ANDEAN 6
6
Otinau-otinau bailin
1Kupau, banggokai ikoo biasamo paladandi doi meeng-meeng komian tuuk mobeale konasamea. 2Tukon moola teali ikoo molapamo kana doi talong luwedoi mubantilan-bantilan ilakomo luwedoi muperjanjian-perjanjian susungo. 3Kalu bisa bundoiya, kupau, ikoo daanomo doi miandoo nakakuasaan lalomo. Bai naiyamo konacara ikoo lolos; mosobitkai taus doi miannoo; kabiyokai tukon tutuu sulano naiyase sodiiyo ikoo. 4Inaikai motaus momoolo lolukon tukon inai balasanaang. 5Sodiiyomo kai kobutomu luwedoi kobodoo buno tomisi donga modambasene kobutongo luwedoi momangasu.
6Komian-mian mosasalaon sio napalatikanggene kobibil nacara tuboan tukon balajar luwedoi yana. 7Kobibil akiyo konakatua, akiyo konapamarentah kai napadagai, 8bai namalumbitan yanila pototongikene konapinupui konakinaan doi tempo keas. 9Polong doi tempo oila domo sasalaonnoo yase moolo? Oila kotempono yana yase bangun? 10#And. 24:33-34 Yana osulang akiyo konakinubai oi-oilah tuuk balasanaang, tukon yana bantile, “Eh yaku moolo soisiken, yaku pipitto.” 11Bai daanon yana moolo, yana kanakon kakurangan tukon talalaisan molubat buno pondikuk modaano konasandata.
12Mian molokis tukon balalainggon bakokoli doi yaa-yaa. 13Yana balamaen mata tukon mokubai paloosan tuuk bakokolii. 14Napikiran molokis badaang konatetel molkis tukon osumbute pogagaian doi yaa-yaa. 15Saibino doiya naikon tealikene kosilakaan sosinggot lupayo kobutongo tukon yana manas tuuno.
16-19Daano kopitu kopalakala ko Temeneno misikitene tukon aki namoola sinodiikon:
Ndodoong mobabanggaal
suungo mobakokolii,
limano moakateo komian
moakiyo konasalah,
tonotoko batetekene kolangge-langge molokis,
aino momosobit tujuiyo kokulokisan,
kosakisii mobanggadudul-banggadudul bakakala,
tukon mian moosumbute
kopomusuan doi antara tulanggita.
Poingotii kobaloloan kaliangano
20Kupau, kubaiyomokai oila tamamu napinarentakon, tukon inai motoliminggene naikon tinamo naotinau-otinau. 21Neneekekai sidutu yanila nabantilan-bantilan tukon abesemo doiya doinoamu lalomo. 22Yanila naotunggul-otunggul naikon mobimbinge ikoo muampakonan lalomo, modagaiyo ikoo doi tempo popook, tukon beena otunggul doikoo doi tempo ikoo bangun. 23Komuorang tua napotunjuk-potujuk bunokai posi motalaang; yanila napanganukon tudoikene doikoo kotuboan nacara monondok. 24Tukon bunodoiya ikoo dinodoonggon luwe doi molu-moluko monakal, tukon luwe doi budu-budukan mo salaiyo komian bailon naboloki. 25Inaikai mosalaiyo doi yanila namonondokan, inai motoboliseme doi yanila matano mobudukiyo. 26Komobalolowa moola natinambo kinaan meeng kopinggan, bai pololowai tukon mian naboloki sio nabeale tukon ansaang. 27Moolakai komian nalapine koaung aki tosua konakalambi? 28Molakai komian motudang aung balano aki natosua koaino? 29Doiya pokakana konabahaya tukon mopolibut komian bailon naboloki. Inde komokubaiyo aki naikon naluput luwe doi ukuman. 30Kalu komian pondikuk kinaan maukai naikon namalaal, yana naikon tinotulai. 31Tukon kalu yana ilako yana sio nabeale koidan pitu lunggon napinakuan; tuuk doiya yana siokai nalapus sasaibino konabuat. 32Bai bulaandokai tukon namian mala-malaneno mobalolowa? Yana lusayo kobutongo susungo! Longas tuuno yana! 33Yana naikon sinakisaa tukon tinotulai. Kosambuno naikon teali lokis sidutu posidutukon. 34Sabab, tukon nakokubai doo boine doo nalakai teali masakit konoano tobikon konanggimalan tosu-tosungi. Tukon kalu kai yana balase konamasakitan konoano, yana akiyo naikon konapomaasikonan. 35Yana aki teali inasiasi tukon doy; kopalaseng nakadaang oilakai aki nateali atasio konanggimalan.
Currently Selected:
ANDEAN 6: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
