanggene ko Mian Bisa namongiasan. 14Lalim aki namoola kuasaiyo komuyu sabab komuyu akimo potubo koidan doi aturan agama Yahudi bai tongo luwe Mian Bisa namaasi.
Ata doi Mian Bisa namongiasan
15Budodoiya, oila kona kasimpulan? Moola kai kita baladosa, sabab kita akimo koidan nda kinuasai agama Yahudi naaturan, baikai luwedoi Mian Bisa namaasi kuasano? Tutuu aki! 16Komuyu kai toiyo baikon kalu komuyu salakanggene kobutomuyu doi memeeng komian sulano nalakukanggene kona mongiasan maka komuyu daano do mianoo naata komuyu mo taatiyodoo – kai lalim naata mo babayo komuyu doi matean, kai ata mo taat doi Mian Bisa, tukon kalu buno doiya pokindokon koidan doi Mian Bisa. 17Bai sukuur doi Mian Bisa! Sabab looluk komuyu teali lalim naata, bai budodoiya komuyu tukon sasaibino konoamuyu taatiyo kootunggul mobisa mo lapamo bineekon doikoo. 18Komuyu lapamo inosodii doi lalim, tukon budodoiya teali ata motuuk doi Mian Bisa namongiasan. 19Sabab komu pikilan todudul muyuk, yaku mapake sontoh-sontoh baataan sulano namoola komuyu mangalati. Loolukon komuyu salakanggene kobutomuyu sasaibino buno ata doi langge-langge mo manggilit tukon mo lokis motuuk doi makisuut mo lokis. Bunomo koidan diabudodoo, siokai komuyu posalakanggene kobutomuyu buno ata doi Mian Bisa namongiasan motuuk doi Mian Bisa namakisuut-makisuut mo tantu.
20Tempo komuyu kinubai ata doi lalim, komuyu akimo pokinuasai doi Mian Bisa namongiasan. 21Doi tempodoo oila kountungan komuyu mo talimayo doi langge-langge naiya budodoo nia komuyu mamaa molakukanggene? Kokubai-kokubaidoo tongo babayo komatean! 22Bai diabudodoo komuyu lapamo sinodii doi lalim, tukon teali Mian Bisa naata. Komu untung doiyamo baikon Utus tubo tongo tuuk Mian Bisa tukon do langgedoo lubatene kotuboan mobisa tukon posidutukon. 23Sabab komatean doiyamo patambo lalim; bai tuboan mobisa tukon posidutukon polaing Kristus Yesus nda Temeneno doiya sabeat Mian Bisa mo beekene tukon cuma-cuma.
Currently Selected:
ROMA 6: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
