SADEONG 18
18
Daud namanaangan laguno
(2Sam. 22:1-5)
1Tuuk mokatuaiyo konyanyian. Daud na Sadeong, Temeneno naata. Minananikon doi Temeneno doi tempo Daud nainoluputan luwedoi Saul tukon luwedoi namusuh-musuh.
2Yaku seange Ikoo, oh Temeneno,
Ikoomokai dakubukuanan.
3Ko Temeneno pokakana kopagal momonggol
daku lipu soopan.
Daku Mian Bisa pokakana kobunggul batu
daku lipu soopan.
Pokakana kotompide Yana tutupiaku,
tukon dagaiyaku sulano kuaman sidutu.
4Yaku uwang doi Temeneno momola ngginaal
Yana sodiiyaku luwedoi kumusuh-musuh.
5Yaku tinikumo matean
tukon linalino eaba silakaan.
6Yaku tinikumo matean,
kotalong matean daano doi salaanggu.
7Doi kususaan lalomo yaku uwang doi Temeneno,
yaku wokon doi ku Mian Bisa makabi tulungan.
Luwedoi Nabonua Yana lengelemo koalalonggu
tukon perhatikanggene koalalonggu.
8Maka kodunia tounggot tukon lolondong,
kobunggul-bunggul uuno tounggot tukon lolondong
sabab Mian Bisa nanggimalan.
9Kotibolung kuule luwedoi ngoolo buango,
kobilat tukon bara tobuat luwedoi babaNo.
10Yana batayo kotimbu, maka naobulus
tukon antong mokalipokan doi aino suka-No.
11Yana benga tukon molokiti iyayon modaano kokapilo doi surgaa;
Yana tangangaakon doi mbamobuul kapilo bunggono.
12Yana tombukiyo kobutongo tukon kalipookanan;
kobunom mopook mobondolong tikumemo Yana.
13Luwe kodidip doi salaano,
tobuatkai kobunom, udan es tukon bilat.
14Maka ko Temeneno mokubai duluk luwedoi dapang;
Mo Tatandak Tuuno longolikene koalalo.
15Yana panakene Konapana-pana
komusuh teali pobabandakon;
Yana potodiikene kodidip badaang lunggon,
tukon kubaiyo yanila bulen.
16Kotobun uuno tobuka tukon kobuta sakean tobuka
doi tempo ko Temeneno naosinggotano
konamusuh tukon nanggimalan.
17Luwedoi babo ko Temeneno ulule kolimano;
Yana taaniaku tukon nabubutaku luwedoi paisu moatean.
18Yana salamatanaku luwedoi musuh mobarani
tukon luwedoi mian-mian mosikitanaku,
sabab yanila bukuan tuuno tuuk doiyaku.
19Yanila lobosiaku doi tempo kutinepakan susah,
bai Temeneno teali tomboniaku.
20Yana oluputaku luwedoi silakaan
tukon salamatanaku
sabab Yana pokokonoi doiyaku.
21Ko Temeneno balese daku kakabai motalakana;
Yana balakaatiyaku sabab akiyo daku sala.
22Yaku loingiyo ko Temeneno naparenta
tukon aki kuisa luwedoi ku Mian Bisa.
23Sasaibino Konaukum yaku perhatikanggene,
Konaparenta-parenta aki kutomilinggene.
24Yana toiyo baikon akiyo dakusalah
tukon edeenggene kobutongo luwedoi kusala.
25Maka ko Temeneno balase dakukokubai mo talakana
sabab Yana toiyo akiyo daku sala.
26 Temeneno, Ikoo seseange doi mian mo tulut-tulutan
tukon Ikoo monondok doi mian monondok.
27Motuuk doi mian mo moliyous
Ikoo okitakene kobutomu moliyos,
bai komian molokis Ikoo musuwo.
28Komian moekependeyo konoano Ikoo salamatene,
bai komian babanggaal Ikoo silakayo.
29Ikoo koitiyo daku dial;
ko Temeneno ko Mian Bisa talaangiyo daku lolon mokalipookan.
30Ikoo tealikene yaku bukuan salano kuakabuse dokumusuh;
tukon daku Mian Bisa napotombonii
yaku lopoyo konapo lipu bataanggonan.
31Ko Mian Bisa nakokubai monondok tuuno
ko Temeneno najanji moala nainangga.
Yana pakakana kotombide
luwedoi sasaibino komo soop doi Yana.
32Sabab tongo Temenenokai ko Mian Bisa;
Mian Bisa tolong konda pebela.
33Yanamokaiko Mian Bisa komo benna bukuanau doiyaku
tukon kubaiyo dakuloloon aman.
34 #
Hab. 3:19
Yana beena bukuanan koainggu pokakana kodonga aino,
tukon dagaiyo daku kasalamatan doi lipu bunggulo.
35Yana latiyaku tuuk polobosian,
sampe kumoola tidekene
kopaka batango mo bukuan tuuno.
36 Temeneno, Ikoo osoopaku tukon salamatanaku,
tukon ikoo tumbakaku mukuasa;
yaku teali manaang sabab mutindakan.
37Ikoo dagaiyaku sulano naaki kutataan,
tukon aki ku biasa tuwong.
38Yaku lelengene dakumusuh tukon yaku lungguiyo yanila,
tukon aki kuiyase undur kalu yanila akiyoon namate.
39Kulubange yanila polong aki namoola bangun koidan,
yanila tolubang akimo nabukuan doi ainggu salaano.
40Ikoo beenggu bukuanan sulano kupolobosi,
tukon yaku manaang luwedoi kumusuh-musuh.
41Ikoo kubaiyo daku musuh-musuh bulen luwedoi yaku;
komian-mian mosikitanaku yaku akateyo kabus.
42Yanila nggeleamon, bai akiyo komo tulungiyo,
yanila uwang doi Temeneno, bai aki natimbiliyo.
43Yanila yaku pipise manase pokakana koabu mosasabul,
tukon kusasapuwo kolapetak doi loloon.
44Ikoo osobiyaku luwedoi mian molokis,
tukon tealikanaku mokuasaiyo kobangsa-bangsa;
kobangsa moaki kutingoniiyo teali kuata.
45Komian-mian molulubaton sasaluut doiyaku
tukon loingiyo kalu lengele dakupalenta.
46Konapo baranian lapuso;
yanila lolondong tukon tobuat luwedoi napopagal bataanggonan.
47Ko Temeneno tubo! Taanggakai dakupebela!
Akabasalekai ko Mian Bisa nababasalan daku pasalamat!
48Yana beenggu kamanangan luwedoi kumusuh;
kobangsa-bangsa Yana lungguiyo doi salaanggu,
49Yana salamatanaku luwedoi kulawan-lawan.
Temeneno, Ikoo beengu kamananganluwei kumusuh-musuh,
Ikoo sopanaku luwedoi mian-mian molokis.
50 #
Rm. 10:18
Maka kukabasale Ikoo doi sasaibino kobangsa-bangsa,
tukon kumanyanyikene kongganggalano doi-Koo.
51Mian Bisa beena kamanangan babasal doi natomundo,
Yana tataap seseange komian naililik,
doiyamo Daud nakatulunan tuuk sidutu-posidutukon.
Currently Selected:
SADEONG 18: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
