SADEONG 145
145
Lagu Pujian
1Daud nanggaalano ko Temeneno.
Oh daku Mian Bisa tukon daku Tomundo, yaku yase kabasale Ikoo,
tukon nggaale Ikoo sidutu-posidutukon.
2Sasamba kooloyo yaku yase mobasukur doi-Koo,
tukon kabasale Ikoo sidutu-posidutukon.
3Sabab Ikoo ko Temeneno mobabasal tukon tanggaal tuuno,
Kona babasalan aki namoola kobanggapi natoiyo.
4Paisoboli koturunan naikon nggaale Komu kokubai
tukon babilitakene Komu baranian.
5Yanila naikon babilitakene Komu babasalan tukon Komu inodotiian,
Komulimang mo minasaindinggon yaku naikon pikikene.
6Yanila popitoikene Komu kokubai-kokubai mohebat,
yaku naikon pelenggene Komu babasalan.
7Sasaibino Komu monondokan komian naikon basalitakene
tukon manyanyikene tentang Komu adilan.
8Do Temeneno doo daano Konamaasi tukon kona seang,
aki namosoisobit nggimal tukon kona seang tataap sidutu.
9Konoano monondok tuuno doi sasamba komian,
tukon seseange sasaibino Kona langge pinasitaka.
10Oh Temeneno, sasaibino Komu langge pinasitaka naikon nggaale Ikoo,
sasaibino Komu umat naikon basukur doi-Koo.
11Ikoo salaku Tomundo, yanila naikon kabasale Komu kuasa,
tukon yanila naikon basalitakene Komu baranian,
12sulano sasaibino komian natoiyo Komu kokubai mo babasal,
tukon Komu batomundoan moinodotii tukon nggilep-nggilep.
13Komu bapamarentaan tataap popupuson koloonu,
Komu kokuasaan bataanggon doi paisoboli koturunan.
Ko Temeneno setia doi sasaibino Kona janji,
doi sasaibino Kona kokubai Yana mamaasikene tuuno.
14Ko Temeneno beena tulungan komian mo daano doi susaan lalomo,
Yana koloyose komian motootuku.
15Sasaibino komahluk mo tubo tongo moinikene Ikoo;
sabab Ikoomokai komo beena kaan doi tempono.
16Ikoo daanekene sasaibino konapo kaparluan,
sampe aki napo kakurangan.
17Ko Temeneno adil doi sasaibino Kona tindakan,
tukon seseange tuuno sasaibino Kona kinubai.
18Yana loolanikon doi mian mo uang doiya-Na,
tukon kalu kita mangkabi doiya-Na tukon tootubo konoanggita.
19Yana beena noa sanaang doi mian motaat doiya-Na;
Yana lengele konapo uwangan tukon salamatene yanila.
20Yana lindungiyo sasamba komian mokilakene Yana,
bai komian molokis Yana akateyo kabus.
21Yaku yase monggaale ko Temeneno sidutu,
boliisi sasaibino Konamahluk nanggaale ko Temeneno sambuno
tuuk sidutu-posidutukon.
Currently Selected:
SADEONG 145: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
