SADEONG 57
57
Sambeang makabian tulungan
1 #
1Sam. 22:1, 24:3 Tuuk mokatuaiyo konyanyian. Loingiyo kolagu: Inai moakateyo. Sadeong moluwedoi Daud, doi tempo nabulenan doi leeng lalomo nabulengganano Saul.
2Mamasikanakukai, oh Mian Bisa, mamasikanakukai,
sabab doikomokai dakusoopan.
Doi kapilomu suukano dakubasookonan,
sampe kobokol mobabasal tade.
3Yaku uwang doi Mian Bisa Mo Tatandak tuuno,
doi Mian Bisa momokubai tindakan doiyaku.
4Luwedoi suluga Yana timbiliyaku tukon salamatanaku;
Yana lungguiyo komian-mian molailaingganaku.
Ko Mian Bisa naikon otudoikene baikon Yana setia doiyaku,
tukon sidutu mamasikananku.
5Yaku linubotii musuh,
yanila pokakana kosinga mokaane kobangkapi.
Kongolingoila pokakana kokalait tukon panah,
koalepoila pokakana kobakoko momamangan.
6Oh Mian Bisa, otudoikenekai Komubabasalan doi timbu,
tukon Komutaanggaan doi posaapon kodunia.
7Daku musuh talongganaku,
tukon lotoyo dakusemangat.
Yanila makali bitu doiloloon,
bai yanila susungo tuwong doi lalomo.
8Yaku maangga tutuu, oh Mian Bisa, yaku maangga tutuu,
yaku yase manyanyi tukon nggaale Ikoo.
9Eh bangunokai, dakujiwa!
Eh bangunokai, kogambus tukon kacapi!
Yaku yase mobangune kooloyo panano.
10 Temeneno, yaku yase mobasuukur doi-Koo
doi antara ko bangsa-bangsa.
Yaku yase monggaale Ikoo tukon manyanyian
doi antara sasaibino kobangkapi.
11Sabab Komumaasi babasal polong doi timbu,
tukon Komu kasetiaan polong doi bunom-bunom.
12Oh Mian Bisa, otudokenekai Komubabasalan doitimbu,
tukon Komutaanggaan doi posaapon kodunia.
Currently Selected:
SADEONG 57: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
