SADEONG 144
144
Tomundo basukuur doi Temeneno sabab namanaangan
1Luwedoi Daud.
Nggaalekai ko Temeneno sabab doiyamo daku soopan;
Iyanamo komo otunggulaku doi polobosian lalomo,
tukon komo otunggulaku polobosi.
2Iyanamokai komo tulungiyaku tukon komo belaaku,
yana komo salamatanaku tukon doiyamokai daku soopan.
Iyanamo daku soopan, tukon doiyamokai daku tampat bulenan,
kobangsa-bangsa Yana kubaiyo somba doiyaku.
3 #
Ayb. 7:17-18; Sad. 8:4 Temeneno, oilakai dobanggapidoo sampe Ikoo palatikanggene yana?
Indeekai yana sampe Ikoo palatikanggene?
4Dobanggapidoo tongo buno mbombuul puul,
tukon tongo buno bayangan moalon, bunomokai doiya konatuboan.
5Oh Temeneno, bukayokai Komu timbu tukon bulusokai,
singgilekai kobunggo-bunggo sulano natibolungon.
6Sakukenekai Komu didip sulano komusuh natopobandakon,
sobiiyomokai Komu panah sulano napo matakut.
7Ululekai kolima-Mu moluwedoi surgaa,
tukon oluputakukai luwedoi paisu moeyaba.
Salamatanaku luwedoi mian molulubaton nakuasa
8moiyase bakala-kala tukon batipu,
tukon mokubai totopi mokala.
9Oh ko Mian Bisa, yaku naikon manyanyikene kolagu moboolu doi-Koo,
tukon yaku kutiyo kokacapi maka kumanyanyi.
10Ikoo beenamo manaangan kotomundo-tomundo,
tukon Ikoo oluputemo Daud Domu peleleanidoo.
11Oluputaku luwedoi mian molokis nasabel;
tukon salamatanakukai luwedoi mian molulubaton nakuasa
moiyase bakala-kala tukon batipu,
tukon mokubai totopi mokala.
12Boliisi kondapau mala-malaneno doi tempo napaumalanekonan
napokakana kolangge mosinakakon moteali babasal.
Boliisi konda pau-pau boineno napokakana kobubunga sudongo motambongan tuuno,
mokinubai pobubungai kotomundo-tomundo nakamali.
13Boliisi konda gudang-gudang namoono tukon antoko
tukon sasaibino kokaliangano konda hasil doi dunia.
Boliisi konda domba-domba doi padang-padang
namosuung pau polong doi libu-libuso kona kadang.
14Boliisi konda sapi-sapi nalibuang
tukon naakiyo komo lapus kai komo tobulus.
Boliisi naaki natololongol komian monggele-nggeleamon sabab nasakisaawan
doi nda kota lolo-loloono.
15Kinatauwankai kobangsa mo buno doiya,
tukon kinatauwankai doi umat kona Mian Bisa doiyamo Temeneno!
Currently Selected:
SADEONG 144: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
