SADEONG 31
31
Moini doi Temeneno
1Tuuk mokatuaiyo konyanyian. Daud na Sadeong.
2Doi-Koomokai daku soopan oh Temeneno,
inai mosobiiyaku kubinee maa.
Salamatanakukai tukon Mukaadilan.
3Longolakukai tukon sobiiyakukai soisobit
Tealikai doiyaku buno bunggul batu
lipu kusoopan,
pokakana kobenteng momonggol,
doiyamokai daku salamatan.
4Oh, Ikoo pokakana kobunggul batu
tukon benteng momonggol tuuk doiyaku!
Komu perjanjian Ikoo taaniyaku.
5Luputanakukai luwedoi talong mokinonoikon doi yaku,
sabab tongo Ikookai daku basoopanan.
6 #
Luk. 23:46
Doi limanu lalomo daku salakangganano kobutonggu
Ikoo sobiiyaku,
oh Temeneno, Mian Bisa motataap, lakukene konaperjanjian.
7Komian mososubaiyo kopilogot yaku mosikitene;
bai yakunia maangga doi Temeneno.
8Yaku naikon laba-laba tukon tetedes
sabab Ikoo tataap seseangaku.
Ikoo kitayo daku sakisawan
tukon perhatikanggene daku kasusahan.
9Aki mubatadikanaku kutinaan musuh,
bai ikoo moolakanaku kuampakon aman.
10Mamaasikanakukai, oh Temeneno,
sabab yakunia doi susaan lalomo;
komatanggu meele sabab yaku kokiil,
kobutonggu sakisaa.
11Daku tubowan kabus doi sakisawan lalomo,
daku taun-taun tolupai doi susaan lalomo.
Daku bukuwanan lapus kobailon sabab kulokisan,
tukon koidan kobuku-bukunggu teali moloto tukon mapasa.
12Sasaibino daku musuh teali taanaku,
tukon koidan doi sasaibino daku pokolanikonan bonua.
Sasaibino daku potingoniiyan ngginggim kalu kitaaku,
yanila bulen kalu pososuung tukon yaku doi loloon.
13Yaku tinoliminggono pokakana komian momate,
tukon teali buno lolonggu moinaison.
14Doiya-yando konadanoan kokasilakaan;
yaku lengele kobilitano daku musuh
yanila pomeenggon molawanaku,
tukon mokubai tetel moakateaku.
15Bai yaku moini doikoo, oh Temeneno,
sabab ikoomokai daku Mian Bisa.
16Ikoo sidutu pialaaku,
salamatanakukai luwe doi kumusuh-musuh,
tukon luwedoi mian-mian mololongganaku.
17Boliisi mupokokonoi doi muata;
salamatanakukai tobikon museang.
18Inai pataikanaku kumalaat maa, oh Temeneno,
sabab yaku uwang doi-Koo.
Batadikenemokai komian molokis nainakamaa,
tukon aki nabiyok-biyok bulus doi mian mate nalipu.
19Kosokiyo kobabano sasaibino komian mobakala-kala
motukon babanggaal bapitanaakene komian momoliyous konoano.
20Bukamaen konalobianan Komu monondokan
Ikoo masadiakene doi mian motulut-tulutan!
Sasamba komian kitayo kona monondokan Ikoo molakukene,
doi yanila mosoop doi-Koo.
21Ikoo seekene yanila doi Musoopan lalomo
motuuk koakakanano komian molokis;
Ikoo dagaiyo yanila doi Musoopan lalomo
motuuk doi mian molokis napalait.
22Ngginaalai ko Temeneno!
konamaasi tealikene yaku masainding,
doi tempo kulinubotiiyan tukon kulinobosian.
23Doi kupusingan lalomo yaku aanggene
ko Temeneno aisanakumo luwedoi salaano.
Bai yana lengelemo daku kakabi
doi tempo kuuangan doiya-Na.
24Kilakenekai ko Temeneno, eh sasaibino Konamian,
ko Temeneno eseepe komian motulut-tulutan.
Bai komian mobabanggaal Yana ukume
tukon aki nakala-kala.
25Kabukuanggenekai tukon ekenggele konoamu,
komuyu sasaibino momoini doi Temeneno!
Currently Selected:
SADEONG 31: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
