ROMA 5
5
Pokindokon koidan tukon Mian Bisa
1Diabudodoo kita lapamo pokindokon koidan tukon Mian Bisa, sabab kita mangangga. Tukon doiyamo kosababpo kita tubo doi podamean lalomo tukon Mian Bisa lolo doi nda Temeneno Yesus Kristus. 2Sabab kita mangangga doi Yesus, maka Yana moolakene kita molasaiyo ko Mian Bisa namaasi, tukon do maasidoo doiyamo kita tubo diabudodoo. Tobikon doiya kita laba-laba sabab kita daano konda moinian baikon kita naikon daano motoupi kona monondokan Mian Bisa mo beekene! 3Tukon lobian doiyadoo, kita lakon laba-laba doi sakisaa lalomo, sabab kita toiyo baikon kosakisaa kubaiyo komian teali moonggol, 4tukon domoonggolanoo naikon kubaiyo komian taane koudian; naiyamo komo sumbetene komoinian. 5Moinian mo buno naiya aki naikon naokimaayo kita, sabab konoanggita lapamo Mian Bisa totuiyo tukon namaasi. Mian Bisa lakukanggene doiya tukon lolo doi Na Roh, mo lapamo beekene doi kita.
6Salataa kita daano doi ndondoong akiyono kodaya, Kristus mate tuuk doi kita doi tempo motapaat Mian Bisa motantukanggene; banggokai kita mian mododoon doi Mian Bisa. 7Mau kai doi meeng-meeng komian mo adil bai maaling komian moyase mate. Ugaatene tuuk doi meeng komian monondok, daano koidan komian mobarani mate. 8Bai ko Mian Bisa okitakene kona maasi doi kita salataa Kristus mate tuuk kita doi tempodoo kita daano mian mobaladosa. 9Diabudodoo kita lapamo pokindok koidan tukon Mian Bisa mololoi Kristus namatean; tobikon doiya pasti kita naikon sinalamaton koidan luwedoi Mian Bisa nanggimalan doi Kristus. 10Kalu doi lounu kita pomusu tukon Mian Bisa, kita pinoodamekon tukon Yana lolo doi Na Pau namatean, baino kai koidan diabudodoo molapamo konda potaamian tukon Mian Bisa mondoko koidan, tantu kita naikon sinalamaton mololoi Kristus natuboan. 11Tukon lobian doiyadoo, kita laba-laba koidan luwe Mian Bisa namonondokan mololoi nda Temeneno Yesus Kristus. Sabab mololoi Kristus, kita diabudodoo lasaiyo konda potaamian mo monondokoo tukon Mian Bisa.
Adam tukon Kristus
12 #
Tea. 3:6
Lalim usok doi dunia lalomo luwedoi meeng komian, tukon luwedoi lalimoo sumbot komatean. Kona akibat, komatean landa doi sasaibino kobanggapi, sabab sasaibino kobanggapi baladosamo. 13Akiyon koaturan agama Yahudi nabineekon, lalim daanomo doi dunia nia lalomo. Bai kolalim aki natinuntut sabab akiyo koaturan mo moola linumpai. 14Mau, doi Adam nalounu polong doi Musa nalounu, komatean kuasaiyo sasaibino kobanggapi. Bai komian mo aki namokubai palanggaran tukon cara mo pokakana buno Adam nakinubai, do mianoo turut koidan matean nakuasaiyo.
Adam daano timbalan doi yana naikon mo lubat doibundu. 15Bai domo luailadoo aki napokakana; sabab ko Mian Bisa nabineekon lobian mododoon kona babasalan kalu pinosasalakon tukon Adam napalanggaran kinubai. Meeng komian napalanggaran mangaanikene badaang komian momate. Bulaando koidan lobian babasal kona akibat doi Mian Bisa namaasi tukon natambo kasalamatan bineekon doi madaangan komian, luwe namonondokan Konoano doi meeng komian, doiyamo Yesus Kristus. 16Mian Bisa natambo koidan lobian odoon kona babasalan doi meeng komian nalalimoo. Sabab sambuno lapa meeng komian lakukanggene do palanggaranoo, tobuat kokaputusan, “salamo”. Bai salataa badaango komian mokubaiyo kolalim lubato ko Mian Bisa natambo mo okitakene, “Aki nasala”. 17Tobikon meeng komian napalanggaran, komatean landa doi yayaa lolo doi mianoo momeeng. Bulaando lobian babasal koidan kona akibat oila doi meeng komian bailon nakinubai, doiyamo Yesus Kristus. Luwedoi Yana, ko Mian Bisa beekene kona maasi doi badaang komian, tukon cuma-cuma mominoolakon yanila pokindok koidan tukon Mian Bisa; yanila naikon balakuasa doi dunia luwe Kristus.
18Jadi, bunomo doiya meeng komian napalanggaran mangaanikene sasaibino kobanggapi inukum, bunomo lakon koidan meeng komian nakokubai mo loingiyo ko Mian Bisa namongiasan, mangaanikene sasaibino komian sinodii doi nakasalaan tukon binee tuboan. 19Tukon bunomo lakon badaang komian moteali mian mobaladosa sabab meeng komian moaki nataat, bunomo lakon koidan badaang komian mominoolakon pokindokon koidan tukon Mian Bisa sabab meeng komian motaat doi Mian Bisa.
20Komo beekene koagama Yahudi aturano doiyamo Mian Bisa susuungo. Bai pololokon kobanggapi kakaate motaatiyo do aturano, pololokon yanila lupaiyo tukon baladosa doi Mian Bisa. Mau napololokon kobanggapi kubaiyo kolalim, ko Mian Bisa pololokon seseange yanila. 21Nah, kita sio nda mate sabab kita kubaiyo kolalim. Bai ko Mian Bisa seseange kita tukon beena loloon doi kita sulano pokindokon koidan tukon Yana. Tukon sabab nda potaamian tukon Mian Bisa lapamo monondok koidan, Yana mebeekon tuboan mobisa tukon posidutukon doi kita luwedoi nda Temeneno, Yesus Kristus.
Currently Selected:
ROMA 5: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
