SADEONG 147
147
Nangginaalan ko Mian Bisa Mobabasal Konakuasa
1Nggaalekai ko Temeneno!
Tadukai ndanggaale Yana,
tukon nda manyanyi nyanyian panggaal doiya-Na
sulano nasanaang konoano!
2Ko Temeneno naikon abalinggene kona monondokan ko Yerusalem;
tukon komian mo inaison naikon Yana babayo mule.
3Yana kindendeke komian mo moloto konoano,
tukon pakuliyo konapo pakol-pakol.
4Yana tantukanggene kona kadaang kobituwon pauno doi dapang,
tukon Yana beena sambuno suwe-suwele.
5Tutuu babasal tukon hebat konda Temeneno,
Kona kebijaksanaan akiyo kona pupusan.
6Yana olupute komian mo linai-lainggon,
bai komian mo lokis Yana tikakene doi buta.
7Manyanyilah nyanyian nggaa-nggaalano doi Temeneno,
maenggene kokacapi doi Mian Bisa.
8Iyanamokai komo beleatene kobunom doi timbu;
Yana masadiakene udan motuuk doi dunia,
tukon kubaiyo kobulung motubo doi bunggul bungkukono.
9Yana beena bulung sulano koiyayon namoola kaan,
tukon doi tomisi gagak pauno mo uwang-uwang.
10Ko Temeneno nainiyas bolikonkai adalan mo bukuan;
bolikon koidan pojuang mobarani.
11Ko Temeneno sanaang doi mian mo taat,
doi mian mo tataap moinikene Konamaasi.
12Eh Yerusalem, nggaalekai ko Temeneno!
Eh Sion nggaalekai komu Mian Bisa!
13Sabab Yanamo komo keenggele komu tataapon-tataapon mobabasal,
tukon komo balakaatiyo komian modungol.
14Yana dagaiyo komu lipu sulano natataap aman,
tukon beena kaan bobosul ikoo tukon gandum mo monondok.
15Yana mebee parenta doi dunia,
tukon Kona bantilan mosobit linakukanggon.
16Yana obulusene kosalju pokakana kokapos,
tukon tipasene kosoilu mokundot pokakana koabu.
17Yana obulusene koudan es pokakana koseasa;
kona mendemelan akiyo komo moola sasalaane.
18Maka luwedoi Naparenta do esoo teali tebeas;
Yana puukene kombombuul, maka kopaisu teali lomba.
19Yana pelenggene Kona teteba doi Naumat,
koketetapan tukon Naukum doi Naumat pinilih.
20Yana aki namokubai mo buno doiya doi bangsa-bangsa bailon,
sabab aki napo toiyo Kona ukum-ukum.
Nggaalekai ko Temeneno!
Currently Selected:
SADEONG 147: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
