SADEONG 37
37
Mian molokis tukon mian monondok nanasib
1Luwedoi Daud.
Inai moiyos konoamu sabab mian molokis,
inai momasakit konoamu doi mian mokubai salah.
2Sabab yanila mosobit lapus pokakana kobulung,
tukon moloiyu buno lobo sinakakon manampal koloono.
3Maanggakai doi Temeneno, tukon lakukenekai komo monondok,
dungolokai doi lipudoo tukon ikoo sio mutulut-tulutan.
4Umboliyokai komu sanaangan doi Temeneno,
Yana naikon akambule konoamu namongiasan.
5Salaakanggenekai komu tuboan doi Temeneno,
moinikenekai doiya-Na, Yana naikon tulungiyo ikoo.
6Yana naikon okitakene komu tulut-tulutan pokakana komadialan,
tukon kona moloyosan konoamu pokakana kooloyo.
7Totiiliyokai ko Temeneno tukon noa motanaang,
totiiliyokai tukon sabar doi nakubaiyano Konatindakan.
Inai mopopusinggon komian monondok kona tuboan,
kai komo lakukene kobatipuan.
8Inai monggimal tukon monas konoamu,
doiya tongo babayo kosilakaan.
9Sabab komian momokubai lokis naikon inalapus,
bai komo moini doi Temeneno naikon pusakaiyo butadoo.
10Komian molokis naikon lapus tukon soisobit,
kalu yana inumbal, yana akiyono.
11 #
Mat. 5:5
Komian moekependeyo konoano naikon pusakaiyo butadoo,
tukon yanila lasayo kokasanangan molobi-lobian.
12Komian molokis mokubai tetel molokis motuuk doi mian monondok,
tukon nambalenge yana tukon mosikitene.
13Bai ko Temeneno kokumbite komian molokis,
sabab Yana toiyo domianoo lolanimo kona silakaan.
14Komian molokis bubute kona sabel tukon konoikene kona panah
sulano nakateyo komian motalalais tukon mosakisaa,
tukon koidan natembele komian motubo monondok.
15Bai komian molokis naikon totiik tukon nasabel susungo,
konapo panah batango naikon linoto.
16Komian momonondok soisik kona lolonggu
lobian koanggano tukon doi mian molokis koona badaang tuuno.
17Sabab komian molokis nakuasa naikon ko Temeneno lotoyo,
bai komian monondok Yana eseepe.
18Ko Temeneno dagaiyo komian moliyous natuboan,
konapo buat pusaka tataap sidutu-posiditukon.
19Doi tempo kasulitanan aki naikon naposakisaa,
doi tempo malalaan konapokinaan naikon lobi-lobian.
20Bai komian molokis naikon silaka,
ko Temeneno namusuh naikon lapus pokakana kobubunga doi padang,
yanila naikon lapus doi tibolung lalomo.
21Komian molokis babinggat tukon aki naabaliinggene,
bai komian monondok mebee tukon sanaang konoano.
22Komian Temeneno mobalakaatiyo naikon pusakaiyo butadoo,
bai komian mokinutuk Yana naikon siniika.
23Ko Temeneno tuntune komian doi loloon mosio nalinoloi,
Yana ekenggele komian konatuboan mopokokonoi doiya-Na.
24Kalu tuwong, yana aki naikon nababasal konapakol,
sabab Temeneno taaniyo kolimano.
25Salataa kutabokonan polong kumotuaan,
akiyoon kumokita ko Temeneno motinggale komian monondok,
kai konapau tumbu moteali mian mobakai-kabi.
26Yana sidutu binggotiiyo lobo kotulano tukon mebee,
tukon konalabuk-labuk teali balakaat doiyana.
27Tinggale komo lokis, lakukene komo monondok,
maka polong sidutu-posidutukon komu katulunan dungoliyo butadoo.
28Sabab ko Temeneno yase kokubai monondok tukon adil,
komian mosetia doiya-Na napataikene mosakisaa.
Bai Yana lindungiyo yanila sidutu-posidutukon,
tukon komian molokis nakaturunan makabus.
29Komian moliyous naikon pusakaiyo butadoo,
tukon dungoliyo polong sidutu-posidutukon.
30Komian momonondok basilingan tukon pandoian,
yana sidutu moloyos doi nabantilan-bantilan lalomo.
31Kona Mian Bisa naukum tangabos doi noano lalomo,
yana aki naisa luwedoi yana.
32Komian monondok minata-matai luwedoi mian molokis,
momoumbolii todanan sulano naakateyo.
33Bai ko Temeneno aki nabatadikene yana tuwong doi musuh limano,
kai inukum doi tempo nainadilian.
34Moinikenekai doi Temeneno tulutiyo kai Konapalenta,
maka Yana bingkate ikoo sulano pusakaiyo butadoo;
ikoo naikon kitayo komian molokis moinalapus.
35Yaku sidutu kitayo komeeng komian molokis moiyase babanggaal;
yana pokakana kokayung batango momolumbano tukon koalono atean tuuno.
36Doi tempo kualonan, yana akiyono koidan,
yaku umboliiyo yana, bai aki kulaate.
37Palatikanggenekai komian monondok tukon moloyos konoano,
komian moiyase dame malaat tubowan monondok doi salaando.
38Bai komian baladosa naikon inakate kabus;
konapo katulunan naikon inalapus.
39Ko Temeneno salamatene komian moliyous,
tukon eseepe yanila doi tempo kasulitanan.
40Yana tulungiyo tukon salamatene yanila,
tukon olupute yanila luwedoi mian-mian molokis
sabab yanila soop doiya-Na.
Currently Selected:
SADEONG 37: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
