SADEONG 50
50
Kaledaan motutuu
1Asaf na Sadeong.
Temeneno, Mian Bisa Mo Babasal Konakuasa, basilingan,
Yana masadai doi posaapon kolipu
luwedoi tolopot polong doi talise.
2Luwedoi Sion, kota momonondok tuuno,
Mian Bisa lubat tukon lalaangan.
3Konda Mian Bisa lubat tuko aki nabaino batingaakon,
Yana linolukoni bilat mokait-kait,
tukon tinokuuni sokoi molokis.
4Yana uange kotimbu tukon buta
tuuk mosakisiyo yana moadiliyo Konaumat.
5Katanya, “Pototongikenemokai saibino Daku umat
molapamo paladandi tukon Yaku,
tukon kinonggoli tukon sosubakon motinembel.”
6Kotimbu babotilanggene baikon ko Mian Bisa adiliyo Konaumat,
tukon baikon yana susungo konahakim.
7“Polengelekai, Daku mian, yaku yase basilingan,
Israel, yaku yase basakisii motuuk doi komuyu;
Yaku nia Mian Bisa, mu Mian Bisa.
8Bolikon sabab pososubakon yaku tuduwo komuyu;
komusosubakon mosinua sidutu daano doisalanggu.
9Aki kupalaluwo komusaapi modaano doi mukandang,
kai mbembe moluwe doi meeng kotambuno komu iyayon piniala;
10sabab sasaibino koiyayon doi mosolot daanokai konggu,
tukon koiyayon piniala modaano doilipuno.
11Sasaibino kotomisi doilipu nabunggulan doiya koidan konggu,
tukon sasaibino kolangge-langge motubo doipadang moluas lalomo.
12Kalu yaku malaal, aki napalaluu yaku bantile doikoo,
sabab kodunia tukon sasaibino koantoko daanokai konggu.
13Aki kukaane kosaapi langgilo sailo
aki koidan kuinume kombembe langgilo sauno.
14Sosubakenekai kososubakon sukuur doi Mian Bisa,
tapatiyokai komu paladandian doi Mo Tatandak Tuuno.
15Masadaikenekai doi Yaku doi tempo nasulitan,
Yaku naikon sobiiyomo komuyu,
tukon komuyu naikon ngaala-Ku.”
16Bai doi mian molokis ko Temeneno bantile,
“Ikoo akiyo komuhak mobantile Dakuukum,
tukon basilingan tentang Dakupaladandian.
17Sabab aki muyase talimayo Daku panganuukon,
tukon ikoo tolayo Daku parentah-parentah.
18Kalu ikoo kitayo komeeng kopondikuk, ikoo lainge yana,
tukon ikoo yase pololonggon tukon mian-mian moyase basindua.
19Ikoo sidutu bantile komo lokis,
tukon sidutu siap mobatipu.
20Ikoo momeenggon bapitanaakene koutusomu,
tukon bantil-bantile lokis koutusomu meeng kotama tina.
21Doiyakai komulinakukon, bai Yaku tongo batingaakon tolong,
jadi ikoo pikikene Yaku tongo pokakana ikoo.
Bai budodoiya Yaku asalakene ikoo,
tukon sasaibino doiya Yaku tealikene tokita doikoo.
22Palaatikanggenekai, komuyu motoliminggene ko Mian Bisa,
dagayokai sulano inai napolong Yaku akatekomuyu,
tukon akiyo komo salamatene.
23Komian momososubakon sukuur salaku nasosubakon,
yanakai komo odotiiyo Yaku;
tukon doi mian momasadia loloon
naikon Yaku tudoikene kokasalamatan moluwe doi Yaku.”
Currently Selected:
SADEONG 50: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
