ANDEAN 4
4
Kountungan moilaat luwedoi pandoian
1He labuk-labuk, ndongoliyokai tamamu naotinau! Palatikanggenekai doiya, maka ikoo naikon teali monondok. 2Kuinotunggukon doi komuyu nia monondok; sebab doiya ikoo inaikai mopandange enteng. 3Salataa doi kupoipoisikan tinanggu tamanggu napau langgongo, 4tamanggu otunggule yaku. Yana bantile, “Neneekekai naikon daku otinau-otinau inaikai sidutu ikoo toliminggene. Ampakokenemo daku otunggul-otunggul, sulano mutuboan monondok. 5Tealimo pandoi tukon talakana! Neneekekai sidutu daku otunggul-otunggul tukon inaikai poaisene.” 6Anggayokai kopandoian, maka kopandoian naikon lindungiko; Kilakene yana maka yana naikon dagayo ikoo sulano tataap aman. 7Lobo mopenting komo sio ikoo lakukene tumbe-tumbeno doiyana balausaha teali mamangan konapikiran. Oilakai komu ilolonggon, kotumbeno doiyamo balausahakai tuuk malaatan pangalatian. 8Osungemokai kopandoian, maka yana naikon katandake ikoo. Tomboniyokai yana, maka yana naikon lubatene kona inolomatian doi Koo. 9Yana beekene doi koo kopot bunga momonondok tuuk teali mumakota.
10Ndongoliyokai yaku, kupau! Palaatikanggenekai mono-monondok daku otinau-otinau, maka komu umur naikon bulusan. 11Yaku lapamo otunggulikene kopandoian doi koo tukon tudoikene kocara tuboan motalakana. 12Kalu ikoo tubo bunodoiya, maka ikoo naikon aki mutataan doi tempo ampakonan, tukon aki natakait doi tempo obulenan. 13Neneekekai sidutu naikon otunggul molapamo ikoo talimayo doiyaku. Dagaiyo koiya mono-monondok, sabab tukon dokuotungguloo komu tuboan naikon daano kohasilo. 14Inai mololoiyo komian lokis nakokubai, tukon inai motulutiyo yanila nakakabai-kakabai. 15Inaimokai poanggayo doi yanila doo. Badodonggon doi yanila tukon ampakono banggadudul! 16Komian lokis akiyoon namoola kalu akiyoon nalakukene moaki namonondok. Yanila aki napipiit kalu akiyoon nasilakayo komian bailon. 17Kulokisan tukon baranian doi yanila pokakana kokinaan tukon inuman.
18-19Mian molokis naloloon kalipokan buno popook nakalipokanan. Yanila takait tukon otuwong aki natoiyo. Kobaliko, loloon moiloloi mian monondok daanon buno oloyo matano nasumbutan; polokon malumbit polokon madialang, polong doi bundu teali madialang tuuno. 20Palatikanggenekai daku bantilan-bantilan, Kupau! Ndongoliyokai daku otinau-otinau. 21Inaikai mosakukene, baikai abesemokai sidutu doinoamu lalomo. 22Mian moamangalatikene naikon tubo tukon teali makalikodong. 23Dagaiyokai konoamu mono-monondok, sabab konoano tantukene komu tuboan loloono. 24Inaimokai mobantile kolobo moaki natalakana. Dedenggenemo kobantilan-bantilan mokala tukon bantil-bantilan momakisud tuuk kubaiyo sasat komian. 25Siokai kodudusomu laango tokita konoamu natotobosan; aki napalalu ikoo lakukene pokakana daano kosool doi batu sembeleng. 26#Ibr. 12:13 Pikikene namono-monondok akiyoon mumakabai, maka ikoo naikon daano kohasilo doi sasaibino muusaha lalomo. 27Dedenggenekai komo lokis, tukon tubomokai tukon jujul. Inaimokai molias luwe doi loloon motalakana.
Currently Selected:
ANDEAN 4: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
