SADEONG 35
35
Sambeang makabian tulungan
1Daud na Sadeong.
Temeneno, lawanekai komian molawanaku,
lobosiyokai komian mo lobosiyaku.
2Alayomokai kotombide-tombide poipoisik tukon Komu tombide pinake,
tukon kokondongkai tulungiaku.
3Bingkatekai kokalait palus tukon Komu kalait,
tuuk molawane komian mololongganaku.
Bantilekai doi yaku
baikon Ikoo kupasalamat.
4Batadikenemokai komian moiyase akateaku
napo linunggui tukon inakamaa.
Batadikenemokai komian momokubai pototongian mokalipookan nalawanaku
yanila abali tukon pusing.
5Batadikenemokai napo inasu Temeneno Namalaekat,
pokakana kolabuwe kulito mobineaason mbombuul.
6Batadikenemokai napolinolonggon Temeneno Namalaekat,
doi lalom mokalipookan tukon molondol.
7Palasuma yanila motalongganaku
kai makali bitu sulano napo lakowaku.
8Batadikenemokai napo tinepaki balaa
tukon aki natinoiy-toiy.
Batadikenemokai nopotositak doi napo talong lalomo
maka nopotuwong tukon mate.
9Tobikon doiya yaku labalaba sabab Temeneno,
konoanggu tedes sabab Yana salamatanakumo.
10Tukon tootubo konoanggu yaku bantile,
“Temeneno, Ikoo akiyo komubunoan!
Ikoo sobiiyo komo aki nabukuan luwedoi mobukuan,
komo talalais tukon sakisaa luwedoi napinipiikan.”
11Kosakisii-sakisii molokis kokondong lawanaku,
tukon tuduwaku molakukene kolangge-langge moaki kutoiyo.
12Dakumonondokan yanila telese tukon kolokisan;
yaku tuwung tukon tanggalaup doi molotoan konoanggu lalomo.
13Doi tempo napo masakitan, yaku susa tukon aki kukaan;
yaku sambeang tootukunggene koolunggu,
14pokakana yaku masambeanggon komeeng koutus
kai meeng kosobat molapat tuuno.
Yaku tootuku mokokiiliyo yanila,
buno yaku mosusakene kotinanggu susunggu.
15Bai doi tempo kususaan, yanila sanaang,
tukon yanila pototongi molawanaku.
Yanila ambakon nggebok-nggebok
tuuk mototulaiyaku.
16Yanila banggadudul mopia-piadayo komeeng komian molemat
tukon mbalengaku tukon mosikit.
17Polong oila kotempono, oh Temeneno, polong oila kotempono
Ikoo tongo mbalenge tolong?
Salamatanakukai luwedoi napo balobosian,
oluputekai kobutonggu luwedoi singa-singadoo.
18Maka yaku naikon basukuur doi-Koo doi Mumian tanga-tangano,
tukon yaku nggaale kosambu-Mu doi napo sosungan lalomo.
19 #
Sad. 69:5; Yoh. 15:25 Inai mobatadikanaku kuminaenggon
luwedoi mian momusuwaku bai akiyo kona sabab.
Inai batadikanaku kukinokuweisi
luwedoi mian momosikitanaku bai akiyo konapo alasan.
20Konapo silingan aki namalamuyuk;
yanila batetelikene kobatipuan motuuk
doi mian motubo monondok.
21Yanila wowokon doiyaku tukon bantile
baikon yanila kitayomo daku kokubai.
22Bai Ikoo, Temeneno, kitayomo,
naikai batingakon, oh Temeneno;
naikai mododoonggon luwedoi yaku.
23Kokondongkai belayo daku palakala,
oh daku Mian Bisa tukon ku Temeneno, tulungiakukai!
24Belaakukai, sabab Ikoo adil, oh Temeneno, daku Mian Bisa,
inai batadikene komusuh nakokuweisiyaku.
25Inai batadikene napo bantile doi noano lalom,
“Sukuur, lapamo akabuse kona ansangan.
Konda mongiasan kita latemo!”
26Batadikenekai komian mosanaang napo kitayo daku sakisawan
yanila teali pusing tukon malaat maa.
Batadikenemokai komian mo babanggaakene kobutongo
doiyaku tinotulai tukon inakkamaa.
27Boliisi komian moyase kitayo daku binisakonan
yanila wokon tukon laba-laba.
Boliisi napo sula-sulaiyo konapo bantilan,
“Tutuu babasalkai ko Temeneno!
Yana yase tuuno sulano Kona ata salamat!”
28Tukon yaku naikon babilitakene Komu adilan,
tukon yaku nggale Ikoo sasamba kooloyo.
Currently Selected:
SADEONG 35: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
