SADEONG 148
148
Timbu tukon dunia, nggaalekai ko Temeneno
1Nggalekai ko Temeneno!
Ponggaalekai ko Temeneno, eh kosurga potutuino!
Sasaibino komo dungol doi tampat mo tatandak, ponggaalekai Yana!
2Ponggaalekai Yana, eh sasaibino Kona malaekat,
ponggaalekai Yana, eh sasaibino kosuludadu doi surga!
3Ponggaalekai Yana, eh kooloyo matano tukon bituwon,
ponggaalekai Yana, eh kobituwon-bituwon pauno monggilep-nggilep!
4Ponggaalekai Yana, eh kotimbu mo tatandak tuuno,
ponggaalekai Yana, eh kopaisu doi timbu bunggono!
5Komo monondok kalu yanila sasaibino nggaale ko Temeneno sambuno,
sabab sasaibino doiya tinealikon luwedoi naparenta.
6Yana komo tantukene Kona tampat suwe-suwele,
Kona katatapan tapake sidutu-posidutukon.
7Ponggaalekai ko Temeneno, eh sasaibino kodunia antoko,
eh konaga-naga tobun tukon posaapon kodapang mobabasal;
8eh kodidip tukon udan es, salju tukon bonum,
mombuul mo makansang Temeneno mo parentayo!
9Ponggaalekai Yana, eh bunggul-bunggul bunggono tukon bunggul-bunggul,
kayung sao-saono tukon sasaibino kobokulung;
10sasaibino koiyayon mo piniala tukon iyayon mo mbosolo,
sasaibino koiyayon mopoipoisik tukon tomisi!
11Ponggaalekai Yana, eh kotomundo-tomundo tukon sasaibino kobangsa,
sasaibino komian mo bangsawan tukon sasaibino kopamarentah;
12sasaibino kopamuda tukon pamudi,
mian momotua tukon mian motabokon.
13Komo monondok yanila sasaibino sio nanggaale ko Temeneno sambuno,
sabab Kosambuno lobian konababasalan luwedoi sasaibino kopamarentah sambuno;
Kona babasalan liisiyo kotimbu tukon dunia.
14Yana keenggelemo Kona bangsa,
sampe Konaumat ngganggaale Yana,
Israel, Naumat sineseang.
Ponggaalekai ko Temeneno!
Currently Selected:
SADEONG 148: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
