SADEONG 33
33
Kokuboiyon nggalano ko Temeneno
1Eh mian-mian moliyous, mokokuweis tedes
sabab oila komolapamo Temeneno lakukene;
siokai komian moloyos konoano nanggaale.
2Basukuurkai doi Temeneno tukon kacapi,
pomanyanyikai doiyana tukon linolaing musiik.
3Mananikenekai kokuboiyon boolu doi Temeneno,
maenggene kacapi monomonondok tukon kokuweisai tukon laba!
4Sasaibino ko Temeneno nabantilan moola inangga;
yana tulut-tulutan doi sasaibino kona kokubai lalomo.
5Yana kilakene komian moloyos konoano tukon kokaadilan;
posaapon kolipu moono tukon naseang.
6Ko Temeneno beena parentah, maka kotimbu tapasitaka;
koaloyo matano, bituwon tukon bituwon pauno
Yana tealikene tongo nabantilan.
7Sasaibino kopaisu tobun Yana pototongikene doi meeng kolipu,
kotobun dapango Yana taane doi meeng kobendungan.
8Batadikenekai posaapon komian doi dunia namatakutene ko Temeneno
tukon podungoli dunia odotiiyo yana.
9Sabab Yana tongo bantil, maka sasaibino tealimo;
Yana mebee palenta, maka sasaibino daanomo.
10Ko Temeneno akiyenggene kobangsa-bangsa natetel,
Yana akiyenggene konapo niat.
11Bai ko Temeneno natetel tataap bataanggon,
Konatetel monggol popuson koloonu.
12Kinatawankai kobangsa mo akiyo kona Temeneno salaku na Mian Bisa,
kinatawankai komian Yana molilikemo motealimo koona.
13Luwedoi surgaa ko Temeneno mbalenge doi bilit,
tukon Yana kitayo sasaibino kobangkapi.
14Luwedoi Nabatomundoan ko Temeneno kita-kitayo
sasaibino komo dungoliyo kodunia.
15Yanamokai komo kubaiyo konoanoila,
tukon toiyo sasaibino konapo kokubai.
16Kotomundo aki namanaang maukai nabadaang konasuludadu,
kosuludadu aki nasalamat maukai napobukuan.
17Koadalan aki namoola minoinikon momanaang,
konabukuanan tuuno aki namoola salamatene.
18Ko Temeneno dagaiyo komian-mian
motulut-tulutan momoinikene Konamaasi.
19Yana salamatene yanila luwedoi matean,
tukon otuboiyo yanila doi tempo malalaan.
20Maka kita moini doi Temeneno,
Yanamokai kopotulung tukon ndapebela.
21Kita laba-laba tuuno sabab Yana
tukon maanga doisambu-No momoliyous.
22Boliisi Mutataap seseanggami, oh Temeneno,
sabab kami tongo moini doi-Koo.
Currently Selected:
SADEONG 33: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
