SADEONG 139
139
Ko Mian Bisa Babasal konapotoy tukon pialayo sasaibino kolangge-langge
1Tuuk mopimpine konyanyian. Daud na Sadeong.
Oh Temeneno, Ikoo toiyo konoanggu lalomo
tukon Ikoo toiyaku.
2Sasaibino dakukokubai Ikoo toiyo;
mau kudodoon bai Ikoo toiyo daku pikilan.
3Ikoo kitaaku,
mau doi kubalimangan kai doi kutatadean,
tukon Ikoo toiyo sasaibino daku kinubai.
4Tukon koidan akiyoon kubasilingan,
Ikoo toiyomo oilamo daku binantil.
5Doi sasaibino kotampat kona lubatan daku musuh Ikoo tataap dagaiyaku;
Ikoo dagaiyaku tukon Mukuasa.
6Todudul atean doiyaku Domu potoidoo,
dakupikilan aki nalaate.
7Inaando daku moolaan taus sulano kuluput doi Mukuasadoo?
Inaando daku moolaan bulen sulano kudodoon doi-Koo?
8Kalu yaku liba doitimbu, Ikoo daano indaa,
Kalu moolo doi mian momate nalipu, idoo koidan daano Ikoo.
9Kalu yaku benga liisiyo kolembet uuno
kai dungol doi talise bunduno mododoon tuuno,
10bai indaakai Ikoo tulungiyaku;
tukon indaa koidan kolimamu taaniyaku momeenggon.
11Kalu yaku kabiyo sulano kokalipookan nasinggoliyaku,
maka komadialan doi kupotikunggonan teali popook,
12maka dokalipookanoo akimo nateali kalipookan doi-Koo;
dopopookoo madialan pokakana kooloyo,
tukon donakalipookananoo pokakana momadialan.
13Sasamba kobutonggu lolongguno Ikoomo komo pasitakayo,
tukon komo kubaiyaku doi tinanggu natalikan lalomo.
14Yaku nggaale Ikoo sabab daku kinubaiyan bolikon langge!
Sasaibino Komu kokubai minasaindinggon tukon inakabasal,
tukon tutuu yaku sadariyomo.
15Doi natinealikonan kobuku-bukunggu,
tukon monondok kona taaturan doi tinanggu natalikan lalomo,
tukon koidan daku tuboan doi tinanggudoo natalikan lalomo doiya meeng korahasia,
bai aki namoola kutosookon doi-Koo.
16Doi kudaanoan doi tinanggu nakandungan lalomo tataap Ikoo kitaaku;
doi-Mu buku lalomo totulis sasaibino;
mau naakiyoon komeengkai kolangge motinambuun bai koolo-oloyono lapamo tinantukanggon.
17Oh ko Mian Bisa, bulaando kona sulitan Komu pikilan doiyaku,
tukon bulaando kona kadaang koaito!
18Kalu yaku aite, liisiyo kobone kona kadaang;
kalu kubangun tataap yaku piki-pikikene Ikoo.
19Ikoo ko Mian Bisa, boliisi komian molokis muakateyo kabus,
tukon dedeenggene komian momangakate doiyaku!
20Yanila bantile Ikoo lokis,
tukon yanila batotopi kala doi Mukota-kota.
21Oh Temeneno, yaku mosikitene komian momosikitonggon Ikoo,
mosikit konoanggu tuuk doi mian motumbokiikon Ikoo!
22Yaku mosikitene tuuno doi yanila,
tukon yaku anggene yanila musuh.
23Ikoo ko Mian Bisa solidikiyakukai, kitayokai konoanggu lalomo,
ujiyakukai sulano mutoiyo daku pikilan.
24Kitayokai daano komo lokis doi butonggu lalomo,
tukon andanaku doi loloon moakiyo kona pupusan.
Currently Selected:
SADEONG 139: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
