SADEONG 78
78
Mian Bisa tukon Namian
1Asaf nanyanyian otunggul.
Eh dakubangsa, ndongoliyokai dakuotunggul,
perhatikanggene dakubantilan-bantilan.
2 #
Mat. 13:35
Yaku yase mabantil pepata tukon andean,
tukon tarangkanggene kososombot doiloonu loolukon,
3langge-langge kami molengele tukon kami motalimayo,
mosinalitakon luwedoi napo mbumbu tulunan.
4Kami aki mai yase molasiakanggene domai pau-pau;
kami yase babontilanggene doi mian motubo doibundu
tentang ko Temeneno nakuasa tukon Kona limang-limang babasal,
tukon Nakokubai-kokubai mominasaindinggon.
5Doi bangsa Israel Yana beekene Konaukum
tukon doi Yakub nakatulunan Yana beekene Konaparentah.
Yana sumboliyo kondakatulunan
Naotunggukene doi napo pau-pau,
6sulano komian motubo doibundu natoyo,
maka napootunggukene koidan doi napo pau-pau.
7Tukon kalu bunodoiya yanila koidan
naikon mangabos moinian doi Mian Bisa,
tukon aki toliminggene Kona kokubai,
bai sidutu taat doi Naparentah,
8sulano naaki napokakana konapo tulunan
moiyase mbuwol tukon durhaka;
generasi penerus mounggot kona iman,
tukon aki nasetia doi Mian Bisa.
9Efraim nabenseno momapake sinapan panah tukon katapel,
yanila bulenggene kobutongo doi tempo polobosian.
10Yanila lupaiyo ko Mian Bisa napaladandian tukon yanila,
tukon aki naiyase taat doi Nahukum.
11Yanila toliminggene naikon Kona kokubai-kokubai,
tukon langge-langge minasaindinggon Yana mookitakene doi yanila.
12 #
Tob. 7:8–12:32
Doi napombumbu napotulunan salaano, ko Mian Bisa, mokubai langge-langge minasaindinggon
doi tano Mesir, doi Zoan seanono.
13 #
Tea. 14:21-22
Yana batayo kotobun, maka Napintasene yanila;
kopaisu Yana atadeo pokakana kobondungan.
14 #
Tob. 13:21-22
Yana andane yanila tukon bunom doi tempo oloyo
tukon bilat laango madialan popupuson kopopook.
15 #
Tob. 17:1-7; Bang. 20:2-13 Yana batayo kobunggul batu doi padang lalomo,
tukon beene yanila monginum paisu lobi-lobian.
16Bunggul batu Yana sumboliyo namotobuaton paisu,
maka lombamokai kopaisu pokakana kopaisu batango.
17Bai yanila banggadudul momokubai lalim doi Mian Bisa,
doi gurun yanila nggimal tuuk doi Mo Tatandak Tuuno.
18 #
Tob. 16:2-5; Bang. 11:4-23, 31-35 Yanila sangaja mosobaiyo ko Mian Bisa,
tukon yanila tuntute kokinaan yanila moiyase.
19Yanila tumbokiiyo ko Mian Bisa tukon bantile,
“Molakai ko Mian Bisa mobeena kita kinaan doi padang gurun?
20Takainomo Yana umbase kobunggul batu momotikas,
sampe kopaisu lomba tukon makasang.
Bai moolakai Yana, koidan mosadiayo koroti
tukon beene sail doi Namian?”
21Sambuno lengele doiya, ko Mian Bisa nggimal tukon lubotiiyo lobosiyo Kona mian tukon bilat;
Kona nggimalan motuuk doi yanila pololokon teali,
22sabab yanila aki namaangga doi Mian bisa,
doi Nakuasa komo moala salamatene yanila.
23Maukai nabunodoiya Yana palentayo kotimbu
sulano nabukaiyo konatataapon-tataapon.
24 #
Yoh. 6:31
Yana bulusene kogandum moluwe doi surgaa,
manna tuuk napo kinaan.
25Yana beena yanila kinaan molobi-lobian;
yanila makaan malaekat naroti.
26Yana koidan sumboliyo komombuul tolopot napuul,
luwe Nakuasa komombuul lalom puul.
27Yana bulusene kotomisi-tomisi doi Namian,
kona kadaang pokakana kobone moaki natangait.
28Yana tuwenge dotomisi-tomisidoo doi basandungan,
doi potikunggon kolipu napo dungolan.
29Maka yanila makaanokai polong bobosul,
sabab ko Mian Bisa lapamo beena doi yanila oilamo konapo iniyas.
30Bai konapo moot akiyono koidan nakambul
jadi yanila banggadudul kaan momeenggon.
31Ko Mian Bisa nggimaal tukon tumbokiyo yanila,
Yana akateo ko Israel mian-mianno motabokon tukon tambongan barani.
32Maukai nabunodoiya Konamian tataap baladosa,
Konalangge-langge kinubai mominasaindinggon aki nakubaiyo yanila teali mangangga.
33Maka ko Mian Bisa opupuse konapo tuboan pokakana koansaang,
konapo taun-taun kabus doi matakutan lalomo.
34Sasamba lunggon ko Mian Bisa namangakate moi-moiya doi antara yanila,
kobailonggon manasal tukon abali doiya-Na.
35Yanila neneke baikon ko Mian Bisa napo soopan,
tukon baikon Mo Tatandak Tuuno pasalamat.
36Bai yanila kakalaiyo Yana,
konapo bantilan-bantilan kala tuuno.
