SADEONG 81
81
Nyanyian doi tempo balameanan
1Tuuk mokatuaiyo konyanyian. Loingiyo kolagu: Gitit. Luwedoi Asaf.
2Manyanyikenekai kongganggaalano motuuk doi Mian Bisa, nda moinian bukuanan,
powowookonkao tukon labalaba doi Yakub na Mian Bisa.
3Bantengekai kobobolon, manyanyikenekai kolagu,
kutiyokai kogambus tukon kacapi sio namerdu.
4 #
Bang. 10:10
Puukekai kotorompet doi nda oloyo babasal,
doi lamekanano kobituwon boolu tukon bituwon babasal.
5Sabab dolanggedoo meeng koaturan doi Israel,
meeng koparentah mo luwedoi Yakub na Mian Bisa.
6Yana tealikenemo meeng kokatatapan doi bangsa Israel,
salataa yana maju lawane ko Mesir.
Yaku lengele kosilingan moaki kutoiyo,
7“Yaku lapamo bingkate ko barang mo tinanggung luwedoi benggumu,
tukon liate kobois natinanggung moluwedoi limamu.
8 #
Tob. 17:7; Bang. 20:13 Doi mususaan lalomo komuyu uwang,
tukon Yaku salamatene komuyu.
Yaku timbiliyo komuyu luwedoi duluk lipu Kubasookonan,
Yaku ujiyo komuyu doi Meriba, paisuno matano.
9Lengelekai Dakupoingotii, eh Dakumian,
Israel, kalukai komuyu yase molongolaku!
10 #
Tob. 20:2-3; Kua. 5:6-7 Inai doi antara komuyu daano komo sosubaiyo ko temeneno bailon,
inaikai mososubauyo ko temeneno molulubaton.
11Yakumokai ko Temeneno mu Mian Bisa,
moandane komuyu tobuat luwedoi Mesir.
Doi tempo po malaalan Kubeenggomuyu kaan.
12Bai Dakumian aki naiyase ndongoliiya-Ku,
Israel aki naiyase taat doiya-Ku,
13Tobikon doiya Yaku sobiiyomo napo katikase konoano;
sobiiyomo napo loingiyo konapo mongiasan susungu.
14Ah, kalukai Dakumian yase ndongoliiya-Ku,
kalukai yanila yase taat doiya-Ku,
15Maka tukon soisobit Kuakalayo kona musuh,
tukon lungguiyo sasaibino konapo lawan.
16Komian momosikitana-Ku naikon Yaku lungguiyo,
yanila naikon inukum tuuk sidutu-posidutukon.
17Bai Dakumian Yaku naikon beena makaan gandum momonondok tuuno,
tukon Yaku tealikene bobosul tukon ani dokoto.”
Currently Selected:
SADEONG 81: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
