SADEONG 39
39
Pangakuan moluwe doi mian modaano mosakisaa
1Tuuk mokatuiyo konyanyian. Daud na Sadeong. Tuuk doi Yedutan.
2Kupikikene, “Yaku yase modagaiyo kobutonggu
sulano naaki kubaladosa tukon aleponggu.
Yaku aki kuyase basilingan
kalu komian molokis danoon mololani.”
3Yaku aki kubiok sololoon kobahasa,
tobikon kabaiyo lugi kobutonggu susungo.
Tukon daku kasusahan kulasayo pololokon motoong;
4sabab kumatakutan mohebat pokakana yaku motinitiiki.
Pololokon pinikikon, pololokon susah, ko noanggu;
konapupusan yaku bantilekai.
5“Temeneno, pailukanakumokai oila kotempono daku matean
sulano kutoiyo bulaando konapependean daku tuboan”.
6Bulaando konamosobitan Ikoo tantukene daku umur!
Doi-Koo kona kalumbit dakutuboan akiyo koalatino.
Tutuu, kobangkapi natuboan doi dunia tongo pokakana koansaangan idan tolong,
7konatuboan lapa pokakana kobayangan.
Sasaibino kona sinibukon akiyo kotakoso;
yana mangatambun buat, bai aki natoiyo indee naikon komopakeyo.
8Budodoiya oilamo daku tinotiili, oh Temeneno?
Doi-Koomokai dakumoinian.
9Sobiyakumokai luwedoi sasaibino daku dosa,
inai batadikanaku teali totulai doi mian bonggu.
10Yaku batingaakon tukon aki kubukayo kobabanggu,
sabab Ikoomokai komo umbasaku.
11Alayokai Komu ukuman moluwe doi yaku,
sabab adukon kumate sabab Mupopukul.
12Kobangkapi sabab nakasalahan, Ikoo ukume tukon nanale
pokakana koatak Ikoo momanase oila komo daano koolino doiyana.
Tutuu, kobangkapi motubo doidunia tongo buno ansaangan idan tolong.
13Lengelekai daku sambeang oh Temeneno,
perhatikanggenekai daku kakabi;
inai motongo dungol batingaakon kalu yaku kokiil.
Pokakana sasaibino dakumbumbu,
tongo naapadoiya tolong daku manumpangan doi-Koo.
14Inai mogangguaku, sulano kusanaang soisik,
moakiyon kuampakon tukon yaku akiyono koidan.
Currently Selected:
SADEONG 39: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
