SADEONG 22
22
Sambeangan doi tempo susaan tukon nyanyian nggaalano ko Temeneno
1Tuuk mopimpine konyanyian. Loingiyo kolagu: Donga doi tempo oloyo panano. Daud nanggaalano ko Temeneno.
2 #
Mat. 27:46; Mrk. 15:34 Daku Mian Bisa, oh daku Mian Bisa,
bulaando Ikoo motinggalaku?
Yaku uwang, bai Ikoo tataap dodoon
tukon aki mutulungiyaku.
3Oh daku Mian Bisa, yaku uwang doi tempo oloyo,
bai ikoo tataap batingaakon.
Yaku sambeang doi tempo popook,
konoanggu akimo koidan tanaang.
4Maukai Ikoo Tomundo Mo Moliyous,
mo ngginaal-nggaal doi Israel.
5Komai mbumbu moini doi-Koo,
yanila moini, tukon Ikoo salamatene yanila.
6Yanila uwang doikoo tukon inoluput;
yanila moini tukon aki nateali manasal.
7Bai yaku nia ngganggale, bolikon bangkapi,
kinokumbit tukon tinotulai mian badaang.
8 #
Mat. 27:39; Mrk. 15:29; Luk. 23:35 Sasaibino komo kitayo yaku sosiboliyaku,
masambut tukon sualiling.
9 #
Mat. 27:43
Konapo bantilan, “Batadikenemokai yana nabalanggene ko Temeneno,
sulano ko Temeneno nasalamatene yana;
kalu Temeneno sanaang doi yana!”
10Ikoomokai komo tobuwatene yaku luwedoi natiniananggonan,
tukon Ikoo kubaiyaku, aman doitinanggu nabangabian.
11Salataa sosung, daku tuboan danoon doi limamu,
salataa natiniananggonan Ikoomokai daku Mian Bisa.
12Inaikai moodoon, sabab kosilakaan lolanimo,
tukon akiyo komo tulungiyo.
13Pokakana kobanteng tambuno badaang, musuh tikumakumo,
pokakana kobanteng mbosolo luwedoi Basan yanila lobosiomo yaku.
14Yanila sasalaanaku tukon babanoila motobuka buka,
bunokai singa mongangakon tukon mosoku.
15Kobukunggu kabus buno paisu mokinundang,
saibino kobukunggu toliat luwedoi lolosuano,
konoanggu seselet bunokai lilin.
16Kobulunggu lalomo motuul buno kokaca bisilo,
koaleponggu lapot doi babanggu adeno.
Temeneno, Ikoo tinggaleme yaku doi ambatah bunggono
bunokai mian momatemo.
17Yaku tinikumo gorombolan mian molokis;
bunokai yanila naasu tambuno motikumemo yaku,
motitiikiyo kolimanggu tukon ainggu.
18Sasaibino kobukunggu moola kuaite,
komusuh na mbalengaku tongo buno permainan.
19 #
Mat. 27:35; Mrk. 15:24; Luk. 23:34; Yoh. 19:24 Yanila ebe-ebese dakupakean,
tukon yanila mokubai undi luwedoi kujubah.
20Bai ikoo, inaikai mododoon, oh Temeneno,
lubatokai soisobit tulungiaku,
sabab Ikookai dakumalaatan bukuanan.
21Oluputekai daku nyawa luwedoi sabel,
salamatanaku luwedoi asu nakakatan.
22Akiyono kobukunggu sodiyomo yaku,
luwedoi banteng tanduko tukon luwedoi singa suungo.
23 #
Ibr. 2:12
Komu kokubai naikon kubasalitakene doi utus-utusonggu;
doi Mumian naposungan lalomo yaku ngganggale Ikoo.
24Ponggaalekai yana, eh mian-mian momaangga!
Akabasalekai yana, sasaibino Yakub nakatulunan!
Sombakai doi yana, sasaibino ko Israel nakatulunan!
25Sabab yana aki nambalenge lokis komian mopinipiik,
tukon aki nabatadikene kona kasusahan.
Yana aki naabali luwedoi miannoo,
bai lengele kalu yana makabai tulung doi yana.
26Doi mumian napototongian yaku nggaale ikoo,
sabab sasaibino komo lapamo ikoo lakukene.
Doi Mumian momangangga salaano
yaku sosubakene kososubakon molapamo yaku janjikene.
27Komian motalalais naikon kaan polong bobosul,
komian molubat doi Temeneno naikon nggaale Yana.
Boliisi posanaang sidutu posidutukon!
28Sasaibino kobangsa naikon neneeke ko Temeneno tukon abali doiyana,
sasaibino kobangsa benseno naikon somba mososubaiyo yana.
29Sabab tongo Temenenokai komo daano konakuasa,
yana palentayo kobangsa-bangsa.
30Sasaibino komian babasal naikon somba doi salaano,
sasaibino kobangkapi biasa naikon somba mososubayo yana.
31Kotabo-tabo doibundu naikon bakaleda doi Temeneno,
yana naikon binasalitakon polong doi natulunan-tulunan.
32Doi bangsa mososuung doi bundu naikon binabilitakon
baikon ko Temeneno lapamo salamatene konyanyian.
Currently Selected:
SADEONG 22: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