37 #
Kis. R. 8:21
Yanila aki nasetia doi Yana,
tukon aki nabatani doi Napaladandian.
38Bai ko Mian Bisa mamaasikene tukon ompuniyo Konamian,
tukon aki nalapusene yanila.
Badaang lunggon Natane Konanggimalan,
tukon aki naosumbute Konaliitan.
39Yanila neneeke baikon yanila tongo makluk mofanaa,
pokakana kombombuul moalon tukon aki naabali koidan.
40Bubula luunggon napo nggimal doi Yana,
tukon sakitiyo Konoano
doi tempo napo danoan doi padang gurun.
41Badaang lunggon napo sobaiyo ko Mian Bisa,
kubaiyo susah Komo Moliyous, Israel na Mian Bisa.
42Yanila aki naneneeke naikon konakakuasaan,
naikon kooloyono yana moolupute yanila luwedoi musuh,
43doi tempo namokubaian langge-langge mominasaindinggon doi Mesir,
tukon mujizat-mujizat doi padang Zoan.
44 #
Tob. 7:17-21
Konapo paisubatango-paisubatango binolii teali sau,
sampe aki napo moola inume kopaisuno.
45 #
Tob. 8:1-6, 8:20-24 Yana sakisayo yanila tukon poos mobadaang,
tukon batadikene konapo buta tupak namanase.
46 #
Tob. 10:12-15
Yana lubatene kobesuk tukon betek,
moakabuse kolangge saono tukon kokombung hasilo.
47 #
Tob. 9:22-25
Yana rusayo konapo anggur batango tukon udan batu,
tukon konapo ara batango-batango tukon linggous mokundot.
48Yana batadikene koudan es sulano natepake konapo iyayon piniala,
tukon koselese tepake konapo iyayon-iyayon.
49Yana sumbutene Konanggimalan mokolot-kolot
tukon mosumbolii bito-bito meeng kopasukan
malaekat matean mokubaiyo yanila bontol konamoinian.
50Yana aki nataane Konanggimalan kai seseange konapo tuboan,
bai yana silakaiyo kabus yanila tukon sesel mobadonggiti tukon minatekon.
51 #
Tob. 12:29
Yana akateo kopau mala-malaneno langgongo
doi sasamba korumah tangga doi Mesir.
52 #
Tob. 13:17-22
Maka Yana totoliyo Konamian pokakana kodomba tambuno badaang,
tukon andane yanila loloiyo kopadang lalomo.
53 #
Tob. 14:26-28
Doi Naandanano lalomo yanila aman tukon aki namatakut,
sabeakai konapo musuh molomos doi tobun lalomo.
54 #
Tob. 15:17; Yos. 3:14-17 Maka Konamian Yana babyo doi Nabuta moliyous,
doi lipu bunggulo Yana molambase susuungo.
55 #
Yos. 11:16-23
Doi Namian salaano Yana sikayo komian modungol idoo
maka Yana ebe-ebese dotanodoo
doi sasaibino kobangsa Israel benseno, doiyamo Namian,
sampe yanila moola dungoliyo komusuh nasandung-sandung.
56 #
Tan. 2:11-15
Bai yanila nggimal tukon ujiyo ko Mian Bisa Moinakatandak Tuuno,
Kona parentah-parentah aki napo taatiyo.
57Yanila aki naloingiyo pokakana konapo mbumbu,
tukon aki namoola inangga pokakana kobusur mopatek.
58Yanila tumbokiiyo ko Mian Bisa tukon lipu mososubaiyan pilogot,
tukon kubaiyo Yana masakit konoano
tukon napo timbalang-timbalang.
59Sambuno kitayo doiya, ko Mian Bisa nggimal tuuno,
tukon tolayo banggadudul yanila.
60 #
Yos. 18:1; Yer. 7:12-14, 26:6 Yana tinggale Konasandung doi Silo,
lipu Nadungolan doi antara banggapi.
61 #
1Sam. 4:4-22
Yana batadikene Kona Peti Paladandian natinaan,
paloosan Kona babasalan namusuh lambase.
62Yana nggimal doi Namian, koona Napusaka,
tukon batadikene napo inakate tukon sabel.
63Konapo tabo-tabo kinaan bilat,
akiyo komo mokita konapo pau-pau boine.
64Konapo imam-imam inakate tukon sabel,
konapo balu-balu aki namoola kokiil.
65Maka ko Temeneno bangun kokondong pokakana komian mobangun doi namooloan,
pokakana komian bukuan salataa lapa monginum anggur.
66Yana umbase basulakon Konamusuh,
tukon lungguiyo yanila polong sidutu-posidutukon.
67Bai Yana tolayo Yusuf nakatulunan
tukon aki nalilike Efraim nabenseno.
68Konalinilik doiyamo Yehuda nabenseno,
tukon Sion Bunggulo Yana moseange.
69Yana bangune Kona Bonua pokakana Konadungolan doi surgaa,
tukon pokakana kodunia, moonggol tuuk sidutu-posidutukon.
70 #
1Sam. 16:11-12; 2Sam. 7:8; 1Tund. 17:7 Yana lilike Daud teali Naata,
tukon ndokiiyo yana luwedoi naiyayon piniala,
71luwedoi lipu Nabapialan domba tinano,
sulano natotooliyo ko Israel Namian.
72Daud pialayo yanila tukon tootubo konoano,
tukon napandoian yanila andane yana.
Currently Selected:
SADEONG 78: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
