ANDEAN 28
28
1Mian lokis obulen akiyokomo lelenggene,
bai komian jujul, barani buno singa.
2Kalu bangsa baladosa, kona panguasa poisosoboli;
kalu katua mamangan konapikiran,
bangsa naikon batahan tukon tataap sanaang.
3Mobalakuasa mopipiike komian motalalais,
buno udan babasal momanase kobapupuian.
4Indee komo aki napalosanggene koukum, tomboniyo komian lokis,
indee motaatio ko ukum tantaange komian lokis.
5Kaadilan akiyo komian lokis mobai mian mososubai,
Temeneno, bisa-bisa pahamiyo.
6Tadukai mian talalais mo moloyos konoano
luwedoi mian kaasa molokis.
7Tabo motaatio ko ukum daanon mian momamangan kona pikiran.
Bai mian mobalagaul tukon mian mobadaang kana doy pinake akamaayo kotamano.
8Indee moteali kaasa sabab mangala
untung tukon mounggali kauntungan badaang,
kana kaasaan naikon otuwong doi mian momamasikene ko mian talalais.
9Kalu ikoo aki muanggayo ko Mian Bisa naukum.
Mian Bisa doo naikon lasayo toluwekene komu sambeang.
10Indee mobudukio komian mojujul sulano namokubai lokis,
yana susungo otuwong doi talong lalomo.
Komian mobilisii konoano
naikon binaalakati tobikon nabaagia.
11Komian kaasa sidutu lasayo kobutongo mamangan kona pikiran
bai mian motalalais momonondok konoano toiyo indee yana kona bisaan.
12Kalu komian monondok balakuasa, saibino komian sanaang,
kalu komian lokis maparentah korayat basambuni.
13Indee komo seekene kona lalim aki naikon nabahagia.
Indee komo akuiyo tukon tinggale, naikon Temeneno seseange.
14Holomatio sidutu ko Temeneno, maka ikoo naikon bagia.
Kalu ikoo lawane yana, ikoo malaat silaka.
15Komian lokis mobalakuasa doi mian mokakulangan,
buno singa mongaaton kai asu lobo molobosiyo.
16Mobalakuasa pipiike komian bailon, akiyo kona pikiran monondok;
mobalakuasa misikitene kokulokisan naikon doi taun-taun konamaparentaan.
17Meeng komian mangakate naikon toiyo moilolonggon banggadudul polong doinamatean;
akiyo komeeng komian kai momoola taane yana.
18Komian motubo akiyo kososibolino naikon salamat.
Mian mosusah-susah konatuboan, naikon otuwong.
19Kotani mobalimang kokobukuan naikon mokinaan sabemo;
mian mo masakukon-masakukon tempo naikon nakakulanganan.
20Komian jujul naikon Temeneno balakaatio,
bai komian moyase mosobit kaasa, aki naluput doi ukuman.
21Aki namonondok mobeda-bedakene komian;
bai daano koidan kohakim moyase mokubai lokis
tolongo tuuk malaat doy soisik.
22Komian modoko-yase mosobit kaasa;
yana aki sadal baikon kona talalaisan mosobito nalupaiyo kobutongo.
23Komian mo beena panganukon
doi bundu lobian kona inanggaan doi mian mo beena panggaal.
24Indee komo pondikuk luwedoi naorangtua tukon sangkale doiya bolikon lalim,
pokakana kopondikuk-pondikuk bailon.
25Moutamakene kobutongo susungo osumbute kopodanganian;
ikoo untung lobian kalu kai mangangga doi Temeneno.
26Indee komo balanggene kona pandapat susungo akiyo konapikiran mo monondok.
Indee mololoi otunggul mian momamangan konapikiran naikon salamat.
27Indee komo beena doi mian mo talalais aki naikon nakakulangan.
Indee komo tutupe komatano telhadap mian talalais kona kabutuhan naikon kanakon totopi.
28Kalu mian lokis balakuasa,
korayat basambuni;
kalu mian lokis silaka;
mian moadil naikon pimpine tukon bebas.
Currently Selected:
ANDEAN 28: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
