SADEONG 40
40
Sambeang sukuur tukon makabian
1Tuuk mokatuaiyo konyanyian. Daud na Sadeong.
Sambeang sukuur
2Tukon sabar kutotiiliyo ko Temeneno napotombonii;
maka Naperhatikangganaku tukon lengele koalalonggu.
3Yana bubutaku luwedoi leng mosilakaiyo komian,
luwedoi petak molapetakon.
Yana abosaku doi bunggul batu bunggono,
tobikon dakulaakonan monondok.
4Yana otunggulaku manyanyikene kolagu boolu,
lagu banggaalan motuuk doi nda Mian Bisa.
Badaang komian mokitayo tukon teali matakut,
maka yanila maangga doi Temeneno.
5Kinatawankai komian momaangga doi Temeneno,
moaki namalaing sosubayo kopilogot-pilogot,
kai makabi tulung doi mian babanggaal.
6 Temeneno, bulaando konabadaangan Komulimang doi kami,
oh Temeneno ku Mian Bisa, Ikoo akiyo komu pokakanaan!
Badaangkai Komutetel kami momasaindinggene,
ugaate aki nabinasalitakon sasaibino.
7 #
Ibr. 10:5-7
Kososuba tukon sosubakon mosinidak aki Muyase,
sosubakon komo sinua tukon sosubakon mohapuse ko dosa aki Mutuntute.
Bai Ikoo lapamo beenggu tolingainggu
momoola lengele koalalomu.
8Maka kubantile, “Naiyakai yaku,
doi buku lalomo totulis doiyaku.
9Yaku sanaang molakukene Komumongiasan, oh Mian bisa,
Komuukum kuabese doi noanggu lalomo.”
10Doi pototongian lalomo Komumian kubabilitakene kobilita labaan
baikon Ikoo salamatene kami.
Tukon akiyo konatadean dolanggedoo daku popitoikangganano,
Ikoo toiyo sasaibino doiya, oh Temeneno.
11Bilita kasalamatanoo aki kuabese doi noanggu lalomo,
kutulungan tukon Mutulu-tulutan sudutu kubobotilanggene.
Doi mumian napototongian salaano aki tongo yaku batingakon tolong,
bai yaku popitoikene kumuseang tukon Mutulut-tulutanan.
12 Temeneno, inaikai motade mamasikanaku;
osoopakukai sidutu tukon maasi tukon Mutulut-tulutanan.
Sambeang makabian
(Sad. 70:1-5)
13Yaku linubotii kasusahan mobadaang,
koaito aki namoola inait.
Dakulalim-lalim lolongganaku
polong aki kumoola kitayo.
Koaito lobiyoniiyo kobuuk doi olunggu,
kubaiyaku moloto konoanggu.
14Oh, Temeneno, salamatanakukai,
Temeneno batotobomokai motulungiaku!
15Sobiiyomokai komian moiyase akateaku,
napolinunggui tukon bulen polong lapus konapo akal.
Batadikenekai komian mokokuweisiyo daku susaan
yanila ninanal undur tukon tinotulai.
16Batadikenekai komian mokokumbitaku
teali ngginggim tukon mamaa.
17Boliisi sasaibino komian mososubayo Ikoo
yanila tetedes tukon lalaba,
tukon sasaibino komo kilayo kokasalamatan moluwe doi-Koo
banggadudul bantile, “Tutuu babasalkai ko Temeneno!”
18Yaku nia talalais tukon muyuk,
bai ko Temeneno perhatikangganaku.
Ikoomokai komotulungaku tukon mosalamatanaku,
inai mokakalumbit, oh daku Mian Bisa!
Currently Selected:
SADEONG 40: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
