SADEONG 51
51
Sambeang makabian ampun
1Tuuk mokatuaiyo konyanyian. Daud na Sadeong kinarang 2#2Sam. 12:1-15 sambuno lapa Nabi Natan anukene yana sabab moposelekon tukon Betsyeba.
3Mamaasikanakukai oh Mian Bisa, sabab Ikoo tataap meseseang,
apusekai daku lalim sebab Museang mobabasal.
4Bilisiiyokai sasaibino daku kulokisan;
bilisiiyokai luwedoi kulalim.
5Sabab yaku akuiyomo daku kasalahan-kasalahan,
daku lalim sidutu kune-neeke.
6 #
Rm. 3:4
Tuuk doi-Koo, tuuk doi-Koo tolong yaku baladosamo,
tukon komu inanggon lokis yaku lakukenemo.
Tobikon doiya pantaso Muukumaku,
adilokai Komu kaputusan.
7Konatutuwan, daku kulokisan salataamo doi kusinungan,
tukon kanakono lalim salataa doi kutiniananggonan.
8Ikoo tuntute konamoloyosan komian noano;
koonoiyokai konoanggu tukon Mumaasi.
9Koliyousiyakukai, sulano naikon kubilisii;
kumesiyakukai, sulano kuteali moute liisiyo kokapos.
10Sobiiyakumo molongol bilita lalabaan,
sulano konoanggu Ikoo moakamanasemo nia teali lalaba koidan.
11Abalinggenekai kodudusoMu luwedoi kulalim-lalim,
tukon apusemokai sasaibino daku kasalahan-kasalahan.
12Pasitakayomokai konoa molino doiyaku, oh Mian Bisa,
kiboluwekai konoanggu tukon samangat mo bukuan.
13Inaikai mosakukanaku luwedoi salaa-Mu,
tukon inai moalayo Komuroh moliyous moluwe doi yaku.
14Kubaiyakukai laba-laba koidan sabab kasalamatan moluwe doi-Koo,
benggukai noa monondok sulano kutulut-tulutan doi-Koo.
15Maka yaku naikon otunggulikene Komuparentah doi mian baladosa,
sulano napoabali doi-Koo.
16Oluputakukai doi matean, oh Mian Bisa dakupasalamat,
maka tukon laba-laba yaku naikon babotilanggene Komu kaadilan.
17Oh Temeneno, tulungiyakukai basilingan,
sulano yaku ngganggaale Ikoo.
18Ikoo aki muyase kososubakon motinembel;
kalu andeno yaku mososubakon sosubakon mosinua, Ikoo aki mukilayo.
19Kososubakon doi Mian Bisa siokai noa momanasal tuuno,
noa momanasal tukon badodoloon aki Mutoiyo.
20Oh Mian Bisa, tudoikenekai Komumonondokkan doi Sion,
bangunekai kokoidan ko Yerusalem pagal-pagalo mobineton.
21Maka Ikoo naikon pokokonoi motalimayo kososubakon mominoolakon,
sosubakon mosinua tukon sosubakon mobisa
kosaapi langgilo naikon sinosubakon doi balabaan bunggono.
Currently Selected:
SADEONG 51: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
